सुनको मूल्य तोलामा तीन हजार रुपैयाँले घट्यो

काठमाडौँ,४ फागुन । स्थानीय बजारमा सोमबार सुनको मूल्यमा गिरावट आएको छ। नेपाल सुनचाँदी व्यवसायी महासंघका अनुसार आज सुन तोलामा तीन हजार रुपैयाँले घटेर प्रतितोला तीन लाख दुई हजार ८०० रुपैयाँमा कारोबार भइरहेको छ। हिजो सुनको मूल्य प्रतितोला तीन लाख पाँच हजार ८०० रुपैयाँ पुगेको थियो।

यसैगरी, आज चाँदीको मूल्य पनि घटेको छ। महासंघका अनुसार चाँदी तोलामा १२५ रुपैयाँले घटेर प्रतितोला चार हजार ८६० रुपैयाँ कायम भएको छ।