काठमाडौँ,१५फागुन। बीबीसीले प्रसारण गरेको जेनजी आन्दोलसम्बन्धी भिडियो हटाउने तयारी भएको छ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले निर्वाचनको मुखमा बीबीसीले प्रशारण गरेको भिडियो हटाउन कूटनीतिक पहल थालिएको बताएका छन्।

शुक्रबार पत्रकारसँग कुरा गर्दै उनले उक्त भिडियो नेपाली कानुनअनुसार प्रत्यक्ष कारबाहीको दायरामा नपर्ने भएकाले कूटनीतिक माध्यमबाट हटाउने प्रयास सुरु गरिएको जानकारी दिए। “नेपाली कानुनअनुसार सो सामग्रीमाथि कारबाही गर्न नमिल्ने अवस्था रहेकाले कूटनीतिक पहलमार्फत सम्भव भएसम्म छिट्टै हटाउने प्रक्रिया अघि बढाइएको छ,” उनले भने।

भण्डारीले निर्वाचन आचारसंहिता उल्लङ्घनसम्बन्धी उजुरीहरूमा पनि तीव्र रूपमा कारबाही भइरहेको बताए। उनका अनुसार देशभरका १६५ निर्वाचन क्षेत्रमा परेका करिब १ हजार उजुरीमध्ये अधिकांशमाथि कारबाही भइसकेको छ। फागुन २० गतेभित्र बाँकी उजुरीको टुंगो लगाउने तयारी रहेको उनले स्पष्ट पारे।

यस्तै, फागुन १४ गते मात्रै २५ वटा उजुरीमाथि कारबाही प्रक्रिया अघि बढाइएको जानकारी दिँदै उनले अन्य उजुरी परेमा विश्लेषण, छानबिन र आवश्यक कारबाही गरिने बताए। निर्वाचनलाई निष्पक्ष र मर्यादित बनाउन आयोग प्रतिबद्ध रहेको उनको भनाइ छ।

दाङ, १५ फागुन । दाङमा निर्वाचनको मतपरिणामलाई डिजिटल प्रणालीबाट सार्वजनिक गर्ने तयारी थालिएको छ।लुम्बिनी प्रदेश निर्वाचन कार्यालय दाङले फागुन २१ गते हुने निर्वाचनको मतपरिणाम डिजिटल सञ्चार माध्यमबाट सार्वजनिक गर्ने तयारी गरेको जनाएको हो ।

शुक्रबार घोराहीमा सञ्चारकर्मीसँग आयोजित ‘निर्वाचन र आमसञ्चार’ विषयक छलफल कार्यक्रममा निर्वाचनका क्रममा रिपोर्टिङ कार्यलाई सहज बनाउँदै लुम्बिनी प्रदेशभरकै नतिजा डिजिटल माध्यमबाट उपलब्ध गराउने व्यवस्था मिलाइँदै गरिएको जानकारी गराइएको हो।

निर्वाचनको सुरक्षा संवेदनशीलता कायम राख्दै नागरिकको गोप्य मतदान अधिकार सुरक्षित हुने गरी रिपोर्टिङको वातावरण बनाइने बताइएको छ।

प्रदेश निर्वाचन कार्यालय दाङका सूचना अधिकारी गेहेन्द्र कवँरले दाङका तीनवटै निर्वाचन क्षेत्रसहित लुम्बिनी प्रदेशका १२ वटै जिल्लाको मतपरिणाम यथासक्य छिटो सार्वजनिक गर्ने तयारी भइरहेको जानकारी दिए।

कार्यक्रममा प्रमुख जिल्ला अधिकारी विश्वप्रकाश अर्यालले निर्वाचनका क्रममा मिलाइएको सुरक्षा व्यवस्थाबारे जानकारी गराएका थिए।

त्यसैगरी कार्यालय प्रमुख लालसिंह खड्का र सूचना अधिकारी कवँरले फागुन २१ गते हुने निर्वाचनको समग्र तयारीबारे प्रकाश पारेका थिए।

