ट्रकको ठक्करबाट दुई जनाको मृत्यु

काठमाडौँ, १३ फागुन । ट्रकले मोटरसाइकललाई ठक्कर दिँदा हेटौँडा उपमहानगरपालिका–१९ बस्तीपुरमा दुई जनाको मृत्यु भएको छ। मृत्यु हुनेमा मकवानपुरको राक्सिराङ गाउँपालिका–१ काका २२ वर्षीय सन्जित स्याङतान र मोटरसाइकलमा पछाडि सवार १८ वर्षीय अमोश थिङ रहेका छन्।

जिल्ला प्रहरी कार्यालय मकवानपुरका प्रवक्ता प्रहरी उपरीक्षक पुष्कर बोगटी का अनुसार हेटौँडा बजारबाट मनहरीतर्फ जाँदै गरेको ना ४३ प २२१ नम्बरको मोटरसाइकललाई नेवारपानीबाट हेटौँडातर्फ जाँदै गरेको ग २ ख ८९८ नम्बरको मालवाहक ट्रकले ठक्कर दिएको हो।

ठक्कर दिएपछि फरार भएको ट्रक वीरगञ्जमा फेला परेको प्रहरीले जनाएको छ। जिल्ला प्रहरी कार्यालय पर्सा का अनुसार दुर्घटनामा ठोक्किएको भाग मर्मत गर्न पाटपुर्जा खोल्दै गरेको अवस्थामा ट्रक भेटिएको हो। ट्रक चालक भने फरार रहेको प्रहरीले जनाएको छ।