बसको ठक्करबाट दुई भारतीयको मृत्यु

काठमाडौ,७ चैत । बसको ठक्करबाट दुई भारतीयको मृत्यु भएको छ। काठमाडौं महानगरपालिका–१२ भोटेबहालमा बसको ठक्करबाट दुई भारतीय नागरिकको मृत्यु भएको छ।

उपत्यका ट्राफिक प्रहरी कार्यालयका प्रवक्ता नरेशराज सुवेदीका अनुसार कालिमाटीबाट त्रिपुरेश्वरतर्फ जाँदै गरेको ओमजनता यातायातको बसले ठक्कर दिँदा उनीहरू गम्भीर घाइते भएका थिए।

मृत्यु हुनेमा ४५ वर्षीय पदम उपाध्याय र ३७ वर्षीय सतिशकुमार कुसवाह रहेका छन्। उनीहरूको राष्ट्रिय ट्रमा सेन्टरमा उपचारका क्रममा गएराति मृत्यु भएको प्रहरीले जनाएको छ।

बा ३–०१–००५ ख ९२९८ नम्बरको बसको ठक्करबाट घाइते भएका उनीहरूको उपचारका क्रममा ज्यान गएको हो।

घटनाबारे प्रहरी वृत्त कालिमाटीले अनुसन्धान गरिरहेको छ। प्रहरीले बस चालक दोलखा घर भई कपन बस्ने ३५ वर्षीय मानबहादुर बस्नेतलाई पक्राउ गरेको जनाएको छ।