प्रेम विवादका कारण १६ वर्षीय किशोरको हत्या

दैलेख,१ फागुन । दैलेखमा १६ वर्षीय किशोरको हत्या भएको छ। दैलेखको दुल्लू नगरपालिका–४ शान्तिबजारका प्रकाश खनालको चक्कु प्रहारबाट मृत्यु भएको हो ।

प्रहरीका अनुसार फुटबल खेलेर घर फर्किँदै गरेका खनाललाई पछाडिबाट पेटमा चक्कु प्रहार गरिएको थियो। गम्भीर घाइते भएका उनलाई उपचारका लागि दुल्लू अस्पताल लगिएकोमा उपचारकै क्रममा मृत्यु भएको हो।

एउटै किशोरीलाई मन पराउने विषयमा भएको विवादका कारण घटना भएको प्रारम्भिक अनुसन्धानबाट खुलेको प्रहरीले जनाएको छ। घटनामा संलग्न रहेको आरोपमा १९ वर्षीय मुकुन्द शाही र विभूषण शाहीलाई चामुण्डाको जंगल क्षेत्रबाट पक्राउ गरिएको छ।

जिल्ला प्रहरी कार्यालय दैलेखका डीएसपी गणेशबहादुर बरालले घटनाबारे थप अनुसन्धान भइरहेको जानकारी दिएका छन्।