छलफलमा नेपाल पत्रकार महासंघ का निवर्तमान केन्द्रीय अध्यक्ष बिपुल पोख्रेल, दाङ शाखा अध्यक्ष सन्तोष सुवेदी, पूर्व अध्यक्ष प्रताप रेग्मी लगायतले निर्वाचनका क्रममा सहज रिपोर्टिङको व्यवस्था मिलाउँदै गोप्य मतदानको सुनिश्चितता हुने गरी मतदान स्थल व्यवस्थापन गर्नुपर्नेमा जोड दिएका थिए।

कार्यक्रमको सहजीकरण सूचना अधिकारी गेहेन्द्र कवँरले गरेका थिए।

दाङ,१५ फागुन। फागुन २१ गते हुने प्रतिनिधिसभा सदस्य निर्वाचनका लागि दाङमा कर्मचारी परिचालनको तयारी पूरा भएको छ। प्रदेश निर्वाचन कार्यालय दाङका अनुसार जिल्लाभरका ४ सय ८२ मतदान केन्द्रमा प्रत्येक केन्द्रमा ६ जनाका दरले २ हजार ८ सय ९८ जना कर्मचारी खटिनेछन्। त्यस्तै घोराही र तुलसीपुरस्थित कारागारमा स्थापना गरिएका दुई अस्थायी मतदान केन्द्रमा ३/३ जनाका दरले थप ६ जना कर्मचारी परिचालन गरिनेछ। यससँगै कुल २ हजार ८ सय ९८ कर्मचारी निर्वाचनमा सक्रिय रहनेछन्।

प्रत्येक मतदान केन्द्रमा एक जना मतदान अधिकृत, एक जना सहायक मतदान अधिकृत, तीन जना सहायक कर्मचारी र एक जना सहयोगी रहने व्यवस्था गरिएको छ। अस्थायी मतदान केन्द्रमा भने एक जना मतदान अधिकृत, एक जना सहायक मतदान अधिकृत र एक जना सहयोगी कर्मचारी खटाइनेछ।

निर्वाचनमा खटिने कर्मचारीलाई तालिम प्रदान गर्नुका साथै आवश्यक सामग्री वितरणको काम अन्तिम चरणमा पुगेको कार्यालयले जनाएको छ। जिल्लाका तीनवटै निर्वाचन क्षेत्रमा कर्मचारी व्यवस्थापन तथा मतदान केन्द्र निर्धारणको प्रक्रिया सम्पन्न भइसकेको छ।

निर्वाचनलाई शान्तिपूर्ण र व्यवस्थित बनाउन सुरक्षा सतर्कता पनि बढाइएको छ। जिल्ला सुरक्षा समितिका संयोजक तथा प्रमुख जिल्ला अधिकारी विश्वप्रकाश अर्यालका अनुसार नेपाली सेना, सशस्त्र प्रहरी, नेपाल प्रहरी र निर्वाचन प्रहरी परिचालन गरिएको छ। जिल्लाभर करिब साढे पाँच हजारभन्दा बढी सुरक्षाकर्मी परिचालन गरिएको छ।

दाङ,१५ फागुन । दाङमा मदिरा बिक्री वितरण र सेवनमा  रोक लगाइएको छ।  जिल्ला प्रशासन कार्यालय  दाङले प्रतिनिधिसभा निर्वाचनलाई लक्षित गर्दै उक्त कार्यमा रोक लगाएको हो।

शुक्रबार सहाय प्रमुख जिल्ला अधिकारी सावित्रा पुनले एक सूचना जारी गर्दै  प्रतिनिधिसभा सदस्य निर्वाचनलाई   स्वच्छ, निष्पक्ष, भयरहित र शान्तिपूर्ण वातावरणमा सम्पन्न गर्न जिल्लाभर मदिराजन्य पदार्थ बिक्री–वितरण तथा सेवनमा रोक लगाइएको जानकारी गराएकी हुन् ।

उक्त सूचनामा फागुन  २१ गते हुने निर्वाचनलाई लक्षित गर्दै  आज (फागुन १५) गतेदेखि अन्तिम मतपरिणाम घोषणा नभएसम्म दाङ जिल्ला भित्र सबै प्रकारका मादक पदार्थ बिक्री–वितरण तथा सेवन गर्न निषेध गरिएको जारी  सूचनामा उल्लेख छ।

प्रशासनले उक्त निर्णयको पूर्ण पालना गर्न सम्बन्धित सबै सरोकारवालासँग अनुरोध गरेको छ।

