दाङ,२९ जेठ । लुम्बिनी प्रदेश सरकारको मन्त्रिपरिषद् बैठकले प्रदेश आर्थिक कार्यविधि तथा वित्तीय उत्तरदायित्व सम्बन्धी नियमावली, २०८३ स्वीकृत गरेको छ।

मुख्यमन्त्री चेतनारायण आचार्यको अध्यक्षतामा बिहीबार साँझ बसेको बैठकले आर्थिक मामिला तथा योजना मन्त्रालयले पेश गरेको नियमावली पारित गरेको हो।

सरकारका प्रवक्ता तथा स्वास्थ्य मन्त्री रामजीप्रसाद घिमिरेका अनुसार नयाँ नियमावली लागू भएसँगै बजेट कार्यान्वयन र वित्तीय व्यवस्थापन थप प्रभावकारी, सहज र उत्तरदायी बन्ने अपेक्षा गरिएको छ।

यसअघि आन्तरिक रकमान्तरका लागि सम्बन्धित मन्त्रालयले आर्थिक मामिला तथा योजना मन्त्रालयको स्वीकृति लिनुपर्ने व्यवस्था रहेकामा अब प्रक्रिया सरल बनाइएको छ।

यस्तै, योजना संशोधन गर्ने अधिकार सम्बन्धित मन्त्रालयलाई नै दिइएको छ, जसले योजना कार्यान्वयनमा हुने ढिलासुस्ती घटाउन सहयोग पुग्ने विश्वास गरिएको छ।

बर्दिया,२९ जेठ । नक्कली सरकारी कार्यालय स्थापना गरी ठगी गरेको आरोपमा बर्दिया प्रहरीले एक दम्पत्तिलाई पक्राउ गरेको छ।

ठाकुरबाबा नगरपालिका–३ बगनाह बजारमा घर भाडामा लिएर ‘प्रगन्ना तथा बड्कापथ सिंचाइ विभाग’ नामक नक्कली कार्यालय सञ्चालन गरी सर्वसाधारणलाई ठगी गरेको आरोपमा २४ वर्षीय घनश्याम न्यौपाने र उनकी श्रीमती २३ वर्षीया कृपा चौधरी पक्राउ परेका हुन्।

जिल्ला प्रहरी कार्यालय बर्दियाका प्रवक्ता डीएसपी रेशम बोहराका अनुसार दाङमा रहेको उक्त विभागको नाम प्रयोग गर्दै बर्दियामा नक्कली कार्यालय सञ्चालन गरी विभिन्न व्यक्तिलाई ठगी गरेको अनुसन्धानबाट खुलेको छ।

पक्राउ परेका दम्पत्तिमध्ये न्यौपानेले आफूलाई चार्टर्ड एकाउन्टेन्ट (सीए) र चौधरीले उक्त कार्यालयको अधिकृत (सातौं तह) भएको झुटो दाबी गरी सर्वसाधारणलाई भ्रममा पार्दै ठगी गरेको पाइएको छ।

उनीहरूले नक्कली कार्यालयमार्फत कर्मचारी नियुक्ति गराइदिने प्रलोभन देखाएर कामदारहरूबाट काम लगाई ज्याला नदिने, घरधनीलाई भाडा नतिर्ने तथा नक्कली सरकारी कागजात र छाप प्रयोग गर्ने गरेको प्रहरीले जनाएको छ।

पक्राउ परेका दम्पत्तिविरुद्ध जिल्ला अदालतबाट सात दिनको म्याद थप गरी अनुसन्धान भइरहेको छ। उनीहरूविरुद्ध ठगी तथा लिखत सम्बन्धी कसूरअन्तर्गत मुद्दा चलाउने तयारी गरिएको प्रहरीले जनाएको छ।

