काठमाडौ,१५ वैशाख । इन्डोनेसियाको बेकासी क्षेत्रमा दुई वटा रेल एकआपसमा ठोक्किँदा १४ जनाको मृत्यु भएको छ भने ८४ जना घाइते भएका छन्।

स्थानीय समयअनुसार मंगलबार बेलुका करिब ८:५० बजे जकार्ता–बेकासी मार्गमा चल्ने लामो दूरीका रेलहरू ठोक्किँदा दुर्घटना भएको जनाइएको छ।

दुर्घटनापछि प्रबोवो सुबिआन्तोले अस्पताल पुगेर घाइतेहरूलाई भेट्दै समवेदना व्यक्त गरेका छन् र घटनाको छिटो अनुसन्धान गर्ने प्रतिबद्धता जनाएका छन्।

रेल अपरेटर केएआईका अध्यक्ष निर्देशक बबी रेसिडिनले १४ जनाको मृत्यु भएको पुष्टि गरेका छन्। मृतकको पहिचानका लागि प्रहरी अस्पतालमा राखिएको छ भने घाइतेहरूको विभिन्न स्वास्थ्य संस्थामा उपचार भइरहेको छ।

घटनाको कारणबारे रेल अपरेटर र राष्ट्रिय यातायात सुरक्षा समितिले अनुसन्धान गरिरहेको जनाइएको छ।

काठमाडौ,१३ वैशाख । स्विस अन्तर्राष्ट्रिय विमान सेवाको विमानको इन्जिनमा आगलागी हुँदा ६ जना घाइते भएका छन्। भारतीय सञ्चार माध्यमका अनुसार उडान भर्न लागेको विमान इन्दिरा गान्धी अन्तर्राष्ट्रिय विमानस्थलको धावनमार्गमै रहेका बेला इन्जिनमा आगलागी भएपछि उडान स्थगित गरिएको थियो।

दिल्लीबाट जुरिख जान लागेको उक्त विमानमा ४ शिशुसहित चालकदलका सदस्य र यात्रु गरी २३२ जना सवार थिए। आगलागी लगत्तै सबै यात्रुलाई सुरक्षित रूपमा बाहिर निकालिएको थियो।

घाइतेहरूलाई स्थानीय निजी अस्पतालमा भर्ना गरिएको जनाइएको छ।विमानस्थल प्रशासनका अनुसार घटनापछि पूर्ण आपतकाल घोषणा गरिएको थियो।

विमान सेवाका अनुसार चालकले सावधानी अपनाउँदै उडान रोकेर यात्रुहरूलाई बाहिर निकाल्ने निर्णय गरेका थिए। घटनाको थप अनुसन्धान भइरहेको जनाइएको छ।

काठमाडौ,१२ वैशाख । अमेरिकी सेन्ट्रल कमाण्डले आफ्नो एक युद्धपोतले इरानी झण्डा बोकेको जहाजलाई इरानी बन्दरगाहतर्फ जानबाट रोकेको जनाएको छ।

कमाण्डले सामाजिक सञ्जाल ‘एक्स’मार्फत जानकारी दिँदै यूएसएस राफेल पेराल्टा नामक गाइडेड मिसाइल डेस्ट्रोयरले शुक्रबार उक्त जहाज रोकेको उल्लेख गरेको छ। जहाज इरानतर्फ जाँदै गर्दा नियन्त्रणमा लिइएको जनाइएको छ।

यसअघि पनि अमेरिकी पक्षले नौसैनिक नाकाबन्दी सुरु भएदेखि हालसम्म ३४ वटा जहाजको मार्ग परिवर्तन गराइसकेको दाबी गरेको छ।

इरान र संयुक्त राज्य अमेरिकाबीच भएको पहिलो चरणको वार्ता निष्कर्षविहीन भएपछि अमेरिकी राष्ट्रपति डोनाल्ड ट्रम्पले इरानी बन्दरगाहमा नाकाबन्दी गर्ने घोषणा गरेका थिए।

यस कदमको इरानले कडा विरोध गर्दै यसलाई युद्धविराम उल्लंघन भएको जनाएको छ। प्रतिक्रिया स्वरूप इरानले रणनीतिक रूपमा महत्वपूर्ण होर्मुज जलसन्धि बन्द गर्ने निर्णय लिएको बताइएको छ।

काठमाडौ,१२ वैशाख। लामो समयदेखि युद्धमा रहेका युक्रेन र रूसबीच शुक्रबार ठूलो संख्यामा युद्धबन्दीहरूको आदानप्रदान गरिएको छ। दुवै पक्षले आफ्नो नियन्त्रणमा रहेका १९३–१९३ जना सैनिक तथा सुरक्षाकर्मीलाई रिहा गरेका छन्। यस मानवीय पहलमा संयुक्त राज्य अमेरिका र संयुक्त अरब इमिरेट्सले सहजकर्ताको भूमिका निर्वाह गरेका थिए।

