पेट्रोलमा १० प्रतिशत इथानोल मिसाउने सरकारको तयारी

काठमाडौं,१० फागुन । सरकारले पेट्रोलमा १० प्रतिशत इथानोल मिसाउने नीति शीघ्र कार्यान्वयनमा ल्याउने तयारी गरेको छ। नेपाल आर्थिक पत्रकार समाजले आयोजना गरेको कार्यक्रममा उद्योग, वाणिज्य तथा आपूर्तिमन्त्री अनिलकुमार सिन्हाले ‘पेट्रोलमा इथानोल मिसाउने आदेश–२०८२’ स्वीकृत भइसकेको र छिट्टै राजपत्रमा प्रकाशित हुने जानकारी दिए।

उनका अनुसार १० प्रतिशत इथानोल मिश्रणबाट वार्षिक करिब ६ अर्ब रुपैयाँ बराबरको पेट्रोलियम आयात घटाउन सकिनेछ। यसले व्यापार घाटा कम गर्नुका साथै उखु उत्पादन, उद्योग स्थापना र रोजगारीमा टेवा पुग्ने अपेक्षा गरिएको छ।

नेपाल आयल निगमका कार्यकारी निर्देशक चण्डिकाप्रसाद भट्टले कार्यक्रम कार्यान्वयनमा १–१.५ वर्ष लाग्न सक्ने र गुणस्तर मापदण्ड तयार गरिँदै रहेको बताए।

सरकारले इथानोलको न्यूनतम मूल्य निर्धारण, गुणस्तर मापदण्ड तय र उत्पादनका लागि बोलपत्र आह्वान गर्ने तयारी गरेको जनाएको छ। निजी क्षेत्रले भने उद्योग स्थापना र स्पष्ट कार्यविधिको आवश्यकता औंल्याएको छ।