कार्यसम्पादन मूल्यांकनमा राप्ती गाउँपालिका पहिलो: राजपुर सबैभन्दा कमजोर

दाङ,१ फागुन । दाङका १० स्थानीय तहमध्ये कार्यसम्पादन मूल्यांकनमा राप्ती गाउँपालिका पहिलो भएको छ। यस वर्ष राप्तीले ७७.४६ अंक प्राप्त गर्दै जिल्ला प्रथम स्थान हासिल गरेको हो। गत वर्ष पनि राप्तीले ६७.३ अंकसहित पहिलो स्थान कायम गरेको थियो।

राष्ट्रिय प्राकृतिक स्रोत तथा वित्त आयोग ले विभिन्न १७ सूचकका आधारमा गरेको मूल्यांकनअनुसार शान्तिनगर गाउँपालिकाले ६९.८४ अंकसहित दोस्रो स्थान हासिल गरेको छ। ६४.१८ अंक प्राप्त गर्दै लमही नगरपालिका तेस्रो भएको छ भने बंगलाचुली गाउँपालिका ६२.५७ अंकसहित चौथो स्थानमा रहेको छ। तुलसीपुर उपमहानगरपालिकाले ६१.५३ अंकसहित पाँचौं स्थान प्राप्त गरेको छ।

घोराही उपमहानगरपालिकाले ६१.०८ अंक ल्याएर छैठौं स्थान हासिल गर्दा दंगीशरण गाउँपालिका ६०.९७ अंकसहित सातौं भएको छ। बबई गाउँपालिकाले ६०.८६ अंकसहित आठौं स्थान ओगटेको छ भने गढवा गाउँपालिका ५८.९५ अंकसहित नवौं स्थानमा रहेको छ।

यस वर्ष ४९.१७ अंक मात्रै प्राप्त गर्दै राजपुर गाउँपालिका जिल्लाकै सबैभन्दा कमजोर देखिएको छ।
वित्तीय हस्तान्तरण सिफारिसका लागि महत्वपूर्ण मानिने कार्यसम्पादन मूल्यांकनमा दाङका अधिकांश पालिकाको नतिजा अपेक्षाकृत सन्तोषजनक देखिएको छैन। केही पालिकाले सुधार गरे पनि कतिपयले अघिल्लो वर्षभन्दा कम अंक प्राप्त गरेका छन्।

आयोगले स्थानीय तहको कार्यसम्पादन मापनका लागि सेवा प्रवाह, वित्तीय व्यवस्थापन, पारदर्शिता, योजना कार्यान्वयनलगायत १७ वटा सूचकलाई आधार मानेको जनाएको छ।