समानुपातिक मतगणनाका लागि प्रतिनिधि खटाउन कांग्रेसको निर्देशन

काठमाडौं ,२३ फागुन । नेपाली कांग्रेसले प्रतिनिधि सभा सदस्य निर्वाचनको समानुपातिकतर्फको मतगणनाका लागि आफ्ना प्रतिनिधिहरू खटाउन मातहतका समितिहरूलाई निर्देशन दिएको छ ।

पार्टीको केन्द्रीय कार्यालयले एक पत्र जारी गर्दै देशभरका जिल्ला कार्यसमिति तथा १६५ वटै निर्वाचन क्षेत्रीय कार्यसमितिलाई मतगणना प्रतिनिधि व्यवस्थापन गर्न निर्देशन दिएको हो ।

कृष्णप्रसाद दुलालद्वारा हस्ताक्षरित पत्रमा फागुन २१ गते सम्पन्न प्रतिनिधि सभा सदस्य निर्वाचनको समानुपातिकतर्फको मतगणना सुरु हुन लागेको सन्दर्भमा आ–आफ्नो निर्वाचन क्षेत्रमा मतगणना प्रतिनिधिहरूको आवश्यक व्यवस्था गर्न भनिएको छ ।
साथै, खटाइने प्रतिनिधिहरूको नामावली सकेसम्म छिटो पार्टीको केन्द्रीय कार्यालयमा पठाउन पनि निर्देशन दिइएको छ ।

पत्रमा भनिएको छ, ‘आ–आफ्नो निर्वाचन क्षेत्रमा मतगणना स्थलमा मतगणना प्रतिनिधिहरूको व्यवस्था गरी उहाँहरूको नामावली चाँडोभन्दा चाँडो केन्द्रमा पठाइदिनु हुन निर्देशनअनुसार अनुरोध गरिन्छ ।’