मुस्ताङ, १७ फागुन। कोरला नाका तीन दिनका लागि बन्द गरिने भएको छ। लोमान्थाङ गाउँपालिकास्थित नेपाल–चीन सीमा क्षेत्रको २४ नम्बर नाका तीन दिनका लागि बन्द गरिने भएको हो ।

फागुन २१ गते हुने प्रतिनिधिसभा सदस्य निर्वाचनका लागि कोरला नाका फागुन १८ गते राति १२ बजेदेखि २१ गते राति १२ बजेसम्म बन्द रहने जनाइएको छ। उक्त अवधिमा अत्यावश्यक सेवाबाहेक सबै प्रकारका आवागमन निषेध गरिने जिल्ला प्रशासन कार्यालय मुस्ताङले जनाएको छ।

समुद्री सतहदेखि ४ हजार ६५० मिटर उचाइमा अवस्थित कोरला नाका क्षेत्रका स्थानीयलाई समेत सो अवधिमा बस्तीमै बस्न अनुरोध गरिएको छ।

त्यसैगरी जोमसोम–कोरला ११० किलोमिटर सडकखण्ड पनि फागुन २० गते राति १२ बजेदेखि मतदान सम्पन्न नभएसम्म बन्द गरिने जनाइएको छ।

दाङ, १७ फागुन। इरानका सर्वोच्च नेता अयातोल्लाह अली खामेनीको मृत्यु भएको छ । अमेरिक र इजरायलले गरेको आक्रमणमा मृत्यु भएपछि इरान शोकमा डुबेको हो।

खामेनीको निधनपछि इरान सरकारले ४० दिन राष्ट्रिय शोक र ७ दिन सार्वजनिक बिदा घोषणा गरेको जनाएको छ।

यसैबीच उनको मृत्युपछि राजधानीसहित विभिन्न सहरमा नागरिकहरू सडकमा भेला भएका छन्। सामाजिक सञ्जालमा सार्वजनिक तस्बिरहरूमा नागरिकहरू रोइरहेका र शोक व्यक्त गरिरहेका देखिन्छन्।

प्रदर्शनमा सहभागीहरूले आक्रमणको बदला लिनुपर्ने भन्दै सरकारसमक्ष माग राख्दै नाराबाजी गरिरहेका छन्।

दाङ, १७ फागुन। नेपाली बजारमा आइतबार पनि सुनको मूल्य बढेको छ । साताको पहिलो दिन सुनको मूल्य ५ हजार ६ सय रुपैयाँले बढेको हो ।

नेपाल सुनचाँदी व्यवसायी महासंघका अनुसार आज छापावाला सुन तोलामा ५ हजार ६०० रुपैयाँले बढेर ३ लाख २० हजार ५०० रुपैयाँमा कारोबार भइरहेको छ। शुक्रबार सुन तोलाको ३ लाख १४ हजार ९ सय रुपैयाँमा कारोबार भएको थियो।

त्यस्तै, चाँदीको मूल्य पनि बढेको छ। आज चाँदी तोलामा ५ हजार ९ सय ८५ रुपैयाँमा कारोबार भइरहेको छ। शुक्रबार चाँदी तोलामा ५ हजार ७ सय ४० रुपैयाँमा कारोबार भएको थियो।

काठमाडौं,१६ फागुन । अमेरिकाबाट निष्कासित ९५ जना नेपाली नागरिक शनिबार बिहान स्वदेश फर्किएका छन्। उनीहरूलाई काठमाडौंस्थित त्रिभुवन अन्तर्राष्ट्रिय विमानस्थल मा अवतरण गरिएलगत्तै आवश्यक प्रक्रिया अघि बढाइएको छ।

विमानस्थल सुरक्षा कार्यालयका प्रमुख एसएसपी बसन्त रजौरेका अनुसार फिर्ता आएका सबै व्यक्तिको व्यक्तिगत विवरण संकलन गरिनेछ। त्यसपछि उनीहरूलाई नेपाल प्रहरीको मानव बेचबिखन अनुसन्धान ब्युरोको जिम्मा लगाइने तयारी गरिएको छ। प्रारम्भिक सोधपुछ र कागजी प्रक्रिया पूरा भएपछि परिवारको जिम्मा लगाइने जनाइएको छ।

गैरकानुनी रूपमा अमेरिका प्रवेश गरेका नेपालीलाई त्यहाँको सुरक्षा निकायले पक्राउ गरी निष्कासन गरेको बताइएको छ। एकैदिन यति ठूलो संख्यामा अमेरिकाले डिपोर्ट गरी नेपाल पठाएको यो पहिलोपटक भएको जनाइएको छ। यसअघि गएको माघ ५ गते ९१ जना नेपालीलाई एकैदिन डिपोर्ट गरिएको थियो।