काठमाडौ,२९ जेठ । बजेट वक्तव्यमा आफ्ना मागहरू सम्बोधन नभएपछि विद्यालयका कर्मचारीहरू आन्दोलनमा उत्रिएका छन्।
नेपाल विद्यालय कर्मचारी परिषद्को समन्वयमा विभिन्न कर्मचारी युनियन तथा संगठनहरूको संयुक्त मोर्चाले चरणबद्ध आन्दोलनको घोषणा गरेको हो।

कार्यतालिका अनुसार उनीहरूले सरकार, अर्थमन्त्रालय, शिक्षामन्त्रालय र मानव स्रोत विकास केन्द्रलाई ध्यानाकर्षण पत्र बुझाइसकेका छन्। साथै जिल्ला तहमा शिक्षा विकास तथा समन्वय इकाई र जिल्ला प्रशासन कार्यालयमार्फत पनि ध्यानाकर्षण गराइएको छ।

कर्मचारीहरूले आ–आफ्ना क्षेत्रका जनप्रतिनिधिलाई जानकारी गराउँदै संघीय संसद्मा आफ्ना माग उठाउन आग्रह गरेका छन्।
घोषित कार्यक्रमअनुसार जेठ २८ गतेदेखि असार ४ गतेसम्म कालो पट्टी बाँधेर काम गर्ने र माग पूरा नभए असार ५ गतेदेखि सम्पूर्ण कामकाज ठप्प पार्ने निर्णय गरिएको छ। असार ६ गते दोस्रो चरणको आन्दोलन घोषणा गरिने पनि जनाइएको छ।

काठमाडौ,२९ जेठ । विपक्षी दलका सांसदहरूले आर्थिक विधेयकमाथि भएको संशोधनबारे संसदीय छानबिन समिति गठन गर्न माग गरेका छन्। साथै सीमा समस्याबारे प्रधानमन्त्रीले नै स्पष्ट जवाफ दिनुपर्ने बताएका छन्।

शुक्रबार बसेको प्रतिनिधिसभा बैठकमा बोल्दै सांसदहरूले संसदमा दर्ता भइसकेको विधेयकमाथि कुनै प्रकारको चलखेल स्वीकार्य नहुने बताए।

नेकपा सांसद वर्षमान पुनले आगामी आर्थिक वर्षका लागि प्रस्तुत विधेयकमा देखिएका कमजोरी स्वीकार गरेर सुधार गर्नुपर्ने धारणा राखे। उनले अर्थमन्त्रीको जवाफले जनप्रतिनिधि संस्थाको सम्मान घटाएको टिप्पणी गरे।

एमालेका सांसद गुरुप्रसाद बरालले विगतका सबै विषयमा छानबिन गर्न प्रतिपक्ष तयार रहेको उल्लेख गर्दै अर्थमन्त्री केवल जवाफ दिँदै उम्कन नपाउने बताए र छानबिन समिति गठनको माग दोहोर्‍याए।
कांग्रेसका सांसद भरतबहादुर खड्काले राष्ट्रियता सम्बन्धी विषयमा सत्तापक्ष र प्रतिपक्ष एकजुट हुनुपर्ने बताउँदै नेपाल–भारत सीमा समस्या यथाशीघ्र समाधान गर्न आग्रह गरे।

श्रम संस्कृति पार्टीका सांसद हर्कराज राईले सुस्तामा भारतीय सीमा सुरक्षा बलका कारण नेपाली प्रभावित भएको सूचना आएको उल्लेख गर्दै त्यस्ता गतिविधि रोक्न माग गरे। राष्ट्रिय प्रजातन्त्र पार्टीकी सांसद खुश्बु ओलीले पनि सीमा विवाद छिटो समाधान गर्न सरकारको ध्यानाकर्षण गराइन्

कैलाली,२९ जेठ । कैलालीको गोदावरीमा बाढीमा परी दुई महिलाको मृत्यु भएको छ।

जिल्ला प्रहरी कार्यालयका प्रहरी नायब उपरीक्षक योगेन्द्र तिमिल्सिनाका अनुसार गोदावरी नगरपालिका–४ की ५५ वर्षीया महेश्वरी धमला र ४० वर्षीया कल्पना साउदको ज्यान गएको हो।

