एलपी ग्यासको आयात बढाइयो

काठमाण्डौ,१३ फागुन। चुनावलाई ध्यानमा राख्दै नेपाल आयल निगमले खाना पकाउने एलपी ग्यासको आयात बढाएको जनाएको छ।

बजारमा अभाव नहोस् भन्ने उद्देश्यले इण्डियन आयल कर्पोरेशन बाट उच्च दरमा ग्यास लोडिङ भइरहेको निगमका कार्यकारी निर्देशक चण्डिका भट्टले जानकारी दिए। उनका अनुसार हिजो मात्रै यो वर्षकै सबैभन्दा धेरै परिमाणमा ग्यास आयात भएको छ।

एकै दिन १ सय ३८ बुलेट ग्यास लोड गरिएको निगमले जनाएको छ।

यता उपभोक्ताले भने बजारमा ग्यास सहज रूपमा नपाएको गुनासो गरिरहेका छन्। तर निगमले बजारमा अभाव नरहेको र चुनाव अवधिभर आपूर्ति नियमित रहने दाबी गरेको छ।