अलास्कामा ७.३ म्याग्निच्युडको भूकम्प

काठमाडौँ,१ साउन । अमेरिकी राज्य अलास्काको तटमा बुधबार ७ दशमलव ३ म्याग्निच्युडको भूकम्प गएको छ।
भूकम्पपछि अलास्काको तटीय क्षेत्रमा सुनामी चेतावनी जारी गरिए पनि केही घण्टामै फिर्ता लिइएको अमेरिकी भूगर्भीय सर्वेक्षणले जनाएको छ।

भूकम्प स्यान्ड पोइन्ट टापु नजिकै, समुद्र सतहबाट करिब १२ माइल गहिराइमा गएको हो। भूकम्प स्थानीय समय दिउँसो करिब १२ः३७ बजे (२०ः३७ जिएमटी )गएको थियो । यसको केन्द्रविन्दु स्यान्ड पोइन्ट टापुको सहरबाट करिब ५४ माइल (८७ किलोमिटर) दक्षिणमा अवस्थित थियो । भूकम्पपछि ५.२ म्याग्निच्युडसम्मका पराकम्पनहरू पनि मापन गरिएको छ।

स्यान्ड पोइन्टमा ६ सेन्टिमिटर जतिको सानो सुनामी देखिए पनि ठूलो क्षतिको रिपोर्ट छैन। अलास्का भूकम्पीय रूपमा सक्रिय क्षेत्र रिङ अफ फायर मा पर्ने भएकाले यस्ता घटनाहरू बारम्बार हुने गरेका छन्।