सांसद शपथबारे दलसँग छलफल गर्दै संसद सचिवालय

काठमाडौं,५ चैत । संघीय संसद सचिवालयले सांसदहरूको शपथग्रहणबारे ६ दलका प्रतिनिधिसँग छलफल गर्ने भएको छ।

सचिवालयले आज दिउँसो २ बजे दलका प्रतिनिधिलाई छलफलका लागि बोलाएको हो। फागुन २१ गते सम्पन्न प्रतिनिधि सभा निर्वाचनपछि ६ वटा राष्ट्रिय दल बनेका छन्।

यसैबीच निर्वाचन आयोगले पनि आजै राष्ट्रपतिलाई निर्वाचन प्रतिवेदन बुझाउने तयारी गरेको छ।
सचिवालयले आउँदो चैत १२ गते नवनिर्वाचित प्रतिनिधि सभा सदस्यहरूको शपथग्रहण गराउने तयारी गरिरहेको छ। सचिवालयका प्रवक्ता एकराम गिरीका अनुसार आवश्यक परे मिति अघि–पछि गर्न सकिनेछ।

सांसदहरूले शपथग्रहणको भाषा आफैं रोज्न सक्नेछन्। मातृभाषामा शपथ लिन चाहनेले त्यसको व्यहोरा तयार पारेर सचिवालयमा पेस गर्नुपर्ने व्यवस्था छ।

नवनिर्वित सांसदहरूलाई नयाँ संघीय संसद परिसरभित्रको एक हलमा शपथग्रहण गराउने तयारी गरिएको छ भने मुख्य बैठक कक्ष अझै तयार भइसकेको छैन।