सेनाको बस दुर्घटना: २४ घाइते

काठमाडौं,६ फागुन । नेपाली सेनाको बस भोजपुर नगरपालिका–३ स्थित सेतीबगर नजिकै दुर्घटनामा परेको छ। निर्वाचन सुरक्षाका लागि खटिएको सेनालाई लिएर जाँदै गरेको ना ४ ख ७३१७ नम्बरको बस सडकबाट तल खसेको हो। बसमा २४ जना सेना र चालकसहित २६ जना सवार रहेका थिए।

दुर्घटनामा परी २४ जना घाइते भएका छन्। जिल्ला प्रहरी कार्यालय भोजपुरका प्रमुख प्रहरी नायव उपरीक्षक राजु लामाका अनुसार बस सडक नजिकैको घुम्तीबाट तल खसेको हो।

गम्भीर घाइते ८ जनालाई सेनाका दुई वटा हेलिकप्टरमार्फत थप उपचारका लागि काठमाडौं पठाइएको नेपाली सेनाले जनाएको छ।
पश्चिम टेम्केमैयुङ गाउँपालिकामा निर्वाचन सुरक्षा तयारीका लागि भोजपुरस्थित नयाँ श्रीनाथ गणबाट सेना खटिएको थियो।

अन्य घाइतेहरूको उपचार जिल्ला अस्पताल भोजपुरमा भइरहेको प्रहरीले जनाएको छ।