काठमाडौँ,९ चैत। त्रिभुवन अन्तर्राष्ट्रिय विमानस्थलबाट प्रहरीले ३ किलो ४३५ ग्राम गाँजासहित सोमबार एक थाई नागरिकलाई पक्राउ गरेको छ।

पक्राउ पर्नेमा बैंककबाट काठमाडौं आएका ३९ वर्षीय योङयुट थुइओन रहेका छन्। त्रिभुवन अन्तर्राष्ट्रिय विमानस्थल सुरक्षा कार्यालयका प्रहरी नायब उपरीक्षक ढुण्डीराज नेउपानेका अनुसार थाई एअरलाइन्सको उडान नम्बर TG–309 बाट आएका उनले आफ्नो सुटकेसभित्र प्रतिबन्धित लागुऔषध लुकाएर ल्याएका थिए। “आगमन टनेल गेटमा जाँच गर्ने क्रममा उनको साथबाट गाँजाजस्तो देखिने पदार्थ बरामद गरिएको हो,” उनले भने।

पक्राउ परेका उनलाई थप अनुसन्धान तथा कारबाहीका लागि लागुऔषध नियन्त्रण ब्यूरो, कोटेश्वर पठाइएको प्रहरीले जनाएको छ।

दाङ,९ चैत । अर्थ मन्त्रालयले आगामी आर्थिक वर्ष २०८३/८४ को बजेट निर्माणका लागि सबै विषयगत मन्त्रालयलाई चैत १५ गतेभित्र योजना तथा कार्यक्रम प्रस्ताव पेस गर्न निर्देशन दिएको छ।

मन्त्रालयले तयार पारेको बजेट क्यालेन्डरअनुसार सबै मन्त्रालयले आफ्ना योजना तथा कार्यक्रम एलएमबिआइएसमा अनिवार्य रूपमा प्रविष्ट गर्नुपर्नेछ।

अर्थ मन्त्रालयका प्रवक्ता टङ्कप्रसाद पाण्डेयले सबै मन्त्रालयलाई बजेट सीमा (सिलिङ)पठाइसकिएको र सोहीअनुसार प्रस्ताव राख्न भनिएको बताए। “नयाँ सरकार गठन भइनसकेको भए पनि बजेट निर्माण प्रक्रिया अघि बढाउनुपर्ने अवस्था छ,” उनले भने।

उनले बजेट आर्थिक मात्र नभई राजनीतिक विषयसँग समेत जोडिएको उल्लेख गर्दै नयाँ सरकारको नीति तथा कार्यक्रमअनुसार अन्तिम बजेट तय हुने बताए।

सरकारले आगामी आवका लागि करिब १८ खर्ब ९० अर्ब रुपैयाँको बजेट ल्याउने गरी सिलिङ तयार गरेको राष्ट्रिय योजना आयोगले जनाएको छ।

चैतदेखि बजेट निर्माण प्रक्रिया तीव्र बनाइने कार्यतालिका छ। चैत १५ भित्र मन्त्रालयबाट प्रस्ताव संकलन, चैत २१–२३ मा मन्त्री तथा सचिवसँग छलफल, र चैत अन्तिम सातादेखि प्रदेशसँग परामर्श गर्ने योजना रहेको छ।

वैशाख महिनामा बजेटको प्राविधिक तथा नीतिगत तयारी गरिनेछ भने जेठ १५ गते संघीय संसदको संयुक्त बैठकमा बजेट प्रस्तुत गर्ने संवैधानिक व्यवस्था छ।

नयाँ सरकार गठनमा ढिलाइ हुँदा नीति तथा कार्यक्रम तय गर्न केही प्रभाव परेको भए पनि तोकिएकै समयमा बजेट ल्याउने तयारी भइरहेको मन्त्रालयले जनाएको छ।

