जापानको पहिलो महिला प्रधानमन्त्री

काठमाडौ,४ कार्तिक ।जापानले इतिहास रचेको छ । देशले पहिलोपटक महिला प्रधानमन्त्री पाएको छ। लिबरल डेमोक्रेटिक पार्टी (एलडीपी)की अध्यक्ष सानाई टाकाची जापानको प्रधानमन्त्रीमा निर्वाचित भएकी छन्। मंगलबार संसदको तल्लो सदनले उनलाई प्रधानमन्त्रीमा चयन गरेको हो।

जापानको सबैभन्दा ठूलो दल एलडीपीले जापान इन्नोभेसन पार्टीसँग गठबन्धन गरी नयाँ सरकार गठन गर्न लागेको छ।

६४ वर्षीया टाकाची एक महिनाअघि मात्र पार्टीको अध्यक्षमा नियुक्त भएकी थिइन्। उनले आजै मन्त्रिपरिषद् गठनको तयारी गरिरहेको जापानी सञ्चारमाध्यमहरूले जनाएका छन्।

टाकाचीको यो प्रधानमन्त्री बन्ने तेस्रो प्रयास हो। ‘स्क्यान्डल’ले ग्रस्त एलडीपीले पछिल्लो पाँच वर्षमा चार प्रधानमन्त्री देखिसकेको छ। अब उनीसामु सुस्त अर्थतन्त्रलाई गतिशील बनाउने, अमेरिका–जापान सम्बन्ध सन्तुलित राख्ने र आन्तरिक द्वन्द्वले कमजोर बनेको पार्टीलाई एकजुट गर्ने जस्ता चुनौतीहरू छन्।