शुक्रबार बिहान च्याउ खोज्न जङ्गल गएका उनीहरू नदीमा बगेर बेपत्ता भएका थिए। पछि उनीहरूको शव वनदेवी मन्दिर पछाडि फेला परेको प्रहरीले जनाएको छ।

दाङ,२९ जेठ। हाल नेपालमा उपल्लो वायुमण्डलमा रहेको पश्चिमी न्यून चापीय रेखा तथा स्थानीय वायुको प्रभाव रहेको मौसम पूर्वानुमान महाशाखाले जनाएको छ।

यसको प्रभावले गण्डकी, लुम्बिनी र कर्णाली प्रदेशसहित अधिकांश हिमाली तथा पहाडी भूभागमा सामान्य बदली भएको छ भने तराई क्षेत्रमा आंशिक बदली देखिएको छ। लुम्बिनी प्रदेशका केही स्थान तथा कोशी, बागमती र गण्डकी प्रदेशका एक–दुई स्थानमा हल्का वर्षा भइरहेको छ।

आज दिउँसो कोशी, मधेस र बागमती प्रदेशसहित हिमाली तथा पहाडी भूभागमा सामान्य बदली रहनेछ भने तराई क्षेत्रमा आंशिक बदली रहनेछ।

कोशी र मधेस प्रदेशका केही स्थान तथा बागमती, गण्डकी र लुम्बिनी प्रदेशका तराई क्षेत्रका एक/दुई स्थानमा चट्याङसहित मध्यम वर्षाको सम्भावना रहेको छ।

आज राति पनि कोशी प्रदेशसहित हिमाली तथा पहाडी भूभागमा सामान्य बदली रहनेछ भने मधेसलगायत तराई क्षेत्रमा आंशिक बदली रहनेछ।

कोशी, बागमती र गण्डकी प्रदेशका हिमाली तथा पहाडी भूभागका केही स्थान र तराई क्षेत्रका एक/दुई स्थानमा चट्याङसहित मध्यम वर्षा हुन सक्ने सम्भावना रहेको महाशाखाले जनाएको छ।

काठमाडौ,२८ जेठ । देशभरका १३ हजार ७३६ सामुदायिक विद्यालयमा १०० जनाभन्दा कम विद्यार्थी रहेको तथ्य सार्वजनिक भएको छ।

शिक्षा तथा खेलकुद मन्त्रालयले सार्वजनिक गरेको ‘शैक्षिक सूचना २०८२’ अनुसार यस्तो विद्यालयको संख्या कुल सामुदायिक विद्यालयको ५०.८६ प्रतिशत हो। यसले आधाभन्दा बढी सामुदायिक विद्यालयमा विद्यार्थी संख्या न्यून रहेको देखाएको छ।

हाल देशभर ३५ हजार ९५१ विद्यालय छन्। तीमध्ये २५ हजार ६२३ सामुदायिक र ८ हजार ९४१ संस्थागत (निजी) विद्यालय रहेका छन्। सबै विद्यालयमा गरी ७० लाख ४० हजारभन्दा बढी विद्यार्थी अध्ययनरत छन्।

विद्यार्थी संख्या कम भएका विद्यालयलाई एकीकृत गर्ने उद्देश्यले सरकारले विद्यालय समायोजन अभियान सञ्चालन गरिरहेको छ। अहिलेसम्म ६६२ सामुदायिक विद्यालय मर्ज भइसकेका छन्।
चालू आर्थिक वर्षमा समायोजनका लागि ४५ करोड रुपैयाँ प्रोत्साहन रकम विनियोजन गरिएको छ।

आगामी वर्षका लागि सामुदायिक विद्यालयको पूर्वाधार विकासमा १ अर्ब रुपैयाँ छुट्याइएको छ।
शिक्षा मन्त्रालयका प्रवक्ता महेन्द्र पराजुलीका अनुसार विद्यालय व्यवस्थापन स्थानीय तहको जिम्मेवारी भएकाले समायोजनसम्बन्धी विवरण माग गरिएको छ।