फागुन१६ , काठमाडौं। नेपाल सरकारले नेपाली नागरिकलाई इजरायल र इरानको यात्रा नगर्न आह्वान गरेको छ। अवस्था सामान्य नहुँदासम्म यात्रा नगर्न आह्वान गरेको हो ।

परराष्ट्र मन्त्रालयले शनिबार जारी गरेको एडभाइजरीमा दुवै देशको स्थिति सामान्य नहुँदासम्म यात्रा स्थगित गर्न कडाइका साथ सुझाव दिइएको हो।

एडभाइजरीअनुसार, इजरायल वा इरान यात्रा गर्ने योजना बनाएका नेपाली नागरिकहरूले आफ्नो यात्रा स्थगित गर्नुपर्नेछ। मन्त्रालयले मध्यपूर्व क्षेत्रमा विकसित भइरहेको अवस्थालाई नजिकबाट अनुगमन गरिरहेको र हाल त्यहाँ रहेका नेपाली नागरिकहरूलाई सावधानी अपनाउन अनुरोध गरेको छ।

‘इजरायल र इरानद्वारा जारी सुरक्षा निर्देश कडाइका साथ पालना गर्नुहोस्, सकेसम्म घरभित्रै बस्नुहोस्, सतर्क रहनुहोस् र नेपाली समुदायसँग नियमित सम्पर्कमा रहनुहोस्,’ विज्ञप्तिमा उल्लेख छ।

मन्त्रालयले सम्बन्धित निकायहरूको पूर्वअनुमतिबिना इजरायल वा इरान यात्रा नगर्न पनि चेतावनी दिएको छ।

प्युठान ,१६ फागुन । प्युठानमा पिकअप गाडीले मोटरसाइकल र स्कुटरलाई ठक्कर दिँदा चारजना घाइते भएका छन्। चुनावी प्रचारप्रसारका लागि प्रयोग गरिएको गाडीले उनीहरूलाई ठक्कर दिएको हो ।

प्यूठान नगरपालिका स्थित बाग्दुला नजिकै
लु १ च ७७६९ नम्बरको पिकअप गाडीले मोटरसाइकल र स्कुटरलाई ठक्कर दिँदा उक्त दुर्घटना भएको हो।

घाइते हुनेमा मोटरसाइकल चालक प्यूठान–५ जुम्रीकाँडाका २० वर्षीय जीवन विश्वकर्मा र सोही मोटरसाइकलमा सवार २१ वर्षीय रेशम खड्का रहेको प्रहरीले जनाएको छ।

त्यसैगरी स्कुटर चालक लमही–६ देउपुर, दाङ बस्ने २६ वर्षीय दीपक पोख्रेल र उनका श्रीमती २५ वर्षीय सुजता भण्डारी पनि घाइते भएका छन्। प्रहरीका अनुसार घाइतेहरुको जिल्ला अस्पताल प्यूठानमा उपचार भइरहेको छ।

काठमाडौं,१६ फागुन। राष्ट्रिय प्राकृतिक स्रोत तथा वित्त आयोगले प्रदेश र स्थानीय तहमा जाने वित्तीय समानीकरण अनुदान कटौती नगर्न केन्द्र सरकारको ध्यानाकर्षण गराएको छ। आयोगको बैठकले यस्तो निर्णय गरेको हो।

चालु आर्थिक वर्षको प्रथम छ महिनामा सरकारले लक्ष्यअनुसार राजस्व सङ्कलन गर्न नसकेपछि केन्द्रले वित्तीय समानीकरण अनुदान कटौती गर्ने निर्णय गरेको थियो। गत माघ २७ गते महालेखा नियन्त्रक कार्यालयले सबै कोष तथा लेखा नियन्त्रक कार्यालयलाई परिपत्र गर्दै तेस्रो किस्तावापतको रकम कटौती गर्न निर्देशन दिएको थियो।

आयोगले वित्तीय समानीकरण अनुदानको परिमाण निर्धारण गर्ने संवैधानिक अधिकार आफूमा निहीत रहेको स्पष्ट पारेको छ। निर्णयमा भनिएको छ, “आर्थिक वर्ष २०८२र८३ का लागि सङ्घीय सञ्चित कोषबाट प्रदेश र स्थानीय तहलाई हस्तान्तरण गरिने अनुदान आयोगको सिफारिस अनुसार नै उपलब्ध गराउनुपर्नेछ।”

नेपालको संविधानको धारा ६० को उपधारा ९३० र धारा २५१ को उपधारा ९१० ले पनि वित्तीय हस्तान्तरणको सिफारिस गर्ने अधिकार आयोगलाई दिएको छ। आयोगले भने अनुसारको अनुदान कार्यान्वयन गर्न सरकारको ध्यानाकर्षण गराइएको छ।