युक्रेनी राष्ट्रपति भोलोडिमिर जेलेन्स्कीले सामाजिक सञ्जालमार्फत आफ्ना नागरिक स्वदेश फर्किएकोमा खुसी व्यक्त गर्दै यस प्रक्रियालाई निकै महत्वपूर्ण बताएका छन्। उनका अनुसार फर्किएकामध्ये सेना, सीमा सुरक्षा गार्ड र प्रहरी अधिकारीहरू छन्, जसमा केही घाइते पनि रहेका छन् भने केहीले रूसमा मुद्दासमेत खेपेका थिए।

युक्रेनका गुप्तचर प्रमुख किरिलो बुडानोभ र रूसी रक्षा मन्त्रालयले पनि यस जटिल प्रक्रियामा अमेरिका र यूएईको सहयोग रहेको स्वीकार गरेका छन्।

रिहा भएर फर्किएका कैदीहरू निकै भावुक देखिएका थिए। बसबाट ओर्लँदै गर्दा धेरैले आफ्नो देशको झण्डा ओढेका थिए र खुशीका आँसु झारेका थिए। तीन वर्षसम्म रूसी नियन्त्रणमा रहेका एक सैनिकले स्वदेश फर्किनु अझै विश्वास नलागेको प्रतिक्रिया दिएका छन्।

चार वर्षदेखि जारी यस युद्धमा दुवै देशबीच पटक–पटक युद्धबन्दी साटासाट हुँदै आएको छ। यसअघि पनि हजारौँको संख्यामा बन्दीहरू आदानप्रदान भइसकेका छन्।

काठमाडौ,१० वैशाख । इरानविरुद्धका सैन्य अभियान जारी रहेकै बेला इजरायलले उन्नत हवाई युद्धसामग्री खरिद प्रक्रिया अघि बढाएको छ। इजरायलको रक्षा मन्त्रालयले रक्षा कम्पनी एलबिट सिस्टम्सलाई करिब २० करोड अमेरिकी डलर बराबरको ठेक्का दिएको हो। उक्त सम्झौताअनुसार कम्पनीले आकाशबाट प्रहार गर्न सकिने उन्नत हतियार प्रणाली आपूर्ति गर्नेछ।

अन्तर्राष्ट्रिय सञ्चारमाध्यम अल जजीराका अनुसार एलबिट सिस्टम्सले विज्ञप्ति जारी गर्दै इजरायलको रक्षा मन्त्रालयसँगको लामो साझेदारीप्रति गर्व व्यक्त गरेको छ। कम्पनीले हवाई आक्रमणसम्बन्धी प्रविधिमा आफ्नो नेतृत्वसमेत दाबी गरेको छ।

उक्त प्रणाली इजरायली वायुसेनाको हवाई प्रभुत्व कायम राख्न सहयोगी हुने विश्वास गरिएको छ। इजरायलको रक्षा मन्त्रालयका अनुसार रक्षा खरिद निर्देशनालयमार्फत गरिएको यो सम्झौताको उद्देश्य हतियारमा आत्मनिर्भरता बढाउनुका साथै वर्तमान युद्ध अवस्था र भविष्यका सुरक्षा चुनौतीका लागि तयारी सुदृढ गर्नु रहेको इजरायलका रक्षामन्त्री इजरायल काट्जले बताएका छन् । उनले उक्त सम्झौता देशको हतियार आपूर्ति प्रणालीलाई अझ सुदृढ बनाउने रणनीतिक कदम भएको बताए ।

काठमाडौ,५ वैशाख । इरानले महत्वपूर्ण समुद्री मार्ग होर्मुज स्ट्रेट पुनः बन्द गरेको घोषणा गरेको छ। इरानले अमेरिकी नाकाबन्दी जारी रहेको र वार्ताका सर्तहरू उल्लंघन भएको आरोप लगाउँदै उक्त जलमार्गमा सैन्य नियन्त्रण कायम गरेको हो।

इस्लामिक रिभोल्युसनरी गार्ड कोर्प्सले जारी गरेको विज्ञप्तिअनुसार अब होर्मुज स्ट्रेट पूर्ण रूपमा इरानी सेनाको नियन्त्रणमा रहनेछ र जहाजहरूको आवतजावत रोकिएको छ।

