दाङ,६ फागुन । तुलसीपुर उपमहानगरपालिका–१३ बखरियाबाट दुई जना बालक हराएका छन्। मंगलबार दिउँसोदेखि ११ वर्षीय सुजल बस्नेत र ६ वर्षीय तुफान बस्नेत सम्पर्कविहीन भएका हुन्।
सुजल चित्रबहादुर बस्नेतका छोरा हुन् भने तुफान टीका बस्नेतका छोरा हुन्। उनीहरू दाजुभाइका छोराहरू हुन्। घरसँगै जोडिएको बारीमा घाँस काट्न भनी निस्किएका बालकहरू घर नफर्किएपछि परिवारले खोजी थाले पनि अहिलेसम्म फेला पार्न सकेका छैनन्।
छोराहरू हराएपछि प्रहरीमा खोजीका लागि निवेदन दिइएको तुफानका बुवा टीका बस्नेतले जानकारी दिए। उनले बालकहरूलाई कतै देखेमा नजिकको प्रहरी कार्यालय वा परिवारलाई खबर गरिदिन सबैसँग आग्रह गरेका छन्।
दुवै बालक तुलसीपुरस्थित हिमाल एकेडेमीमा अध्ययनरत छन्। प्रहरीले घटनाबारे अनुसन्धान र खोजी कार्य जारी राखेको जनाएको छ।
प्रतिक्रिया दिनुहोस