रुकुम पश्चिम,१५ फागुन ।आगामी प्रतिनिधिसभा निर्वाचनका लागि रुकुम पश्चिमबाट उम्मेदवारी दिएका जनार्दन शर्मा ले रुकुमलाई विकास र समृद्धिको नमुना जिल्ला बनाउने प्रतिबद्धता व्यक्त गरेका छन्।

प्रगतिशील लोकतान्त्रिक पार्टी का नेता शर्माले आफ्नो उम्मेदवारी पदका लागि नभई विकास, सुशासन र सामाजिक न्यायका लागि भएको बताएका छन्। सञ्चारकर्मीसँग कुरा गर्दै उनले रुकुमलाई देशकै नमुना जिल्ला बनाउने, गरिबी र बेरोजगारी अन्त्य गर्ने तथा सुशासनसहितको समाज निर्माण गर्ने लक्ष्यका साथ आफू चुनावी मैदानमा उत्रिएको बताए।

शर्माले रुकुमको भविष्य सुनिश्चित गर्न आम मतदातालाई समर्थनका लागि आह्वान गर्दै विकास र सामाजिक न्यायको एजेन्डा जिताउन आग्रह गरे। आफू साझा उम्मेदवारका रूपमा प्रस्तुत भएको उल्लेख गर्दै उनले विगतमा विभिन्न दललाई समायोजन गर्दै नेतृत्व गरेको अनुभव र गरिएका कामका आधारमा जनताको विश्वास पाएको दाबी गरे।

उनले आगामी दिनमा अन्य राजनीतिक तथा सामाजिक पक्षहरूको समेत समर्थन जुट्दै जाने विश्वास व्यक्त गरेका छन्।

काठमाडौं ,१५ फागुन । निर्वाचन आयोग ले जेन–जी आन्दोलनसम्बन्धी भिडियो डकुमेन्ट्री हटाउन प्रेस काउन्सिल नेपाल लाई पत्राचार गरेको छ।
बिबिसी वर्ड सर्भिसले तयार पारेको ‘सट लाइक द इनिमिजः इन्साइड नेपाल्स जेन–जी अपराइजिङ’ शीर्षकको वृत्तचित्रमा भदौ २३ र २४ गतेको आन्दोलन दबाउने क्रममा तत्कालीन प्रहरी महानिरीक्षक चन्द्रकुवेर खापुङले गोली चलाउने आदेश दिएको दाबी गरिएको छ।

कार्यवाहक प्रमुख निर्वाचन आयुक्त रामप्रसाद भण्डारीले बिहीबार काउन्सिललाई पत्र पठाउँदै उक्त डकुमेन्ट्री हटाउने प्रक्रिया अघि बढाउन आग्रह गरेका छन्। डकुमेन्ट्री नहटाए कारबाही गर्ने चेतावनीसमेत दिइएको छ। ४१ मिनेट ३० सेकेन्ड लामो भिडियोमा सुरक्षाकर्मीले अमानवीय बल प्रयोग गरेको उल्लेख छ।

निर्वाचनको पूर्वसन्ध्यामा मतदातालाई प्रभावित पार्ने उद्देश्यले भिडियो सार्वजनिक गरिएको आशंका आयोगले जनाएको छ। यस विषयमा नेपाल प्रहरी का प्रवक्ता प्रहरी नायब महानिरीक्षक अविनारायण काफ्ले ले डकुमेन्ट्रीमा उल्लेख गरिएको कागजात आधिकारिक नभएको बताएका छन्। उनले उक्त भिडियोलाई प्रहरीले गम्भीर रूपमा नलिएको र सार्वजनिक टिप्पणी गर्न आवश्यक नठानेको बताए।

काठमाडौँ,१५ फागुन । फागुन २१ गते हुने प्रतिनिधिसभा सदस्य निर्वाचनका लागि देशभरका १६५ निर्वाचन क्षेत्रमा दुई लाख २१ हजार कर्मचारी खटिने भएका छन्।

निर्वाचन आयोग का अनुसार ७७ जिल्लाका १६५ निर्वाचन क्षेत्रका २३ हजार ११२ मतदान केन्द्र र समानुपातिकतर्फ मात्र मतदान हुने १४३ अस्थायी केन्द्रमा कर्मचारी परिचालन गरिनेछ।

