दाङ,१६ जेठ । दाङमा विज्ञान लेखन तथा पत्रकारिता सम्बन्धी तीनदिने तालिम आजदेखि सुरु भएको छ।
विज्ञान, प्रविधि तथा नवप्रवर्द्धन मन्त्रालय र नेपाल पत्रकार महासंघ दाङ शाखाको संयुक्त आयोजनामा सुरु भएको तालिम जेठ १६, १७ र १८ गतेसम्म सञ्चालन हुनेछ। तालिममा दाङका विभिन्न सञ्चारमाध्यममा कार्यरत पत्रकारहरू र विज्ञान विषयमा अध्ययन/अध्यापनरत शिक्षक ,विद्यार्थीहरुको सहभागिता रहेको छ।
नेपाल पत्रकार महासंघ दाङ शाखाका अध्यक्ष सन्तोष सुवेदीको अध्यक्षता तथा प्रेस स्वतन्त्रता सेनानी सुशील गौतमको प्रमुख आतिथ्यतामा तालिम उद्घाटन गरिएको हो।
कार्यक्रममा बोल्दै गौतमले समाज रूपान्तरणका लागि राजनीति मात्र पर्याप्त नहुने बताए। उनले पछिल्लो समय विज्ञान र प्रविधिको भूमिका झन् महत्वपूर्ण बन्दै गएको उल्लेख गरे।
त्यस्तै, प्लानेटेरियम, वेधशाला तथा विज्ञान संग्रहालयका कार्यकारी निर्देशक सनतकुमार शर्माले विज्ञान पत्रकारिताको विकासका लागि तालिम आयोजना गरिएको जानकारी दिए। उनले विज्ञानसम्बन्धी विषयलाई प्रभावकारी रूपमा समाजसम्म पुर्याउन पत्रकारको भूमिका महत्वपूर्ण हुने बताए।
केन्द्रीय पत्रकारिता तथा आमसञ्चार विभाग, त्रिभुवन विश्वविद्यालयका प्रमुख प्रा. डा. कुन्दन अर्यालले पत्रकारितामा विषयगत विविधता आवश्यक रहेको बताए।
उनले राजनीति मात्र होइन, विज्ञान, प्रविधि लगायत अन्य क्षेत्रमा पनि विशिष्टीकृत रिपोर्टिङ गर्नुपर्नेमा जोड दिए। कार्यक्रमको सहजीकरण महासंघका सचिव जेएन सागरले गरेका थिए।
प्रतिक्रिया दिनुहोस