बस र टिपर ठोक्किँदा ११ जना घाइते

काठमाडौं,२४ असोज । पृथ्वी राजमार्ग अन्तर्गत गल्छी गाउँपालिका–७ भल्टारमा बस र टिपर ठोक्किँदा ११ जना यात्रु घाइते भएका छन्।

आज विहान करिब ९ बजेतिर नेपालगञ्जबाट काठमाडौंतर्फ जाँदै गरेको लु प्र ०१–००१ ख ०७६६ नम्बरको बस र विपरीत दिशातर्फ गइरहेको ना ८ ख २५९१ नम्बरको टिपर एक आपसमा ठोक्किएका हुन्।

दुर्घटनामा घाइते यात्रुहरूको उद्धार गरी नजिकैको स्मारिका फार्मेसी अस्पतालमा उपचारका लागि लगिएको जिल्ला प्रहरी कार्यालय धादिङका प्रवक्ता डीएसपी प्रकाश दाहालले जानकारी दिनुभयो। उहाँका अनुसार घाइतेहरूको अवस्था मध्यमदेखि सामान्य रहेको छ र गम्भीर घाइते कोही पनि छैन।

बस र टिपर दुबैलाई हटाइसकेपछि अहिले सडक आवागमन सामान्य बनेको प्रहरीले जनाएको छ।