३३८ स्थानीय तहमा भू–उपयोग वर्गीकरण सम्पन्न

दाङ,११ जेठ । देशभरका ३३८ स्थानीय तहले भू–उपयोग वर्गीकरण सम्पन्न गरेका छन्। भू–उपयोग योजना तर्जुमा तथा कार्यान्वयन गर्ने उद्देश्यले गत चैत मसान्तसम्म ती स्थानीय तहले वर्गीकरणको काम सकेका हुन्।

उक्त स्थानीय तहहरूले आधार तथा मापदण्ड तयार गरी नक्सा अद्यावधिक गर्दै कित्तागत विवरणसमेत तयार गरेका छन्।

त्यस्तै, १६९ स्थानीय तहले आधार तथा मापदण्ड तयार गरी नक्सा अद्यावधिक गर्दै कित्तागत विवरण सङ्कलनको काम अघि बढाएका छन् भने विभिन्न कारणले ४७ स्थानीय तहले भने काम सुरु गर्न सकेका छैनन्।

यसैगरी, १५ स्थानीय तहले कृषि क्षेत्रको मापदण्ड तयार गरी विवरण तयार गरिसकेका छन्। १३४ स्थानीय तहले आधार तथा मापदण्ड तयार गरी नक्सा अद्यावधिक गर्ने काम गरिरहेका छन् भने ५० स्थानीय तहमा मापदण्ड तयार गर्ने काम जारी रहेको जनाइएको छ।

भूमि व्यवस्था, सहकारी तथा गरिबी निवारण मन्त्रालयका सहसचिव गणेशप्रसाद भट्टका अनुसार भू–उपयोग ऐन तथा नियमावलीले स्थानीय तहलाई भूमिको वर्गीकरण गर्ने अधिकार दिएको छ।
मन्त्रालयका अनुसार कृषि र गैरकृषि जग्गाको वर्गीकरण समयमै भएमा कृषियोग्य जमिनको संरक्षण, खण्डीकरण नियन्त्रण, चक्लाबन्दीमार्फत उत्पादन वृद्धि, खाद्य सुरक्षाको प्रत्याभूति तथा व्यवस्थित सहरीकरण र सुरक्षित आवास व्यवस्थापनमा सहयोग पुग्नेछ।

भू–उपयोग वर्गीकरणका लागि स्थानीय तहलाई आगामी असार मसान्तसम्मको समयसीमा तोकिएको छ।