काठमाडौं, ९ चैत । सिंहदरबारभित्रबाटै सङ्घीय संसद् सञ्चालन हुने तयारीसँगै नवनिर्वाचित ६ राष्ट्रिय दलका संसदीय कार्यालय व्यवस्थापनको काम अन्तिम चरणमा पुगेको छ। सांसद सङ्ख्या र पदाधिकारीको आवश्यकताअनुसार कक्ष छुट्याइएका छन् भने अधिकांश स्थानमा रङ्गरोगन, कार्पेट र फर्निचर जडान सकिएको छ।
यसपटक बहुमतसहित उदाएको राष्ट्रिय स्वतन्त्र पार्टी (रास्वपा) लाई सबैभन्दा ठूलो कक्ष दिइएको छ। सचिवालय भवन नं २ मा व्यवस्थित रास्वपाको कार्यालयमा १८० कुर्सीसहित बैठक हल राखिएको छ। रास्वपाका १८२ जना सांसद छन्।
पूर्व प्रयोगमा रहेका कार्पेट, पर्दा र फर्निचर पुनः प्रयोग गरिएको छ भने थोरै नयाँ सामग्री थपिएको छ। खर्च कटौतीलाई प्राथमिकता दिने दलको निर्णयअनुसार रास्वपाका महामन्त्री कविन्द्र बुर्लाकोटी को आग्रहअनुसार उपलब्ध सामग्रीबाट व्यवस्थापन गरिएको छ।
रास्वपाले प्रयोग गर्दै आएको भवनमा अन्य दलहरूको कार्यालय पनि व्यवस्थापन गरिएको छ। नेकपा, श्रम संस्कृति पार्टी र राष्ट्रिय प्रजातन्त्र पार्टी का कक्ष त्यही भवनमा तयार भएका छन्। यद्यपि ती कक्षमा रङ्गरोगन सकिएको भए पनि कार्पेट र फर्निचर जडान अझै जारी छ।
त्यस्तै, नेपाली कांग्रेस र एमाले लाई साबिककै कार्यालयमा निरन्तरता दिइएको छ। सांसद सङ्ख्या र पदाधिकारीको आधारमा कोठा विभाजन गरिएको छ।

सङ्घीय संसद् सचिवालयका प्रवक्ता एकराम गिरी का अनुसार, यो व्यवस्था अल्पकालीन भए पनि संसद् सञ्चालन सुरु हुने समयसम्म सबै दलका संसदीय कार्यालय पूर्ण रूपमा तयार हुनेछन्।

दाङ,९ चैत । शिकार खेल्न गएका बेला बेपत्ता भएका ३३ वर्षीय टोपबहादुर खत्रीको शव १७ दिनपछि फेला परेको छ। जिल्ला प्रहरी कार्यालय सुर्खेतका प्रमुख प्रहरी उपरीक्षक सुधीरराज शाहीले बाँके र सुर्खेत प्रहरी तथा निकुञ्जको संयुक्त टोलीले शव फेला पारेको बताए। शव फेला परेको स्थान बर्दिया जिल्लाभित्र पर्छ।

गत २३ फागुनमा बराहताल गाउँपालिका–१का पाँच जना र लेकबेँसी नगरपालिका–८का एक जना गरी ६ जना सिकारका लागि निकुञ्ज प्रवेश गरेका थिए।

उनीहरू भरुवा बन्दुक तथा घरेलु हातहतियारसहित झण्डै १७ किलोमिटर दूरी पार गरेर जंगल पुगेका थिए।
सिकारमा गएका अन्य सदस्यहरू भने सोही दिन घर फर्किए, तर टोपबहादुर खत्री फर्केनन्।

घर फर्किएकाहरूले उनी जंगलमै मरेको बताएका थिए, तर मृत्युको कारण खुलाएका थिएनन्। घटनापछि उनीहरू भारततर्फ भागेको बताइएको छ। यो घटना १० दिनपछि मात्रै सार्वजनिक भएको थियो।

सिकारमा गएका समूहका एक सदस्यका परिवारमार्फत जानकारी बाहिरिएपछि रानीघाट प्रहरी चौकीमा खबर पुगेको र त्यसपछि घटनाको अनुसन्धान सुरु भएको प्रहरीले जनाएको छ।

सल्यान, ९ चैत । नेपाल विद्युत प्राधिकरणको सल्यान वितरण केन्द्रमा मिटर नपाएपछि एक वडाध्यक्ष धर्नामा बसेका छन्। कपुरकोट गाउँपालिका–३का वडाध्यक्ष प्रदीप खड्का आफ्ना वडाका तीन जना सेवाग्राहीका लागि विद्युत मिटर लिन कार्यालय पुगेका थिए। आवश्यक प्रक्रिया पूरा गरेपछि पनि मिटर उपलब्ध नहुने भनिएपछि उनले धर्ना बस्ने निर्णय गरेका हुन्।

साँझ ५ बजेदेखि सुरु भएको धर्ना राति अबेरसम्म जारी रह्यो। मिटर पाउनुपर्ने माग राख्दै उनी वितरण केन्द्र परिसरमै बसे ।अन्ततः करिब साढे १० बजे कर्मचारीहरूले मिटर उपलब्ध गराएपछि उनले धर्ना अन्त्य गरेका छन्।

घटनापछि सेवा प्रवाहलाई छिटो र सहज बनाउने सहमति भएको बताइएको छ। यस घटनाले सेवा प्रणालीमा ढिलासुस्ती र व्यवहारगत समस्या रहेको देखाएको स्थानीयहरुको भनाई छ।