इरानी पक्षका अनुसार अमेरिकाले आफ्ना बन्दरगाहमा नाकाबन्दी जारी राख्दै सहमतिविपरीत जहाजहरू रोकेको आरोप छ। केही समयका लागि जलमार्ग खुला गरिए पनि प्रतिबन्ध नहटेपछि इरानले पुनः कडा कदम चालेको जनाएको छ।

इरानले अमेरिकाले लगाएको प्रतिबन्ध नहटाएसम्म कुनै पनि जहाजलाई होर्मुज स्ट्रेटबाट आवतजावत गर्न नदिने स्पष्ट पारेको छ। विश्व व्यापारका लागि अत्यन्त संवेदनशील मानिने यो मार्ग बन्द हुँदा अन्तर्राष्ट्रिय आपूर्ति श्रृंखला प्रभावित हुन सक्ने चिन्ता बढेको छ।

यता डोनाल्ड ट्रम्पले इरानमाथिको नाकाबन्दी तत्काल नहट्ने अडान दोहोर्‍याएका छन्। उनले इरानसँग नयाँ सम्झौता नभएसम्म प्रतिबन्ध कायम रहने बताउँदै ‘इनरिच्ड युरेनियम’ सम्बन्धी विषयमा कडा चेतावनी दिएका छन्।

अन्तर्राष्ट्रिय समुदायले दुवै पक्षलाई संयम अपनाउन आग्रह गरिरहेको छ भने विश्लेषकहरूले बढ्दो तनावले क्षेत्रीय सुरक्षा र विश्व अर्थतन्त्रमा गम्भीर असर पार्न सक्ने बताएका छन्।

काठमाडौ,४ वैशाख । इन्डोनेसियाको बोर्नियो टापु स्थित घना जंगलमा निजी हेलिकप्टर दुर्घटना हुँदा चालक दलका दुई सदस्यसहित ६ जना यात्रुको मृत्यु भएको छ।

यातायात मन्त्रालयका अनुसार म्याथ्यू एयर नुसान्टारा स्वामित्वको हेलिकप्टरले पश्चिम कालिमान्टन प्रान्तमा उडान भरेको करिब पाँच मिनेटपछि हवाई यातायात नियन्त्रणसँग सम्पर्क गुमाएको थियो।

नागरिक उड्डयन महानिर्देशनालय का महानिर्देशक लुकमान एफ.लाइसाका अनुसार हेलिकप्टरमा एक मलेसियाली नागरिकसमेत सवार थिए।

सूचनाका आधारमा परिचालित संयुक्त खोज तथा उद्धार टोलीले दुर्घटनास्थल पत्ता लगाएको र हेलिकप्टरमा सवार सबै यात्रु तथा चालक दलका सदस्यको मृत्यु भएको पुष्टि गरिएको छ।

मृतकका शवहरू प्रान्तीय राजधानी पोन्टियानाक लगिएको जनाइएको छ। जनवरीमा सुलावेसी टापुमा भएको दुर्घटनामा १० जनाको ज्यान गएको थियो भने गत वर्ष सेप्टेम्बरमा दक्षिण कालिमान्टन मा भएको दुर्घटनामा ८ जनाको मृत्यु भएको थियो। साथै पपुवा जिल्लामा भएको अर्को दुर्घटनामा चार जनाको ज्यान गएको थियो।

काठमाडौ,३ वैशाख । चिनियाँ विदेशमन्त्री वाङ यीले अब्बास अराघची लाई हर्मुज जलमार्गमा सामान्य आवागमन पुनःस्थापित गर्न आग्रह गरेका छन्।

वाङले जलमार्गमा इरानको सार्वभौमसत्ता र सुरक्षाको सम्मान गरिनुपर्ने उल्लेख गर्दै अन्तर्राष्ट्रिय नेभिगेसनको स्वतन्त्रता पनि सुनिश्चित गर्नुपर्ने बताएका छन्। उनले यो मार्ग खुला हुनु सबै देशको हितमा हुने बताए।

चीनले युद्धविराम कायम राख्दै वार्ता पुनः सुरु गर्न समर्थन गरेको पनि वाङले बताएका छन्।
यसअघि डोनाल्ड ट्रम्प ले हर्मुज जलमार्ग सधैंका लागि खोल्ने बताएका थिए। उनले सामाजिक सञ्जालमार्फत विश्वका लागि यो आवश्यक कदम भएको उल्लेख गरेका छन्।

हर्मुज जलमार्ग विश्वको महत्त्वपूर्ण समुद्री मार्ग हो, जहाँबाट करिब २० प्रतिशत तेल र ग्यास आपूर्ति हुने गर्छ। अमेरिका र इजरायल को आक्रमणपछि इरानले यस क्षेत्रमा नाकाबन्दी लगाएपछि विश्व बजारमा तेल–ग्यासको मूल्य बढेको छ।

