सडकको अवस्था बुझेर मात्रै यात्रा गरौँ: प्रहरी

फाइल तस्वीर

काठमाडौं ,२७ असार । सडकको अवस्था बुझेर मात्रै यात्रामा निस्कन नेपाल प्रहरीले अनुरोध गरेको छ। मनसुनी वर्ष जारी रहेको र अधिकांश क्षेत्रका राजमार्गहरू अवरोध भइरहेको भन्दै सडकको अवस्था बुझेर मात्र यात्रा तय गर्न प्रहरीले अनुरोध गरेको हो।

केन्द्रीय प्रहरी प्रवक्ता एवं प्रहरी नायब महानिरीक्षक दानबहादुर कार्कीले यात्रुहरू बीच बाटोमै अलपत्र हुने अवस्था देखिएकाले सडकको अवस्था बुझेर मात्रै यात्रा गर्न सर्वसाधारणमा अनुरोध गरिएको बताए ।

प्रहरीका अनुसार मनसुनका कारण अविरल वर्षापछि विभिन्न स्थानमा आएको बाढी तथा पहिरोले सडक अवरुद्ध भएको ठाउँठाउँमा भत्किएका, भासिएकाले दर्जनौँ सडक अझै खुलेको छैन । वर्षा जारी रहेकाले थप अवरोधको सम्भावना कायमै हुँदा विशेष ख्याल गर्न प्रहरीले नागरिकहरूसँग आग्रह गरेको छ ।