यसैबीच सल्यानबाट निर्वाचित प्रतिनिधिसभा सदस्य रमेश मल्लले घटनाप्रति गम्भीर ध्यानाकर्षण भएको बताएका छन्। “प्रक्रियाको नाममा भएको ढिलासुस्तीले गम्भीर प्रश्न उठाएको छ, जनप्रतिनिधिसँग यस्तो व्यवहार भए सर्वसाधारणको अवस्था के होला?” उनले भने।

उनले घटनाको छानबिन गरी दोषीलाई कारबाही गर्न र सेवा प्रवाह सुधार गर्न सम्बन्धित निकायसँग माग गरेका छन्।

दाङ,९ चैत । बालेन्द्र शाह नेतृत्वको सरकारले राज्यका विभिन्न निकायमा भएका १ हजार १ सय ७० वटा राजनीतिक नियुक्ति एकमुष्ट खारेज गर्ने तयारी गरेको छ।

कर्मचारीतन्त्रमा सुधार गर्ने योजनासहित शाहले सरकार गठनपछि पहिलो निर्णयमै अघिल्लो सरकारले गरेका नियुक्ति हटाउने तयारी गरेका हुन्। राष्ट्रिय स्वतन्त्र पार्टीका वरिष्ठ नेता शाह चैत १३ गते प्रधानमन्त्री नियुक्त हुने र सोही दिन मन्त्रिमण्डल गठन गर्ने तयारी गरिएको छ।

संवैधानिक निकाय, सार्वजनिक संस्थान, कूटनीतिक नियोग तथा विभिन्न बोर्डहरूमा भएका राजनीतिक नियुक्ति हटाउने योजना अनुसार अहिले ती पदमा रहेका व्यक्तिहरूको विवरण संकलन भइरहेको छ।

रास्वपाका केन्द्रीय सदस्य तथा सांसद पुकार बमले नयाँ सरकार बनेपछि बस्ने मन्त्रिपरिषद्को पहिलो बैठकमै यसबारे निर्णय हुने बताए। “राजनीतिक नियुक्तिबारे क्याबिनेटको पहिलो बैठकमै औपचारिक निर्णय हुन्छ,” उनले भने।

पार्टीका प्रवक्ता मनिष झाले नयाँ सरकार गठनअघि नै त्यस्ता पदमा रहेका व्यक्तिहरूलाई नैतिकताका आधारमा स्वेच्छिक राजीनामा दिन आग्रह गरिएको बताए। उनले भने, “यो कुनै व्यक्ति लक्षित कदम होइन, राज्य संयन्त्रलाई कार्यकर्ता भर्ती केन्द्रबाट मुक्त गर्ने अभियान हो।”

उनका अनुसार कार्यकर्ता भरणपोषणका लागि गरिएका अनावश्यक नियुक्ति खारेज गरिनेछ भने क्षमता र योग्यताका आधारमा भएका नियुक्ति पुनरावलोकन गरिनेछ।

रास्वपाले हालसम्म कुन–कुन पद खारेज गर्ने भन्ने विस्तृत सूची सार्वजनिक गरेको छैन। यस विषयमा थप छलफल र गृहकार्य भइरहेको बताइएको छ।

जेनजी आन्दोलनपछि भएको चुनावमा बहुमत नजिकको समर्थन पाएको रास्वपाले सरकार गठनलगत्तै देखिने खालका काम गर्ने योजना बनाएको छ। राजनीतिक नियुक्ति खारेजीलाई प्राथमिक कार्यसूचीमा राखिएको छ।

नेपालमा अख्तियार दुरुपयोग अनुसन्धान आयोग, लोक सेवा आयोग, निर्वाचन आयोग लगायत संवैधानिक निकाय तथा विभिन्न सरकारी संस्थानमा राजनीतिक आधारमा नियुक्त भएका पदाधिकारीहरू यस निर्णयबाट प्रभावित हुने देखिएको छ।

रास्वपाको दाबी अनुसार यस्तो कदमले राज्यकोषमा पर्ने ठूलो आर्थिक भार घटाउने विश्वास गरिएको छ।

काठमाडौ,९ चैत ।नेपाली कांग्रेसका महामन्त्री प्रदीप पौडेलले कार्की आयोगको प्रतिवेदन सार्वजनिक गर्न सरकारसँग माग गरेका छन्।

उनले आज सामाजिक सञ्जालमा वक्तव्य जारी गर्दै जेनजी आन्दोलनका क्रममा भदौ २३ र २४ गते भएका घटनाको छानबिनका लागि बनेको कार्की आयोगको प्रतिवेदन सार्वजनिक गर्नुपर्ने बताएका छन्।

