विरामी बोकेको एम्बुलेन्समाथि आक्रमण: चालकमाथि कुटपिट

दाङ,७ चैत ।नेपालगञ्ज जाँदै गरेको एम्बुलेन्समाथि शनिबार राति आक्रमण भएको छ।

रूकुम पश्चिमको चौरजहारीबाट विरामी बोकेर नेपालगञ्जतर्फ जाँदै गरेको कुमाख गाउँपालिका, सल्यानको एम्बुलेन्समाथि आक्रमण भएको हो।

रामघाट, सुर्खेत (छिन्चु नजिक) राति करिब १० बजेतिर ८–९ जनाको समूहले एम्बुलेन्स रोकेर आक्रमण गरेको जनाइएको छ। एम्बुलेन्समा विरामी र एक जना कुरुवा रहेका थिए।

एम्बुलेन्स चालक वसन्त शर्मालाई गाडीबाट तानेर आक्रमणकारीहरूले कुटपिट गरेका थिए। ज्यानको जोखिम भएपछि उनी भागेर जोगिन सफल भएका थिए। चालक भागेपछि आक्रमणकारीहरूले एम्बुलेन्समा तोडफोड गरेका थिए।

चालक शर्माका अनुसार सडकमा अवरोध सिर्जना गरी एम्बुलेन्स रोकेर एक्कासी हातपात सुरु गरिएको थियो। प्रहरी घटनास्थलमा पुग्दा आक्रमण गर्नेहरु फरार भैसकेको र उनीहरूको खोजीकार्य भैरहेको प्रहरीले बताएको छ।

तोडफोड भएको अवस्थामै एम्बुलेन्सले विरामीलाई लिएर रात नेपालगञ्ज पुगेको हो।