काठमाडौ,३० चैत। इरानले ५० भन्दा बढी ‘अमेरिकी गुप्तचर’ पक्राउ गरेको दाबी गरेको छ। शान्ति वार्ता असफल भएपछि गरिएको अपरेशनमा ती व्यक्तिहरू पक्राउ परेको इरानी अधिकारीहरूले बताएका छन्।

उनीहरूलाई शत्रु राष्ट्रसँग सहकार्य गरेको र सरकारविरोधी गतिविधिमा संलग्न रहेको आरोप लगाइएको छ।

बिबिसीका अनुसार, पक्राउ परेकाहरूले अमेरिका र इजरायल लाई संवेदनशील सूचना पठाएको आरोप छ।
उनीहरूबाट इलेक्ट्रोनिक उपकरण, हतियार र गोला-बारुद समेत बरामद भएको जनाइएको छ।

यसैबीच, गिलान प्रान्तमा इस्लामिक रिभोलुसनरी गार्ड्स कोर्प्स ले १०२ जनालाई पक्राउ गरेको दाबी गरेको छ। साथै, मोसाद सँग सम्बन्ध रहेको आरोपमा ४ जना पनि पक्राउ परेका छन्।

काठमाडौं,२९ चैत । अमेरिका–इरानबीच बढ्दो तनावका बीच कूटनीतिक वार्ताको प्रभावकारितामाथि प्रश्न उठ्न थालेको छ। जापानस्थित इरानी दूतावास जापान ले सैन्य आक्रमणबाट प्राप्त गर्न नसकिएका उद्देश्य कूटनीतिमार्फत थोपर्न नसकिने स्पष्ट पारेको छ।
इस्लामाबादमा हालै सम्पन्न वार्तापछि अन्तर्राष्ट्रिय स्तरमा धारणा तीव्र भइरहेका बेला इरानले आफ्नो अडान पुनः दोहोर्‍याएको हो।

दूतावासले सामाजिक सञ्जाल ‘एक्स’ मार्फत जारी गरेको वक्तव्यमा अमेरिकी उपराष्ट्रपति जेडी भान्स ले अघि सारेको ‘अन्तिम तथा उत्कृष्ट प्रस्ताव’ लाई एकपक्षीय भन्दै अस्वीकार्य ठहर गरेको छ। प्रस्ताव स्वभावतः पारस्परिक हुनुपर्ने उल्लेख गर्दै कुनै एक पक्षले दबाब सिर्जना गर्ने माध्यमका रूपमा प्रयोग गर्न नमिल्ने जनाइएको छ।

वक्तव्यमा भान्सको “इरानले हाम्रो सर्त स्वीकार नगर्ने छनोट गरेको छ” भन्ने अभिव्यक्तिलाई पनि अस्वीकार गर्दै यसलाई जबरजस्ती तर्कको संज्ञा दिइएको छ। दूतावासका अनुसार यस्तो धारणा अर्को पक्षलाई युद्धमैदानमा असफल भएका मागहरू स्वीकार गर्न बाध्य पार्ने प्रयास हो, जुन कूटनीतिक सिद्धान्तविपरीत छ।
इरानले पछिल्लो द्वन्द्वको सुरुआत आफूबाट नभएको दाबीसमेत गरेको छ। साथै, भान्सका अभिव्यक्तिले अन्तर्राष्ट्रिय समुदायमा थप गम्भीर बहस आवश्यक बनाएको उल्लेख गरिएको छ।

यसैबीच, अमेरिकी सेन्ट्रल कमान्ड ले आफ्ना युद्धपोत युएसएस फ्रान्क ई. पिटरसन (डिडिजी–१२१) र युएसएस माइकल मर्फी (डिडिजी–११२) होर्मुज जलडमरूमध्य पार गर्दै जलमार्ग सुरक्षासम्बन्धी अभियान सुरु गरेको जनाएको छ।

तर इरानले अमेरिकी दाबी अस्वीकार गर्दै उक्त क्षेत्रमा कुनै पनि अमेरिकी जहाज प्रवेश नगरेको जनाएको छ। इरानी सेनाको खताम अल–अन्बिया केन्द्रीय मुख्यालयका प्रवक्ताका अनुसार होर्मुज जलडमरूमध्यमा जहाजहरूको आवागमन इरानकै सशस्त्र बलको नियन्त्रणमा रहेको छ।

अमेरिका र इरानबीच बढ्दो आरोप–प्रत्यारोपले कूटनीतिक समाधानको सम्भावनालाई थप जटिल बनाउँदै लगेको विश्लेषण गरिएको छ।