“आयोगले प्रतिवेदन बुझाएको धेरै भइसक्यो, तर सार्वजनिक नगरी लुकाएर राख्नु विडम्बना हो, यसले आशंका बढाएको छ,” उनले भने। सरकारले प्रतिवेदन सार्वजनिक गर्नु आफ्नो दायित्व भएको पनि उनले बताए।

महामन्त्री पौडेलले कांग्रेस केन्द्रीय कार्यसमिति बैठकले पनि प्रतिवेदन सार्वजनिक गर्न सरकारसँग माग गर्ने निर्णय गरेको स्मरण गराए।

दाङ,९ चैत ।नेपालको बजारमा सोमबार सुन र चाँदीको मूल्यमा गिरावट आएको छ। नेपाल सुनचाँदी व्यवसायी महासंघका अनुसार छापावाल सुनको मूल्य प्रतितोला ६ हजार ५०० रुपैयाँले घटेको छ।

सोमबारका लागि छापावाल सुनको मूल्य प्रतितोला २ लाख ७५ हजार ५०० रुपैयाँ तोकिएको छ। यसअघि आइतबार सुन प्रतितोला २ लाख ८२ हजार रुपैयाँमा कारोबार भएको थियो।

सुनसंगै चाँदीको मूल्यमा पनि गिरावट आएको छ। आइतबार प्रतितोला ४ हजार ५४० रुपैयाँमा कारोबार भएको चाँदी सोमबार ११५ रुपैयाँले घटेर ४ हजार ४२५ रुपैयाँ कायम भएको छ।

दाङ, ९ चैत । राप्ती स्वास्थ्य विज्ञान प्रतिष्ठान, घोराहीमा क्यान्सर उपचार सेवा विस्तार गर्ने उद्देश्यले क्यान्सर परामर्श शिविर सञ्चालन हुने भएको छ। प्रतिष्ठान र बि.पि. कोइराला मेमोरियल क्यान्सर अस्पताल बीच घोराहीमा क्यान्सर उपचार सेवा सुरु गर्न गरिएको सहकार्य सम्झौताअनुसार उक्त शिविर आयोजना गर्न लागिएको हो।
आगामी चैत्र १३ गते प्रतिष्ठान परिसरमा सञ्चालन हुने शिविरमा विभिन्न प्रकारका क्यान्सरसँग सम्बन्धित समस्या भएका बिरामीहरूलाई लक्षित गरिएको छ। विशेषगरी केमोथेरापी (Chemo) लिइरहेका बिरामीहरू, डिम्बाशय, पाठेघर तथा पाठेघरको मुखको क्यान्सर भएका महिलाहरू, साथै महिनावारी सुकेपछि पनि योनिबाट रगत वा गन्हाउने पानी बग्ने समस्या भएका महिलाहरूलाई शिविरमा जाँच गराउन आग्रह गरिएको छ।

त्यसैगरी मृगौला तथा पिसाब थैलीको क्यान्सर भएका बिरामीहरू वा पिसाबमा रगत देखिने समस्या भएका व्यक्तिहरू, साथै स्तनमा गाँठागुठी, स्तनबाट रगत वा पिप बग्ने समस्या भएका महिलाहरूलाई पनि उक्त शिविरमा सहभागी हुन अनुरोध गरिएको छ।
शिविरमा ओपीडी कार्ड तथा चिकित्सक परामर्श सेवा निःशुल्क उपलब्ध गराइनेछ भने आवश्यक प्रयोगशाला परीक्षण सेवा स–शुल्क हुने जानकारी दिइएको छ।
क्यान्सरजस्तो गम्भीर रोगको समयमै पहिचान र उपचारमा सहयोग पुर्‍याउने उद्देश्यले आयोजना गरिएको यस शिविरबाट स्थानीय बिरामीहरू प्रत्यक्ष लाभान्वित हुने अपेक्षा गरिएको छ। शिविरमा सम्बन्धित सबैलाई समयमै उपस्थित भई सेवा लिन आग्रह समेत गरिएको छ।

दाङ,८ चैत । जिल्लाका दुई छुट्टाछुट्टै स्थानमा दुई जना पुरुष मृत अवस्थामा फेला परेका छन्। नेपाल प्रहरीका अनुसार शनिबार दिउँसो उनीहरू मृत अवस्थामा फेला परेका हुन्।

बंगलाचुली गाउँपालिका–६, दाङको सिउडेस्थित जंगलमा सोही स्थानका ७० वर्षीय बिष्णु पौडेल मृत अवस्थामा फेला परेका छन्।

यस्तै राजपुर गाउँपालिका–७, दाङको भैसाही नाकामा हाल नाम, थर र वतन नखुलेका अन्दाजी ४५ वर्षीय पुरुष मृत अवस्थामा भेटिएको प्रहरीले जनाएको छ।
घटनाबारे प्रहरीले थप अनुसन्धान अघि बढाएको छ।