रास्वपा तुलसीपुरको सभापतिमा पुनः भण्डारी

दाङ,१० जेठ । राष्ट्रिय स्वतन्त्र पार्टी (रास्वपा) तुलसीपुरको सभापतिमा पुनः जीवन भण्डारी चयन भएका छन्।

आइतबार तुलसीपुरमा सम्पन्न अधिवेशनले भण्डारीको नेतृत्वमा नयाँ कार्यसमिति चयन गरेको हो। समितिको सचिवमा पनि पुनः कमल बस्नेत चयन भएका छन्।

यद्यपि, उपसभापति र सहसचिव पद भने टुंगिन बाँकी रहेको छ। उपसभापतिमा निर्मला वली र शोभा धितालले दाबी गरेपछि सहमति जुट्न सकेको छैन।

त्यस्तै सहसचिव पदका लागि नेत्र भण्डारी, यज्ञमूर्ति भट्टराई र नरेन्द्र केसीलगायतको दाबी रहेको बताइएको छ।

तुलसीपुर नगर समितिमा कुल १४ सदस्यीय कार्यसमिति रहने व्यवस्था छ।