पाठ्यक्रम अद्यावधिकका लागि सुझाव संकलन

दाङ, २ असार । तुलसीपुर उपमहानगरपालिकाले स्थानीय पाठ्यक्रम अद्यावधिकको प्रक्रिया प्रारम्भ गरेको छ। पालिका भित्र रहेका विद्यालयहरूमा लागू गरिएको पाठ्यक्रममा देखिएका त्रुटिहरू सच्याउने, विषयवस्तुलाई व्यवस्थित तथा सरल बनाउने उद्देश्यले अद्यावधिक प्रक्रिया थालिएको हो।

यसै क्रममा सोमबार सञ्चारकर्मीहरूसँग बसेर सुझाव संकलन गरिएको छ। उपमहानगरपालिका अन्तर्गतको शिक्षा, युवा तथा खेलकुद शाखाले पाठ्यक्रम सुधारका लागि विभिन्न सरोकारवाला पक्षहरूसँग छलफल गर्दै सुझाव लिइरहेको छ।

वि।सं। २०७९ देखि पालिकाभित्रका सबै विद्यालयहरूमा कक्षा १ देखि ८ सम्मको स्थानीय पाठ्यक्रम लागू गरिएको थियो। तर कार्यान्वयनमा आएको पाठ्यक्रमले अझै पूर्णता नपाएको स्वीकार गर्दै शिक्षा शाखाका अधिकृत मान बहादुर खड्काले त्यसलाई प्रभावकारी बनाउने उद्देश्यले अद्यावधिक गर्न लागिएको जानकारी दिए।

शाखा प्रमुख चक्र बहादुर भण्डारीले हालको पाठ्यक्रममा रहेका त्रुटिहरू सच्याएर आगामी शैक्षिक सत्रदेखि सुधारिएको पाठ्यक्रम लागू गर्ने प्रतिबद्धता व्यक्त गरे। उनका अनुसार पाठ्यक्रममा अझै केही महत्वपूर्ण पक्षहरू समावेश हुन बाँकी रहेकाले सरोकारवालासँग परामर्श लिँदै अगाडि बढ्ने तयारी भइरहेको छ।

सञ्चारकर्मीहरूले पाठ्यक्रममा तुलसीपुरको ऐतिहासिक, सांस्कृतिक र सामाजिक पक्षलाई समेट्नुपर्नेमा जोड दिएका थिए। उनीहरूले विद्यार्थीलाई आफ्नो समुदाय, परम्परा र संस्कृति बारेमा सुसूचित बनाउने सामग्री समावेश गर्नुपर्ने सुझाव दिए। साथै पाठ्यक्रममा भाषिक शुद्धता कायम गर्नुपर्नेमा पनि विशेष ध्यान दिन आग्रह गरे।

कार्यक्रममा शिक्षा विज्ञ महेन्द्र भण्डारीले स्थानीय पाठ्यक्रमको प्रारूप प्रस्तुत गरेका थिए भने सहजीकरण शिक्षा शाखाका अधिकृत मान बहादुर खड्काले गरेका थिए।