कमजोरी स्वीकार गर्दै कांग्रेस अघि बढ्नेछ : सभापति थापा

काठमाडौँ,२७ माघ । नेपाली कांग्रेसका सभापति गगन थापाले पार्टीभित्रका कमजोरी लुकाउने नभई स्वीकार गरेर सुधारसहित अघि बढ्ने स्पष्ट सन्देश दिएका छन् । कोशी प्रदेशस्तरीय कार्यकर्ता भेटघाट तथा प्रशिक्षण कार्यक्रममा सहभागी हुन विराटनगर पुगेका थापाले कांग्रेस अब नयाँ सोच र कार्यदिशासहित अघि बढ्ने बताए ।

विशेष महाधिवेशनपछि पहिलोपटक विराटनगर आएका थापालाई स्वागत गर्न कांग्रेस नेता डा. शेखर कोइरालासहितका नेताहरू उपस्थित थिए । कार्यक्रमलाई सम्बोधन गर्दै थापाले कांग्रेसमा शुद्धीकरण आवश्यक रहेको बताए । “ऐना पुछेर होइन, अनुहारकै दाग मेटेपछि मात्रै कांग्रेसमा शुद्धीकरण हुन्छ,” उनले भने ।

विगतमा निर्वाचन जित्नु र सरकारमा टिकिरहनुलाई मात्र उपलब्धि ठान्ने गलत सोचले पार्टी कमजोर बनेको थापाले स्वीकार गरे । सत्ताका लागि जोसँग पनि मिल्ने प्रवृत्तिले बीपी कोइराला, गणेशमान सिंह र कृष्णप्रसाद भट्टराईजस्ता नेताहरूले बनाएको पार्टीको छविमा असर पुगेको उनले बताए । “अब त्यो बाटोमा कांग्रेस फेरि हिँड्दैन,” थापाले स्पष्ट पारे ।

कम्युनिस्ट दलहरूसँगको अस्वस्थ प्रतिस्पर्धाका कारण कांग्रेसले आफ्नो मौलिक पहिचान गुमाउँदै गएको थापाको भनाइ थियो । अदालत र संवैधानिक निकायहरूमा दलीय भागबन्डा खोज्ने प्रवृत्तिमा कांग्रेस पनि कतै न कतै दोषी रहेको उनले बताए ।

“कायरले कमजोरी लुकाउँछ, साहसीले गल्ती स्वीकार गर्छ,” थापाले भने, “अब गल्ती नदोहोर्‍याउने प्रतिबद्धतासहित नागरिकको भरोसा जित्न कांग्रेस मैदानमा उत्रिन्छ।” कांग्रेस परिवर्तन भएको कुरा भाषणमा मात्र सीमित हुन नहुने उल्लेख गर्दै उनले कार्यकर्ताहरूलाई कांग्रेस बदलिँदा नागरिकको जीवनमा के फरक पर्छ भन्ने ठोस उत्तरसहित टोल–टोलमा पुग्न आग्रह गरे ।

देशलाई पुनः कुनै पनि प्रकारको द्वन्द्वतर्फ जान नदिन वर्तमान संविधान नै मुख्य आधार भएको थापाले बताए । संविधानको रक्षा र पूर्ण कार्यान्वयनमार्फत जनताको समस्या समाधान गर्न कांग्रेस दृढ रहेको उनको भनाइ थियो । “देशभर कार्यकर्तामा देखिएको ऊर्जा कोठाभित्र थुन्नु हुँदैन,” थापाले भने, “यो ऊर्जा जनताको घरदैलोसम्म पुर्‍याउनु हाम्रो साझा जिम्मेवारी हो।”

कार्यक्रममा कोशी प्रदेशका विभिन्न जिल्लाबाट कांग्रेसका नेता तथा कार्यकर्ताहरूको सहभागिता रहेको थियो ।