आयोगमा १ हजार बढी उजुरी फछ्र्यौट

काठमाडौ,२७चैत । निर्वाचन आयोगले आचारसंहिता उल्लंघनसम्बन्धी १ हजार ६१ उजुरी फछ्र्यौट गरेको जनाएको छ ।जिल्ला आचारसंहिता अनुगमन समिति र अनुगमन अधिकृतसमक्ष कूल १ हजार ७६ उजुरी परेकोमा झण्डै ९९ प्रतिशत फछ्र्यौट गरिएको आयोगले जनाएको छ ।

प्रदेशगत रूपमा सबैभन्दा धेरै लुम्बिनी प्रदेशमा २ सय ४४ उजुरी परेका छन् भने सबैभन्दा कम सुदूरपश्चिम प्रदेशमा ९६ उजुरी परेका छन् ।प्राप्त उजुरीमध्ये ९७ लिखित र ९ सय ७९ उजुरी टेलिफोन, एसएमएस लगायत अन्य माध्यमबाट प्राप्त भएका थिए ।

आयोगका अनुसार सबैभन्दा धेरै तोकिएको आकारभन्दा ठूला तुल, ब्यानर र झण्डा प्रयोगसम्बन्धी उजुरी परेका छन् ।यसका साथै सामाजिक सञ्जालको दुरुपयोग, माइक प्रयोग गरी ध्वनि प्रदूषण, शिक्षक तथा कर्मचारी प्रचारप्रसारमा संलग्न भएको लगायतका उजुरी रहेका छन् ।

सार्वजनिक स्थान र सवारी साधनमा झण्डा टाँग्ने तथा अनुमति नलिएका गाडी प्रयोग गर्ने जस्ता उजुरी पनि परेको आयोगले जनाएको छ ।आयोगले आचारसंहिताको पूर्ण पालना गर्न सबै सरोकारवालालाई आग्रह गरेको छ ।