यस्तै, प्रधानाध्यापक सङ्घका अध्यक्ष सुदाम गौतमले शिक्षामा सुधारका लागि राष्ट्रिय नीति निर्माण र विद्यालयका लागि स्पष्ट मापदण्ड आवश्यक रहेको बताएका छन्।

कालीकोट,२८ जेठ । लगातारको वर्षासँगै आएको पहिरो र कटानका कारण कर्णाली करिडोरको कालीकोट खण्डमा सडक भासिँदा यातायात पूर्ण रूपमा अवरुद्ध भएको छ।

सडक भासिएर कर्णाली नदीतर्फ खसेपछि सडकका पर्खाल, ग्याबिन जाली लगायत संरचनामा क्षति पुगेको छ। अवरुद्धताका कारण यात्रु तथा मालवाहक सवारी साधन बाटोमै रोकिएका छन्।
यसले दैनिक उपभोग्य वस्तुको ढुवानी, बिरामी ओसारपसार तथा स्थानीय जनजीवनमा प्रत्यक्ष असर पारेको छ।

जिल्ला प्रहरी कार्यालय कालीकोटका सूचना अधिकारी प्रहरी निरीक्षक गणेश ज्ञवालीका अनुसार सडक खुलाउन स्काभेटर परिचालन गरी मर्मत कार्य भइरहेको छ। तर लगातारको वर्षाका कारण सडक सञ्चालनमा ल्याउन कठिनाइ भइरहेको उनले बताए।

रोल्पा,२८ जेठ । रोल्पामा मिनी ट्रक दुर्घटना हुँदा एक जनाको मृत्यु भएको छ भने चालक घाइते भएका छन्।

बिहीबार बिहान माडि गाउँपालिका–१ पात्लेस्थित बल्ले–झिनुवा भित्री सडकखण्डमा गुडिरहेको रा १ ख ३०४५ नम्बरको मिनी ट्रक दुर्घटनामा परेको हो।

जिल्ला प्रहरी कार्यालय रोल्पाका अनुसार बल्लेखोलाबाट आलु लिएर पोखरातर्फ जाँदै गरेको ट्रक गुडिरहेकै अवस्थामा अचानक सडक भासिँदा झण्डै ३० मिटर तल खसेको थियो।

दुर्घटनामा परी सल्यान बागचौर नगरपालिका–४ दुदिलाबोटका ४७ वर्षीय चन्द्रबहादुर बस्नेतको घटनास्थलमै मृत्यु भएको छ।

यस्तै, ट्रक चालक दाङ बबई गाउँपालिका–५ जौबारीका ४२ वर्षीय नोखिराम वली घाइते भएका छन्। उनको ढाडमा सामान्य चोट लागेको र अवस्था सामान्य रहेको प्रहरीले जनाएको छ। चालकलाई प्रहरीले नियन्त्रणमा लिएर घटनाबारे थप अनुसन्धान गरिरहेको छ।

दाङ,२८ जेठ ।बिहीवार सुनचाँदीको भाउ घटेको छ।
नेपाल सुनचाँदी व्यवसायी महासंघका अनुसार आज सुनको भाउ तोलामा ५ हजार १०० रुपैयाँले घटेर २ लाख ८६ हजार ७ सय रुपैयाँमा कारोबार भइरहेको छ।

यसअघि हिजो पनि सुनको भाउ तोलामा १० हजार १०० रुपैयाँले घटेर २ लाख ९१ हजार ८ सय रुपैयाँमा कारोबार भएको थियो।

त्यस्तै, चाँदीको भाउ पनि घटेको छ। हिजो तोलाको ४ हजार ७४० रुपैयाँमा कारोबार भएको चाँदी आज ९० रुपैयाँले घटेर ४ हजार ६५० रुपैयाँमा झरेको महासंघले जनाएको छ।