आयोगका सहायक प्रवक्ता प्रकाश न्यौपानेका अनुसार पाँच सयभन्दा बढी मतदाता भएका केन्द्रमा नौ जना र पाँच सयभन्दा कम मतदाता भएका केन्द्रमा आठ जना कर्मचारी खटाइने व्यवस्था गरिएको छ। मतदान अधिकृत र सहायक मतदान अधिकृतलाई प्रशिक्षण दिइसकेपछि अन्य कर्मचारीलाई सम्बन्धित केन्द्रमै प्रशिक्षण दिने तयारी गरिएको छ।

निर्वाचनका लागि आवश्यक सामग्री र मतपत्र बिहीबारसम्म देशभरका १६५ वटै निर्वाचन क्षेत्रमा पुगिसकेको आयोगले जनाएको छ।

दाङ,१५ फागुन । अख्तियार दुरुपयोग अनुसन्धान आयोग ले बाँकेको यातायात व्यवस्था कार्यालय नेपालगन्जका तत्कालीन प्रमुखसहित ३३ जनाविरुद्ध भ्रष्टाचार अभियोगमा विशेष अदालत मा मुद्दा दायर गरेको छ।

सवारी चालक अनुमतिपत्र (लाइसेन्स) परीक्षामा अनियमितता गरी आर्थिक लेनदेनका आधारमा अनुत्तीर्ण परीक्षार्थीलाई उत्तीर्ण गराएको आरोपमा बिहीबार मुद्दा दायर गरिएको हो।

आयोगका अनुसार तत्कालीन कार्यालय प्रमुख लोकबहादुर सुनार र रमेशबहादुर बुढाथोकी, निमित्त प्रमुख दिनेशसिंह ठाकुर र रविन्द्र केसीसहित विभिन्न कर्मचारीलाई प्रतिवादी बनाइएको छ।

यस्तै, जिल्ला ट्राफिक प्रहरी कार्यालय बाँकेका तत्कालीन प्रहरी निरीक्षक पुष्करराज पन्तसहित अन्य प्रहरी कर्मचारीसमेत मुद्दामा तानिएका छन्।

अनुसन्धानका क्रममा बिचौलिया र ड्राइभिङ सेन्टर सञ्चालकसँग मिलेमतो गरी कानुनी प्रक्रिया विपरीत काम गरिएको पाइएको आयोगले जनाएको छ। नक्कली परीक्षार्थी खडा गर्ने, अनुत्तीर्णलाई उत्तीर्ण गराउन डिजिटल अभिलेखमा फेरबदल गर्ने, रकम संकलन गरी बाँडफाँट गर्ने जस्ता कार्य भएको आरोप छ।

डिजिटल फरेन्सिक परीक्षण, बैंक स्टेटमेन्ट र ह्वाट्सएप संवादलाई प्रमाणका रूपमा लिइएको जनाइएको छ।
आरोपपत्रअनुसार शक्ति ठाकुरसँग सबैभन्दा बढी ५ करोड ४७ लाख ८६ हजार २४३ रुपैयाँ बिगो मागदाबी गरिएको छ।

त्यस्तै, रमेशबहादुर बुढाथोकीसँग ३ करोड ७८ लाख २ हजार ६१७ रुपैयाँ माग गरिएको छ। मामा भान्जा मोटर ड्राइभिङ ट्रेनिङ सेन्टरका सञ्चालक शरदकुमार गोराथोकी र न्यू स्वर्गद्वारी ड्राइभिङ सेन्टरका सञ्चालक चिरञ्जीवी पोख्रेललाई मतियारको रूपमा मुद्दा दायर गरिएको छ।

भ्रष्टाचार निवारण ऐन, २०५९ अनुसार सजाय, जरिबाना र बिगो जफतको माग गर्दै आयोगले आरोपपत्र पेश गरेको हो।

‘गुणस्तरीय र उपयोगी शिक्षामा प्रतिबद्ध’

दाङ ,१५ फागुन । लुम्बिनी स्मार्ट स्कुल दोघरेको प्रधानाध्यापक बामदेव सापकोटा नियुक्त भएका छन्। सञ्चालक समितिले प्रधानाध्यापकमा बामदेव सापकोटालाई नियुक्त गरेको हो।

