काठमाडौ,२८ असार । पाठ्यक्रम विकास केन्द्र (सिडिसी) ले विद्यार्थीकेन्द्रित र युवामैत्री पाठ्यक्रम परिमार्जन प्रक्रिया अघि बढाएको छ। सिडिसीले विद्यालय शिक्षामा बालबालिकाको सिकाइ स्तर सुधार गर्ने उद्देश्यसहित उक्त प्रक्रिया अगाडी बढाएको हो।
२०७६ सालमा राष्ट्रिय पाठ्यक्रम प्रारूप कार्यान्वयनमा आएयता पाठ्यक्रम अद्यावधिक नभएको अवस्थामा बदलिँदो शैक्षिक आवश्यकता र समयअनुसार सुधार आवश्यक ठहरिएको हो।
यसैबीच, नयाँ सरकारी नीतिअनुसार विद्यालयमा दुई दिन बिदा र प्राथमिक तहमा आन्तरिक परीक्षा बन्देज लागू भएपछि पाठ्यक्रम, कक्षाको समय र क्रेडिट आवर पुनः समायोजन गर्नुपर्ने आवश्यकता औंल्याइएको छ।
यसका लागि शिक्षाविद् प्रा.डा. बालाचन्द्र लुइँटेलको संयोजकत्वमा पाठ्यक्रम परिमार्जन कार्यदल गठन गरिएको सिडिसीले जनाएको छ। कार्यदलले विज्ञ तथा सरोकारवालासँग छलफल गर्दै समयानुकूल, व्यवहारिक र गुणस्तरीय पाठ्यक्रम निर्माणमा जोड दिएको छ।
केन्द्रले ‘पाठ्यक्रम तथा यसको प्रभावकारी कार्यान्वयनसम्बन्धी अनुभव आदानप्रदान कार्यशाला’ आयोजना गरी अन्तर्राष्ट्रिय अभ्यास तथा स्वदेशी अनुभवबारे छलफलसमेत गरेको छ। छलफलमा दुई दिने बिदाको व्यवस्थाले शिक्षणसिकाइमा पार्ने प्रभाव, विद्यालय समय व्यवस्थापन तथा सिकाइ गुणस्तर अभिवृद्धिका उपायबारे विचार आदानप्रदान गरिएको थियो।
सरकारले प्रारम्भिक बालशिक्षादेखि कक्षा १२ सम्मकै पाठ्यक्रम परिमार्जन गर्ने योजना बनाएको छ। प्रक्रिया अनुसार पहिलो चरणमा जिल्लाबाट तथ्यांक संकलन, दोस्रो चरणमा टोली निर्माण, तेस्रो चरणमा स्थलगत अध्ययन र अन्तिम चरणमा प्रतिवेदन तयार पारिनेछ।
कार्यदलका संयोजक लुइँटेलका अनुसार विद्यालयस्तरमा देखिएका समस्या पहिचान गरी समाधानमुखी पाठ्यक्रम विकास गरिनेछ। साथै, सिकाइ क्षेत्र निर्धारण, राजनीतिक दलका घोषणापत्र अध्ययन तथा अन्तर्राष्ट्रिय अभ्यासको समावेशबाट सुधारोन्मुख पाठ्यक्रम तयार गरिने योजना छ। छलफलमा शिक्षा मन्त्रालय, शिक्षा तथा मानव स्रोत विकास केन्द्र, विभिन्न शैक्षिक निकायका प्रतिनिधि, प्रधानाध्यापक तथा शिक्षक गरी करिब ५० जनाको सहभागिता रहेको थियो।
पाठ्यक्रम विकास केन्द्रका महानिर्देशक युवराज पौडेलले गुणस्तरीय शिक्षा सुनिश्चित गर्न पाठ्यक्रम परिमार्जन अपरिहार्य भएको उल्लेख गरेका छन्।
प्रतिक्रिया दिनुहोस