सामाजिक सञ्जालमा अफवाह फैलाउने ३२ जना पक्राउ

काठमाडौं,१९ फागुन । सामाजिक सञ्जालमार्फत अफवाह र भ्रम फैलाउने ३२ जनालाई प्रहरीले पक्राउ गरेको छ । निर्वाचन विरोधी गतिविधि, मतदाता भ्रमित पार्ने कार्य तथा आचारसंहिता उल्लङ्घनजस्ता घटनामा संलग्न रहेको आरोपमा नेपाल प्रहरी प्रधान कार्यालयअन्तर्गतको केन्द्रीय निर्वाचन सेलले उनीहरूलाई नियन्त्रणमा लिएको जनाएको छ ।

प्रहरीका केन्द्रीय प्रवक्ता तथा डिआइजी अबि नारायण काफ्लेका अनुसार प्रदेशगत विवरणअनुसार मधेश प्रदेशबाट ४ जना, बागमती प्रदेशबाट ४ जना, गण्डकी प्रदेशबाट १ जना, लुम्बिनी प्रदेशबाट ४ जना, कर्णाली प्रदेशबाट २ जना र सुदूरपश्चिम प्रदेशबाट १ जना पक्राउ परेका छन् । काठमाडौँ उपत्यकाबाट १६ जना नियन्त्रणमा लिइएको छ भने कोशी प्रदेशबाट हालसम्म कसैलाई पक्राउ गरिएको छैन ।

पक्राउ परेकामध्ये १७ जना छुटेका छन् भने १५ जनामाथि प्रचलित कानुनी व्यवस्थाबमोजिम थप अनुसन्धान प्रक्रिया अघि बढाइएको प्रहरीले जनाएको छ ।

निर्वाचनसम्बन्धी साइबर निगरानीलाई प्रभावकारी बनाउन केन्द्रीय संयन्त्रअन्तर्गत प्रदेशगत साइबर इकाइहरू परिचालन गरिएको प्रहरीले जनाएको छ ।