अध्यक्ष मोहन सुनारले विद्यालयमा सापकोटालाई ५ बर्षको लागि प्रधानाध्यापकमा नियुक्त गरिएको जानकारी दिए । आजदेखि नै उनले प्रधानाध्यापकको कार्यभार सम्हालेका छन् ।

लुम्बिनी फ्युचर पाथ दाङद्वारा सञ्चालित लुम्बिनी स्मार्ट स्कुल दोघरेको शैक्षिक अवस्था र विद्यालयको बारेमा बिहीबार जानकारी गराइएको छ। पत्रकार सम्मेलनको आयोजना गरी विद्यालयको भवन सञ्चालन तथा शैक्षिक गतिविधिका बारेमा जानकारी गराइएको हो। शैक्षिक गतिविधिका बारेमा जानकारी गराउँदै प्रधानाध्यापक सापकोटाले पहिलोपटक जिल्लामा अभिभावकले खोजेजस्तो स्मार्ट स्कुल सञ्चालन गरिएको बताए

प्रधानाध्यापक सापकोटाले अभिभावकले चाहेअनुसारको पूर्णकालीन समयको शिक्षासमेत विद्यालय दिन तयार रहेको बताए।

विद्यार्थीको पढाइको बोझलाई हटाएर सिप सिक्दै र पढ्दै गर्ने अवस्था विद्यालयले सिर्जना गर्ने उनको भनाइ छ। आधा झोला पुस्तक बोकेर पुरा ज्ञान लिएर विद्यार्थीहरु फर्किने वातावरण विद्यालयले निर्माण गरेको उनले बताए ।
विद्यार्थीहरूलाई सीप सिकाइका लागि न्यूनतम दैनिक एक घण्टा श्रम र उत्पादनमा लगाउने तयारी समेत विद्यालयले गरेको सापकोटाले जानकारी दिए। उनले हरेक सिकाइलाई गतिविधि मार्फत पूर्णता दिने बताए। प्रत्येक कक्षा स्मार्ट कक्षाको रूपमा रूपान्तरण गरिएको र विद्यार्थीहरूलाई पढ्ने वातावरण कक्षाभित्र पूर्ण रुपमा रहेको बताए ।

पाठ्यक्रममा आधारित रहेर न्यूनतम शुल्कमा गुणस्तरीय तथा योग्य पठनपाठन सुरु गर्न लागिएको अध्यक्ष मोहन सुनारले जानकारी दिए । अध्यक्ष सुनारले दाङमै उत्कृष्ट विद्यालय बनाउने गरी आफूहरूले विद्यालय सञ्चालनमा ल्याएको र अभिभावकहरूको पूर्ण विश्वास रहेको बताए। कार्यक्रमको सञ्चालन कार्यक्रम संयोजक कमल भण्डारीले गरेका थिए।

काठमाडौँ,१४ फागुन। त्रिभुवन अन्तर्राष्ट्रिय विमानस्थलबाट ठूलो संख्यामा नेपाली राहदानीसहित एकजना पक्राउ परेका छन् । पक्राउ पर्नेमा ४५ वर्षीय तारा चन्द चौधरी पक्राउ परेका छन्। चौधरी नागार्जुन नगरपालिका–१ का बासिन्दा हुन्।

भुटान एयरलाइन्सको उडान बी३ ७७३ मार्फत दिल्ली जान लागेका चौधरीको गतिविधि शंकास्पद देखिएपछि विमानस्थल सुरक्षा कार्यालयको टोलीले उनलाई नियन्त्रणमा लिएको थियो। अन्तर्राष्ट्रिय उडानतर्फको ह्यान्ड ब्यागेज चेकिङ क्रममा एक्स–रे मेसिनमा उनको कालो झोलाभित्र लुकेको ४८ थान नेपाली राहदानी फेला परेको थियो।

बरामद गरिएका ती राहदानी कसका हुन् र कुन प्रयोजनका लागि दिल्ली लैजान खोजिएको हो त्यो खुल्न बाँकी रहेको प्रहरीले बताएको छ । पक्राउ परेका चौधरीलाई थप अनुसन्धान र कानुनी कारबाहीका लागि काठमाडौँ उपत्यका अपराध अनुसन्धान कार्यालय पठाइएको छ।