काठमाडौं,६ फागुन । राष्ट्रिय स्वतन्त्र पार्टी (रास्वपा)की मधेस प्रदेश संस्थापक सभापति ममता शर्मा नेपाली कांग्रेस प्रवेश गरेकी छन्। बुधबार जनकपुरमा आयोजित कांग्रेसको प्रतिज्ञा सभामा उनी पार्टी प्रवेश गरेकी हुन्। उनलाई कांग्रेसका सभापति गगन थापाले स्वागत गरेका थिए।
शर्माले बुधबार मात्रै रास्वपा परित्याग गरेको घोषणा गरेकी थिइन्। उनी रास्वपाको महिला तथा सामाजिक विकास विभागकी सदस्यसमेत रहेकी थिइन्।
पार्टी प्रवेशसँगै उनले रास्वपामा विधि र प्रक्रिया नअपनाइएको आरोप लगाइन्।
साथै ‘दागैदाग भएकाहरूको बिगबिगी’ बढेकाले आफूले योगदानको कदर नपाएको दाबी गरिन्।
“रास्वपा पार्टीमा दागैदाग भएकाले टिकट पाएपछि आफूले गरेको योगदान खेर गएको महसुस भयो। त्यसैले उक्त पार्टी परित्याग गरी जेन–जीको भावना बोक्ने र सुशासनमा जोड दिने पार्टी नेपाली कांग्रेसमा प्रवेश गरेकी हुँ,” उनले भनिन्।
प्रतिक्रिया दिनुहोस