काठमाडौं,३० चैत । प्रेस काउन्सिल नेपालले चुनावलाई असर पार्ने र मतदातालाई दिग्भ्रमित गर्ने सामग्री नप्रसारण गर्न आग्रह गरेको छ।

काउन्सिलको बैठकले दल, उम्मेदवार र मतदान प्रक्रियामा असर पर्ने खालका समाचार तथा विश्लेषण प्रकाशन–प्रसारण नगर्न सञ्चारमाध्यमलाई सचेत गराएको हो।

विदेशी सञ्चारमाध्यम, विशेषगरी बिबिसीबाट आउने सामग्री काउन्सिलको क्षेत्राधिकार बाहिर पर्ने भएकाले कूटनीतिक माध्यमबाट समाधान खोज्न नेपाल सरकार र निर्वाचन आयोग लाई अनुरोध गरिएको छ।

दाङ, ३० चैत्र । तुलसीपुर चेम्बर अफ कमर्शले आफ्नो नयाँ वर्ष २०८३ सालको भित्ते पात्रो (क्यालेन्डर) प्रकाशन गरेको छ । प्रकाशित क्यालेन्डरको एक कार्यक्रमका विच विमोचन गरिएको छ । संस्थाका अध्यक्ष ऋषिराज भण्डारीको अध्यक्षतामा तथा नेपाल चेम्बर अफ कमर्शका केन्द्रीय सदस्य टोप बहादुर घर्तीको प्रमुख आतिथ्यतामा कार्यक्रम गरिएको हो।

कार्यक्रममा अध्यक्ष भण्डारीले संस्था अहिले बामेसर्दै गरेको अवस्थामा भए पनि सामाजिक र व्यावसायिक नेतृत्वदायी भूमिकामा खरो उत्रिएको बताए । उनले संस्थागत गतिविधिहरूलाई तीव्र पारेका बताए । बजारीकरण, ब्रान्डिङमा केन्दृत भएको बताए । पूर्ण पारदर्शिता र उत्तरदायित्वका साथ व्यावसायिक र नेतृत्वदायी भूमिकामा अघि बढिरहेका बताए ।

कार्यक्रमका प्रमुख अतिथि नेपाल चेम्बर अफ कमर्शका केन्द्रीय सदस्य टोप बहादुर घर्तीले संस्थालाई थप गतिशील बनाउन सुझाव दिए । उनले स्थानीय स्तरका व्यावसायिक समस्या समाधानका लागि केन्द्रले आवश्यक समन्वय र सहजीकरण गर्ने प्रतिबद्धता व्यक्त गर्दै संस्थालाई मजबुत बनाउन सबै सदस्यहरूको सामूहिक प्रयास आवश्यक रहेको औंल्याए ।

त्यसैगरी, कार्यक्रममा बोल्दै सल्लाहकार नेत्रलाल ओलीले व्यवसायीहरूको हकहित र संरक्षणका लागि फुट्ने नभई सबै व्यवसायीहरू एकताबद्ध भएर लाग्नुपर्नेमा जोड दिए ।
क्यालेन्डर प्रकाशन समितिका संयोजक एवं संस्थाका वरिष्ठ उपाध्यक्ष सन्तोष खड्काको स्वागत मन्तव्यबाट सुरु भएको कार्यक्रमको सञ्चालन महासचिव दुर्गाप्रसाद शर्माले गर्रेका थिए ।

काठमाडौ,३० चैत। इरानले ५० भन्दा बढी ‘अमेरिकी गुप्तचर’ पक्राउ गरेको दाबी गरेको छ। शान्ति वार्ता असफल भएपछि गरिएको अपरेशनमा ती व्यक्तिहरू पक्राउ परेको इरानी अधिकारीहरूले बताएका छन्।

उनीहरूलाई शत्रु राष्ट्रसँग सहकार्य गरेको र सरकारविरोधी गतिविधिमा संलग्न रहेको आरोप लगाइएको छ।

बिबिसीका अनुसार, पक्राउ परेकाहरूले अमेरिका र इजरायल लाई संवेदनशील सूचना पठाएको आरोप छ।
उनीहरूबाट इलेक्ट्रोनिक उपकरण, हतियार र गोला-बारुद समेत बरामद भएको जनाइएको छ।

यसैबीच, गिलान प्रान्तमा इस्लामिक रिभोलुसनरी गार्ड्स कोर्प्स ले १०२ जनालाई पक्राउ गरेको दाबी गरेको छ। साथै, मोसाद सँग सम्बन्ध रहेको आरोपमा ४ जना पनि पक्राउ परेका छन्।

दाङ,२९ चैत । अमेरिकाले एकैपटक ३५ जना नेपालीलाई डिपोर्ट गरेको छ। चार्टर विमानमार्फत उनीहरूलाई नेपाल फर्काइएको हो। त्रिभुवन अन्तर्राष्ट्रिय विमानस्थलका अध्यागमन प्रमुख नरहरी घिमिरेका अनुसार उनीहरू चैत २४ गते मंगलबार काठमाडौं आइपुगेका हुन्।