सरकारले भने लक्षित राजस्व सङ्कलन नभएकाले अनुदान कटौती गर्नुपरेको जनाएको छ। पुस मसान्तसम्म १५ खर्ब ३३ अर्ब ४४ करोड ६९ लाख रुपैयाँ लक्ष्यमध्ये करिब पाँच खर्ब ८८ अर्ब ५१ करोड ४२ लाख ९३८।३८५० मात्र सङ्कलन भएको थियो।

गत आर्थिक वर्षमा पनि अनुदान कटौती हुँदा प्रदेश र स्थानीय तहले ठेक्का लागिसकेका तथा कार्यान्वयन भइसकेका योजना–कार्यक्रमको बजेट कटौती भएको भन्दै असन्तुष्टि जनाएका थिए। विरोधपछि महालेखा नियन्त्रक कार्यालयले तेस्रो किस्तामा केही रकम निकासा गरेको थियो। चौथो किस्तामा पनि कटौती हुँदा कुल वार्षिक बजेटको ९१।७६५ मात्र प्राप्त भएको थियो।

काठमाडौँ,१६ फागुन। इरानको राजधानी तेहरानको मध्य भागमा तीनवटा शक्तिशाली विस्फोटका आवाज सुनिएका छन्। तेहरानको रिपब्लिक स्क्वायर क्षेत्रमा कैयौँ क्षेप्यास्त्र प्रहार भएको र आकाशमा धुवाँको मुस्लो उठेको तस्बिरहरू सार्वजनिक भएका छन्।

इरानको राज्य समर्थित फार्स न्यूज एजेन्सीले उत्तरी र पूर्वी भागमा समेत थप विस्फोटका आवाज सुनिएको जनाएको छ। घटनासँगै इजरायलले इरानमाथि ‘प्रि-एम्प्टिभ’ (अग्रिम) आक्रमण सुरु गरेको घोषणा गरेको छ।

इजरायली रक्षामन्त्री इस्रायल काट्जले राष्ट्रविरुद्धको खतरालाई निस्तेज पार्न यो कदम चालिएको बताए। आक्रमणसँगै इजरायलभर ‘विशेष र स्थायी आपतकालीन अवस्था’ लागू गरिएको छ।

इरानले पनि जवाफी क्षेप्यास्त्र प्रहार गर्न सक्ने चेतावनी दिइसकेको छ। यो सैन्य टकराव अमेरिका र इरानबीच कूटनीतिक वार्ताका प्रयासकै बीच भएको बीबीसीले जनाएको छ।

इजरायली प्रधानमन्त्री बेन्जामिन नेतन्याहुले इरानको ब्यालेस्टिक क्षेप्यास्त्र कार्यक्रम आफ्नो देशका लागि ठूलो खतरा रहेको भन्दै कुनै पनि सम्झौता स्वीकार नगर्ने चेतावनी दिइसकेका छन्।

गत जुन महिनामा पनि इजरायलले इरानमाथि आक्रमण गर्दा ‘१२ दिने युद्ध’ सुरु भएको थियो। अहिले फेरि सुरु भएको आक्रमणले मध्यपूर्वमा ठूलो युद्धको खतरा बढाएको विश्लेषकहरूले जनाएका छन्।

काठमार्डाँ,१६ फागुन। बोलिभियाको प्रशासनिक राजधानी ला पाज नजिकै नगद बोकेको सैन्य कार्गो विमान अवतरणका क्रममा दुर्घटनाग्रस्त हुँदा कम्तीमा १५ जनाको मृत्यु भएको छ भने दर्जनौँ घाइते भएका छन्।

सी–१३० हर्कुलस विमान एल अल्टो अन्तर्राष्ट्रिय विमानस्थलमा अवतरण गर्ने क्रममा रनवेबाट बाहिर निस्केर व्यस्त एभिन्यूमा खसेको जनाइएको छ। स्थानीय सञ्चारमाध्यमले सार्वजनिक गरेको दृश्यमा विमानका भग्नावशेष सडकभर छरिएको, कार र ट्रकमा क्षति पुगेको देखिएको छ।

दुर्घटनापछि सडकमा छरिएको बैंकनोट सङ्कलन गर्न भीड जम्मा भएपछि स्थिति नियन्त्रणमा लिन प्रहरीले अश्रुग्यास प्रयोग गरेको थियो। पछि अधिकारीहरूले घटनास्थलमै आगो बालेर पैसा जलाएका थिए।

राष्ट्रिय दमकल विभागका कर्नल पावेल तोवरका अनुसार १५ देखि १६ जनासम्मको मृत्यु भएको पुष्टि गरिएको छ। स्वास्थ्य मन्त्रालयले कम्तीमा २८ जना घाइते भएको जनाएको छ। विमानस्थल परिसर र एभिन्यू दुवै स्थानमा मानवीय क्षति भएको बताइएको छ।

