करेन्ट लागेर एकजनाको मृत्यु, दुइजना घाइते

रुकुम पश्चिम,१३ असार। रुकुम पश्चिममा करेन्ट लाग्दा एकजनाको मृत्यु भएको छ । दुइजना घाइते भएका छन्।

बिहिबार बिहान करेन्ट लाग्दा जिल्लाको मुसीकोट नगरपालिका वडा नम्बर ८ घोरखानी निवासी ६७ वर्षीया झुपा देवी रोकाको मृत्यु भएकोे जिल्ला प्रहरी कार्यालय रुकुम पश्चिमका प्रहरी नायब उपरीक्षक नवराज पोखरेलले जानकारी दिए।

उनका अनुसार मकै गोड्न बारीमा गएको बेला लत्रिएको विद्युतको तारले रोकालाई करेन्ट लागेको थियो ।
करेन्ट लागेर सोही ठाउँका ६० वर्षीया सुशीला ओली र ३२ वर्षीया जमुना बुढाथोकी घाइते भएका छन्।

पोखरेलका अनुसार झुपालाई करेन्ट लागेपछि सुशीला र जमुना तान्न पुगेका थिए। सोही क्रममा उनीहरु घाइते भएका हुन् । घाइतेहरुको जिल्ला अस्पताल सल्लेमा उपचार भइरहेको छ।