डिपोर्ट हुनेमध्ये १२ जना अवैध बाटोबाट अमेरिका पुगेका थिए भने २ जना विद्यार्थी भिसामा गएका थिए। मानव बेचविखन अनुसन्धान ब्यूरोका एसएसपी कृष्ण पंगेनीका अनुसार अन्य व्यक्तिहरू विभिन्न नियम उल्लंघन गरेको आरोपमा फर्काइएका हुन्।

पछिल्लो दुई महिनामा अमेरिकाबाट २ सयभन्दा बढी नेपाली डिपोर्ट भइसकेका छन्। डोनाल्ड ट्रम्पको दोस्रो कार्यकाल सुरु भएयता यस्तो क्रम बढ्दै गएको छ।

अमेरिका सरकारले पछिल्लो समय आप्रवासीहरूमाथि कडाइ गरेको छ। भिसा प्रक्रिया पूरा नगर्ने, भिसा अवधि सकिएपछि पनि बस्ने वा नियम उल्लंघन गर्ने व्यक्तिहरूलाई नियन्त्रणमा लिएर आफ्नै देश फर्काउने नीति लागू भइरहेको छ।

काठमाडौ,२९ चैत। राष्ट्रिय क्रिकेट टोलीका प्रमुख खेलाडी करण केसीलाई खेलमा प्रतिबन्ध लगाइएको छ । विवादित सामाजिक सञ्जाल स्टाटसका कारण उनलाई नेपाल क्रिकेट संघ (क्यान) ले कारबाही गरेको हो ।

क्यानले अनुशासन उल्लङ्घन गरेको ठहर गर्दै केसीलाई खेलका लागि प्रतिबन्ध लगाउने निर्णय गरेको हो। साथै, सोही खेलको म्याच फीसमेत काट्ने निर्णय गरिएको क्यानले जनाएको छ।

क्यानका अनुसार खेलाडीहरूले सार्वजनिक रूपमा व्यक्त गर्ने धारणा र गतिविधि संस्थाको आचारसंहिताभित्र रहनुपर्ने भएकाले सो स्टाटसलाई गम्भीर रूपमा लिँदै कारबाही गरिएको हो।

उक्त घटनापछि केसीको स्टाटस सामाजिक सञ्जालमा व्यापक चर्चा र विवादको विषय बनेको थियो। यस विषयमा क्यानले स्पष्ट सन्देश दिन र अनुशासन कायम राख्न आवश्यक ठानी कारबाही गरेको जनाएको छ।

काठमाडौ,२९ चैत । प्रधानमन्त्री बालेन्द्र शाहसहित अन्य नेताहरूविरुद्ध अपमानजनक अभिव्यक्ति दिएको आरोपमा एक युट्युबर पक्राउ परेका छन्।

प्रहरीका अनुसार फाल्गुनन्द गाउँपालिका–७ का रोशन पोखरेललाई ‘हेड्स’ नामक युट्युब च्यानलमार्फत अपमानजनक भिडियो बनाएको आरोपमा नियन्त्रणमा लिइएको हो। उनले प्रधानमन्त्री बालेन्द्र शाहलगायतका नेताहरूलाई लक्षित गर्दै विवादास्पद अभिव्यक्ति दिएका थिए।

जिल्ला अदालत पाँचथरबाट १० दिनको म्याद थप गरी उनीमाथि साइबर अपराधसम्बन्धी कसुरमा अनुसन्धान भइरहेको जिल्ला प्रहरी कार्यालय पाँचथरले जनाएको छ।

रोल्पा, २९ चैत । भिरबाट लडेर रोल्पामा एकजनाको मृत्यु भएको छ । मृत्यु हुनेमा त्रिवेणी गाउँपालिका वडा २ नुवागाँउका २२ वर्षीय देशकुमार बाँठामगर रहेका छन् । प्रहरीका अनुसार बाँठामगरको शनिबार साँझ भिरबाट लडेर मृत्यु भएको हो।

जुँगारदेखि नुवागाउँ घरतर्फ जाने क्रममा लडेर मृत्यु भएको जिल्ला प्रहरी कार्यालय रोल्पाले जानकारी दिएको छ । रयालेस्थित बाटोदेखि करिब ६० मिटर तल खोलामा खस्दा घटनास्थलमै मृत्यु भएको जिल्ला प्रहरी कार्यालय रोल्पाका सूचना अधिकारी प्रहरी निरीक्षक सुनिल थापा नेपालीले जानकारी दिए ।घटनाको थप अनुसन्धान भइरहेको उनले जानकारी दिए।

दाङ,२९ चैत । दाङमा ईट्टाभट्टाको पर्खाल भत्किँदा एक मजदुरको मृत्यु भएको छ । एकजना घाइते भएका छन् । ईलाका प्रहरी कार्यालय तुलसीपुरका अनुसार तुलसीपुर उपमहानगरपालिका–१६ मा रहेको सेवा ईट्टाभट्टामा आइतबार बिहान करिब ७ बजे पर्खाल भत्किँदा काम गरिरहेका मजदुरहरू च्यापिएका थिए। उक्त घटनामा परी भारतको बहराइच जिल्लाका ३० वर्षीय तिर्थराम पासवानको मृत्यु भएको पुष्टि प्रहरीले गरेको छ।

