इरानविरुद्ध ट्रम्पको चेतावनी: अमेरिकी सैनिकको मृत्युको बदला लिने

काठमाडौ,१८ फागुन । डोनाल्ड ट्रम्पले इरानी शासनविरुद्ध कडा सैन्य कारबाहीको चेतावनी दिएका छन्। उनले अमेरिकी सैनिकहरूको मृत्युको बदला लिने घोषणा समेत गरेका छन्।

सामाजिक सञ्जाल ट्रुथ सोसियलमा भिडियो सन्देश जारी गर्दै ट्रम्पले इरानमाथि अहिलेसम्मकै कठोर प्रहार गरिने बताएका हुन्।

आफ्नो सम्बोधनमा उनले अमेरिका एक विशाल सैन्य अभियान सुरु गर्ने तयारीमा रहेको जानकारी दिए। उक्त अभियान वर्तमान सुरक्षाका लागि मात्र नभई भावी पुस्ताको सुरक्षाका लागि समेत आवश्यक भएको उनको दाबी छ।

“हामी यो ठूलो अभियान सञ्चालन गर्दैछौं, जुन हाम्रो समय र स्थानको सुरक्षाका लागि मात्र होइन, हाम्रा छोराछोरी र उनीहरूका सन्तानका लागि पनि हो,” ट्रम्पले भने।

इरानलाई कट्टरपन्थी तथा आतंकवादी शासनको संज्ञा दिँदै उनले आणविक हतियारयुक्त इरानबाट अमेरिकी नागरिकलाई जोगाउन कडा कदम अनिवार्य भएको तर्क गरेका छन्।