प्युठानमा दम्पती हत्या : बारीमा भेटियो रगत लतपतिएको घन

प्युठान, ११ फागुन । प्युठानको माण्डवी गाउँपालिका-२ रातापानीमा एक दम्पतीको विभत्स हत्या भएको छ। अनुसन्धानको क्रममा प्रहरीको टोलीले घटनास्थल नजिकैको बारीमा रगत लतपतिएको घन फेला पारेको छ, जसले हत्याका लागि घन प्रयोग गरिएको आशंका गरिएको छ।

जिल्ला प्रहरी कार्यालय प्युठानका डीएसपी दिपेश बस्यालका अनुसार मृत भेटिएका ६० वर्षीय रामबहादुर परियार र उनकी ५६ वर्षीया श्रीमती हुकमा परियारको टाउकोमा गम्भीर चोट देखिएको छ। यसले हत्या निकै हिंसात्मक तरिकाले गरिएको संकेत गर्छ।

शनिबार दिउँसो साढे १२ बजेतिर छिमेकीले प्रहरीलाई खबर गरेपछि प्रहरी चौकी तिराम र जिल्ला प्रहरी कार्यालयको टोली घटनास्थल पुगेको थियो। प्रारम्भिक अनुसन्धानका क्रममा प्रहरीले बारीमा रगत लतपतिएको घन फेला पारेको छ, जसले घटनामा यही हतियार प्रयोग गरिएको हुनसक्ने आशंका प्रहरीको छ।

प्रहरीले घटनास्थललाई सिल गरेर थप अनुसन्धान गरिरहेको छ। हालसम्म हत्याको कारण खुल्न सकेको छैन भने संलग्न व्यक्तिको खोजी कार्य जारी छ। घटनाबारे थप अनुसन्धान भइरहेको प्रहरीले बताएको छ।