त्यस्तै, ३६ वर्षीय देवराज पासवान गम्भीर घाइते भएका छन्। उनलाई प्रारम्भिक उपचारका लागि राप्ती प्रादेशिक अस्पताल तुलसीपुर लगिएकोमा थप उपचारका लागि नेपालगन्ज रिफर गरिएको प्रहरीले जनाएको छ।मृतकको शव पोस्टमार्टमका लागि शवगृहमा राखिएको छ। घटनाबारे आवश्यक अनुसन्धान भइरहेको प्रहरीले जानकारी दिएको छ

काठमाडौं,२९ चैत। साताको पहिलो दिन आइतबार नेपाली बजारमा सुन र चाँदीको मूल्यमा सामान्य वृद्धि देखिएको छ।

नेपाल सुनचाँदी व्यवसायी महासंघका अनुसार आज सुनको मूल्य तोलामा २०० रुपैयाँले बढेर दुई लाख ९७ हजार १०० रुपैयाँ पुगेको छ। यसअघि सुन दुई लाख ९६ हजार ९०० रुपैयाँमा कारोबार भइरहेको थियो।

त्यस्तै, चाँदीको मूल्य पनि बढेको छ। शुक्रबार तोलामा चार हजार ९६० रुपैयाँमा किनबेच भएको चाँदी आज १५ रुपैयाँले वृद्धि भई चार हजार ९७५ रुपैयाँ पुगेको महासंघले जनाएको छ।

काठमाडौं,२९ चैत । अमेरिका–इरानबीच बढ्दो तनावका बीच कूटनीतिक वार्ताको प्रभावकारितामाथि प्रश्न उठ्न थालेको छ। जापानस्थित इरानी दूतावास जापान ले सैन्य आक्रमणबाट प्राप्त गर्न नसकिएका उद्देश्य कूटनीतिमार्फत थोपर्न नसकिने स्पष्ट पारेको छ।
इस्लामाबादमा हालै सम्पन्न वार्तापछि अन्तर्राष्ट्रिय स्तरमा धारणा तीव्र भइरहेका बेला इरानले आफ्नो अडान पुनः दोहोर्‍याएको हो।

दूतावासले सामाजिक सञ्जाल ‘एक्स’ मार्फत जारी गरेको वक्तव्यमा अमेरिकी उपराष्ट्रपति जेडी भान्स ले अघि सारेको ‘अन्तिम तथा उत्कृष्ट प्रस्ताव’ लाई एकपक्षीय भन्दै अस्वीकार्य ठहर गरेको छ। प्रस्ताव स्वभावतः पारस्परिक हुनुपर्ने उल्लेख गर्दै कुनै एक पक्षले दबाब सिर्जना गर्ने माध्यमका रूपमा प्रयोग गर्न नमिल्ने जनाइएको छ।

वक्तव्यमा भान्सको “इरानले हाम्रो सर्त स्वीकार नगर्ने छनोट गरेको छ” भन्ने अभिव्यक्तिलाई पनि अस्वीकार गर्दै यसलाई जबरजस्ती तर्कको संज्ञा दिइएको छ। दूतावासका अनुसार यस्तो धारणा अर्को पक्षलाई युद्धमैदानमा असफल भएका मागहरू स्वीकार गर्न बाध्य पार्ने प्रयास हो, जुन कूटनीतिक सिद्धान्तविपरीत छ।
इरानले पछिल्लो द्वन्द्वको सुरुआत आफूबाट नभएको दाबीसमेत गरेको छ। साथै, भान्सका अभिव्यक्तिले अन्तर्राष्ट्रिय समुदायमा थप गम्भीर बहस आवश्यक बनाएको उल्लेख गरिएको छ।

यसैबीच, अमेरिकी सेन्ट्रल कमान्ड ले आफ्ना युद्धपोत युएसएस फ्रान्क ई. पिटरसन (डिडिजी–१२१) र युएसएस माइकल मर्फी (डिडिजी–११२) होर्मुज जलडमरूमध्य पार गर्दै जलमार्ग सुरक्षासम्बन्धी अभियान सुरु गरेको जनाएको छ।

तर इरानले अमेरिकी दाबी अस्वीकार गर्दै उक्त क्षेत्रमा कुनै पनि अमेरिकी जहाज प्रवेश नगरेको जनाएको छ। इरानी सेनाको खताम अल–अन्बिया केन्द्रीय मुख्यालयका प्रवक्ताका अनुसार होर्मुज जलडमरूमध्यमा जहाजहरूको आवागमन इरानकै सशस्त्र बलको नियन्त्रणमा रहेको छ।

अमेरिका र इरानबीच बढ्दो आरोप–प्रत्यारोपले कूटनीतिक समाधानको सम्भावनालाई थप जटिल बनाउँदै लगेको विश्लेषण गरिएको छ।