मिनी ट्रक दुर्घटना हुँदा चार जनाको मृत्यु

काठमाडौँ,२ फागुन। मिनी ट्रक दुर्घटना हुँदा चार जनाको ज्यान गएको छ।ललितपुरको महाङ्काल र कोन्ज्योसोम गाउँपालिकाको सिमाना चौघरे बाउनडाँडामा उक्त दुर्घटना भएको हो ।

लेलेबाट कालेश्वर मन्दिरमा त्रिशूल चढाउन जाँदै गरेको बागमती प्रदेश–०१–००४ क ६२२८ नम्बरको मिनी ट्रक गएराति करिब ९ बजे दुर्घटनामा परेको हो।

दुर्घटनामा ट्रक चालक गोदावरी नगरपालिका–६ का ५२ वर्षीय गणेश खड्का र सोही स्थानका गाडीधनी ४२ वर्षीय गणेश थापाको घटनास्थलमै मृत्यु भएको प्रहरीले जनाएको छ।

त्यस्तै, घाइते भएका अन्य दुई पुरुषको उपचारका क्रममा पाटन अस्पतालमा ज्यान गएको छ। अस्पतालमा मृत्यु हुने दुवै जनाको परिचय खुल्न बाँकी रहेको छ।

घटनाबारे थप अनुसन्धान भइरहेको जिल्ला प्रहरी परिसर ललितपुरले जनाएको छ।