तुलसीपुरमा दुई हजारभन्दा बढी किशोरीलाई एचपीभी खोप लगाइँदै

दाङ,२६ माघ । तुलसीपुर उपमहानगरपालिकामा दुई हजारभन्दा बढी किशोरीलाई एचपीभी ९ह्युमन प्यापिलोमा भाइरस० विरुद्धको खोप लगाइने भएको छ । सोमबार तुलसीपुरमा आयोजित पालिकास्तरीय विद्यालय केन्द्रित एचपीभी खोप अभियान सञ्चालन तथा व्यवस्थापनसम्बन्धी अन्तरक्रिया कार्यक्रममा जनस्वास्थ्य प्रवर्द्धन शाखाले उक्त जानकारी दिएको हो ।

जनस्वास्थ्य प्रवर्द्धन शाखाका जनस्वास्थ्य अधिकृत विमल केसीका अनुसार यस वर्ष उपमहानगरपालिकाभित्र कक्षा ६ मा अध्ययनरत २ हजार १ सय २४ जना र विद्यालय बाहिर रहेका ४९ जना गरी कुल २ हजार १ सय ७३ किशोरीलाई खोप लगाउने लक्ष्य राखिएको छ । गत वर्ष तुलसीपुरमा १० हजार १ सय ६१ जना किशोरीले एचपीभी खोप लगाएका थिए ।

खोप अभियान माघ २८ गतेदेखि फागुन १ गतेसम्म सञ्चालन हुनेछ । उपमहानगरपालिकाका १९ वटै वडामा रहेका १ सय खोप केन्द्रबाट सेवा दिइने जनाइएको छ । यस वर्ष कक्षा ६ मा अध्ययनरत किशोरी, गत वर्ष छुटेका लक्षित उमेर समूहका, हाल कक्षा ७ देखि १० सम्म अध्ययनरत छात्रा तथा विद्यालय बाहिर रहेका ११ देखि १४ वर्ष उमेर समूहका किशोरीलाई प्राथमिकताका साथ खोप लगाइनेछ । यसअघि एचपीभी खोपको एक मात्रा लगाइसकेकाले पुनः खोप लगाउन नपर्ने जनस्वास्थ्य अधिकृत केसीले जानकारी दिए।

यस वर्ष सबैभन्दा धेरै वडा नम्बर ६ मा ५ सय ८९ जना किशोरीलाई खोप लगाइनेछ । उक्त वडामा तीन दिनसम्म खोप कार्यक्रम सञ्चालन हुने जनाइएको छ ।

पालिकास्तरीय खोप समन्वय समितिका अध्यक्ष तथा तुलसीपुर उपमहानगरपालिकाका नगर प्रमुख टिकाराम खड्काले एचपीभी खोपले किशोरीलाई पाठेघरको मुखको क्यान्सरबाट जोगाउन महत्वपूर्ण भूमिका खेल्ने भएकाले अभिभावक र सरोकारवालाले अनिवार्य रूपमा खोप लगाउन प्रेरित गर्नुपर्ने बताए।

कार्यक्रममा नगर उपप्रमुख स्यानी चौधरी, शिक्षा महाशाखा प्रमुख चक्रबहादुर भण्डारी, नेपाल पत्रकार महासंघ दाङ शाखाका उपाध्यक्ष ओपेन्द्र बस्नेत, पत्रकार सुनिलकुमार पोखरेल लगायतले अभियानमा ढुक्क भएर सहभागी हुन आग्रह गरे ।
स्वास्थ्य विज्ञहरूका अनुसार एचपीभी भाइरसका कारण पाठेघरको मुखको क्यान्सर, यौनाङ्गसम्बन्धी क्यान्सर तथा यौन सम्पर्कबाट सर्ने विभिन्न रोग हुने भएकाले यो खोप अत्यन्त प्रभावकारी मानिन्छ । सानै उमेरमा खोप लगाउँदा शरीरमा बलियो प्रतिरक्षा प्रणाली विकास हुने र भविष्यमा क्यान्सरको जोखिम न्यून हुने बताइएको छ ।

स्वास्थ्य कार्यालय दाङका फोकल पर्सन भानुज्योति वलीको विषय प्रवेशबाट सुरु भएको कार्यक्रमको सहजीकरण जनस्वास्थ्य अधिकृत केसीले गरेका थिए।