दाङ,८ फागुन । राष्ट्रिय प्रजातन्त्र पार्टी (राप्रपा) लुम्बिनी प्रदेशले राष्ट्रिय स्वतन्त्र पार्टी (रास्वपा)का अध्यक्ष रवि लामिछानेको दाङ आगमनका क्रममा तुलसीपुर उपमहानगरपालिका–स्थित वीरेन्द्र चोकमा रहेको राजा वीरेन्द्रको शालिकमाथि केही रास्वपा कार्यकर्ता उभिएको घटनाप्रति गम्भीर ध्यानाकर्षण भएको जनाएको छ।
प्रदेश सचिव राजेन्द्र अधिकारीद्वारा जारी प्रेस विज्ञप्तिमा उक्त घटनालाई ‘अपमानपूर्ण र अभद्र’ भन्दै घोर भर्त्सना तथा खेद प्रकट गरिएको उल्लेख छ। राप्रपाले कसैको आस्था र भावनामा चोट पुग्ने गतिविधि असह्य हुने जनाएको छ।
साथै, घटनाबारे रास्वपाले आफ्नो धारणा स्पष्ट पार्दै सार्वजनिक रूपमा माफी माग्नुपर्ने माग गरेको छ। यस्ता घटना पुनः नदोहोरिने प्रतिबद्धता गर्न पनि पार्टीले आग्रह गरेको छ।
विज्ञप्तिमा निर्वाचनको समयमा मतदाताले निर्धक्क रूपमा मतदान गर्न सक्ने वातावरण बनाउन सबै राजनीतिक दल जिम्मेवार हुनुपर्ने उल्लेख गरिएको छ।
स्वस्थ प्रतिस्पर्धाको वातावरण कायम राख्दै अन्य दलको आस्थामा चोट पुग्ने कुनै पनि गतिविधि नगर्न राप्रपाले सबै राजनीतिक दल र व्यक्तिहरूलाई अपिल गरेको छ।
प्रतिक्रिया दिनुहोस