प्रत्यक्षदर्शीहरूले दुर्घटनाको बेला मौसम अत्यन्त खराब रहेको बताएका छन्। भारी असिना, वर्षा र बिजुली चम्किरहेका कारण अवतरण जटिल बनेको अनुमान गरिएको छ।

लकहिड मार्टिनद्वारा निर्मित उक्त विमान पूर्वी सहर सान्ता क्रुजबाट उडेको थियो। रक्षा मन्त्रालयका अनुसार विमानमा बोकेको बैंकनोटमा आधिकारिक क्रमिक नम्बर नभएको र त्यसको कानूनी मान्यता नरहेको उल्लेख गरिएको छ। त्यसको सङ्कलन वा प्रयोग अपराध हुने चेतावनी दिइएको छ।

दुर्घटनापछि लुटपाटको आशंकामा १२ जनालाई नियन्त्रणमा लिइएको ला पाज अभियोजकको कार्यालयले जनाएको छ। घटनापछि विमानस्थलको सञ्चालन अस्थायी रूपमा स्थगित गरिएको छ भने औपचारिक अनुसन्धान सुरु गरिएको छ।

दाङ,१६ फागुन । सिरहाको बरियारपट्टी गाउँपालिका–२ श्रीपुरका सत्यनारायण साफीले संघर्षपूर्ण यात्रापछि सेतो एप्रोन लगाएका छन् ।  सत्यनारायणले पुर्ण छात्रवृत्तिमा नाम निकालेपछि उनको सेतो एप्रोन लगाएर  पढ्ने चाहाउने इच्छा पुरा भएको हो।

दैनिक मजदुरी गर्दै तयारी गरेका उनले चिकित्सा शिक्षा आयोगको प्रवेश परीक्षामा पूर्ण छात्रवृत्तिमा नाम निकाल्दै राप्ती स्वास्थ्य विज्ञान प्रतिष्ठान दाङमा भर्ना भएका हुन्।
प्रतिष्ठानले दोस्रो वर्षका ५० विद्यार्थीका लागि आयोजना गरेको ‘ह्वाइट कोट सेरेमनी’ कार्यक्रममा सत्यनारायणसहित विद्यार्थीहरूलाई औपचारिक रूपमा सेतो कोट प्रदान गरिएको थियो।

कार्यक्रममा निमित्त उपकुलपति प्रा. श्याम लम्साल, निमित्त डिन प्राडा. रमेश कडेल र निमित्त अस्पताल निर्देशक प्राडा. जनार्दन पन्थीले सेतो एप्रोन प्रदान गर्दै चिकित्सा पेशाको मर्यादा, अनुशासन र नैतिकताबारे विद्यार्थीलाई मार्गदर्शन दिएका थिए।

दलित समुदायका सत्यनारायणको परिवारसँग साढे चार धुर घडेरीबाहेक अन्य सम्पत्ति छैन। उनका बुबा मधुरी साफी मजदुरी गर्दै परिवार चलाउँदै आएका छन्। पाँच सन्तानमध्ये जेठा सत्यनारायणले २०७७ मा एसईई उत्तीर्ण गरेपछि २०७९ मा विराटनगरबाट कक्षा १२ विज्ञान विषयमा उत्तीर्ण गरेका थिए।

एमबीबीएस पढ्ने लक्ष्य राखेका उनले आर्थिक अभावका कारण काठमाडौंमा लामो समय तयारी गर्न सकेनन्। गाउँ फर्किएपछि निर्माण क्षेत्रमा मजदुरी गर्दै स्वाध्ययनमार्फत तयारी गरेका थिए। बिहान काम र बेलुका ६–७ घण्टा अध्ययन गर्ने नियमित अभ्यासले उनलाई दोस्रो प्रयासमा छात्रवृत्तिमा नाम निकाल्न सफल बनायो।

भर्नाका लागि उनकी आमाले छिमेकीसँग ८० हजार रुपैयाँ सापटी लिएपछि गत ८ पुसमा उनी प्रतिष्ठानमा भर्ना भएका हुन्। छात्रवृत्तिमा अध्ययनको अवसर पाए पनि बसोबास, खानपान, यातायात र अध्ययन सामग्रीमा ठूलो खर्च लाग्ने भएकाले परिवारमा आर्थिक चुनौती कायम रहेको छ।

सेतो कोट ग्रहण गरेपछि सत्यनारायणले स्वास्थ्य सेवा क्षेत्रमा समर्पित भएर अध्ययन र सेवा गर्ने प्रतिबद्धता व्यक्त गरेका छन्।