काठमाडौं,६ फागुन । वैदेशिक रोजगारीका लागि विभिन्न देश पठाइदिने भन्दै रु ४४ लाख ७० हजार ठगी गरेको अभियोगमा प्रहरीले तीन जनालाई पक्राउ गरी सार्वजनिक गरेको छ।

काठमाडौँ उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक रामेश्वर कार्कीका अनुसार पक्राउ पर्नेमा काठमाडौँ महानगरपालिका–८ बस्ने २६ वर्षीया सरस्वती श्रेष्ठ, काठमाडौँ महानगरपालिका–३० बस्ने ३८ वर्षीय दीपेश श्रेष्ठ तथा खोटाङ केपिलासगढी गाउँपालिका–२ बस्ने ४८ वर्षीय मनिराज राई रहेका छन्।

प्रवक्ता कार्कीका अनुसार सरस्वती श्रेष्ठले जापान पठाइदिने भन्दै रु २४ लाख, दीपेश श्रेष्ठले आइसल्याण्ड पठाइदिने भन्दै रु १७ लाख तथा मनिराज राईले अल्बानिया पठाइदिने भन्दै रु तीन लाख ७० हजार रकम लिई विदेश नपठाई सम्पर्कविहीन भएका थिए। पीडितहरूको उजुरीका आधारमा उनीहरूलाई पक्राउ गरिएको प्रहरीले जनाएको छ।

पक्राउ परेका तीनै जनामाथि थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल पठाइएको प्रवक्ता कार्कीले जानकारी दिए।

काठमाडौं,५ फागुन । प्रहरीले ९५५ केजी गाँजा सहित दुई जनालाई पक्राउ गरेको छ। प्रहरीले धरान उपमहानगरपालिका–२० बरडाँडाबाट उनीहरूलाई पक्राउ गरेको हो। इलाका प्रहरी कार्यालयको टोलीले प्रहरी नायब उपरीक्षक भिषणबाबु राईको कमाण्डमा गए राति धनकुटाबाट धरानको विष्णुपादुकातर्फ जादै गरेका दुई वटा पिकअप गाडी जाँच गर्ने क्रममा उक्त परिमाणको गाँजा बरामद गरेको हो।

जिल्ला प्रहरी कार्यालय सुनसरीका प्रवक्ता चन्द्र खड्काका अनुसार बारा कोल्बी नगरपालिका–८ का सन्दीपकुमार माझीले चलाएको बागमती प्रदेश–०१–०२७च ११४३ नम्बरको पिकअप गाडीबाट ४९५ केजी र चन्द्रागिरी नगरपालिका–८ का ३३ वर्षीय नगेन्द्रराज श्रेष्ठले चलाएको बीएसी ३२३६ नम्बरको गाडीबाट ४६० केजी गाँजा बरामद गरिएको हो।

पक्राउ परेका दुवै जनालाई सवारीसाधनसहित नियन्त्रणमा लिई थप अनुसन्धान भइरहेको प्रहरीले जनाएको छ।

दाङ,५ फागुन। दाङको तुलसीपुरमा अज्ञात समूहले सिलिन्डर बम विस्फोट गराएको छ। तुलसीपुर उपमहानगरपालिका–६ र वडा नम्बर–८ को सीमाक्षेत्र पातुखोलामा विस्फोट भएको प्रहरीले जनाएको छ। तुलसीपुर अटोभिलेजदेखि तलतिर गाइपालन फर्मको पश्चिमतर्फ पातुखोलामा सिलिन्डर विस्फोट गराइएको दाङ प्रहरीले जानकारी दिएको छ।

घटनास्थलमा सिलिन्डरका टुक्रा फेला परेका छन्। प्रहरी टोली घटनास्थलमा पुगिसकेको छ र थप अनुसन्धान भइरहेको इलाका प्रहरी कार्यालय तुलसीपुरका प्रवक्ता बिनोदराज खत्रीले बताएका छन्। जिल्ला प्रहरी कार्यालय दाङका प्रवक्ता डीएसपी रेशम बोहराले पनि विस्फोटको आवाज आएपछि प्रहरी घटनास्थलमा पुगेर अनुसन्धान सुरु गरिएको जानकारी दिए।

निर्वाचनको मिति नजिकिँदै गर्दा चुनावलाई लक्षित गरी सर्वसाधारणलाई त्रसित पार्ने उद्देश्यले अज्ञात समूहले विस्फोट गराएको हुन सक्ने प्रहरीको अनुमान छ। घटनामा मानवीय वा अन्य भौतिक क्षति भने नभएको प्रहरीले जनाएको छ।

नेकपा बहुमतले आज नेपाल बन्दको आयोजना गरेको छ। सोही बन्दको पूर्वसन्ध्यामा तुलसीपुरमा बम विस्फोट भएको हो।

काठमाडौं,४फागुन । रौतहटमा एक महिलाको बीभत्स हत्या भएको छ। फतुवा विजयपुर नगरपालिका–६ पेटभर्वा निवासी महन्थ यादवकी २८ वर्षीया श्रीमती आरती देवी यादव मृत अवस्थामा फेला परेकी हुन्। प्रहरीका अनुसार आरती आफ्नै सुत्ने कोठामा घाँटीमा धारिलो हतियार प्रहार गरिएको अवस्थामा भेटिएकी थिइन्।

आइतबार अबेरसम्म घर नखुलेपछि स्थानीयको आग्रहमा इलाका प्रहरी कार्यालय सन्तपुर दोस्तियाको टोली पुगेको थियो। ढोका खोलेपछि उनी खाटमै घाँटी काटिएको अवस्थामा फेला परेकी थिइन्।

जिल्ला प्रहरी कार्यालय रौतहटका प्रवक्ता डीएसपी विष्णु प्रदीप बस्यालका अनुसार घटनापछि मृतकका श्रीमान् महन्थ राय यादव फरार छन्।

प्रारम्भिक अनुसन्धानबाट श्रीमानले नै हत्या गरेर फरार भएको आशंका गरिएको छ। उनको तीव्र खोजी भइरहेको प्रहरीले जनाएको छ।

मृतक आरतीको शव पोस्टमार्टमका लागि प्रादेशिक अस्पताल गौरमा राखिएको छ। प्रहरीले घटनाबारे थप अनुसन्धान गरिरहेको जनाएको छ।

काठमाडौ,३फागुन । महाशिवरात्रिको अवसरमा पशुपतिनाथ मन्दिर क्षेत्रमा उच्छृङ्खल गतिविधिमा संलग्न १३८ जनालाई प्रहरीले नियन्त्रणमा लिएको छ।

जिल्ला प्रहरी परिसर काठमाडौँका अनुसार पाकेटमार्ने, धकेला–धकेल गर्ने, गाँजा सेवन गर्ने तथा अन्य उच्छृङ्खल गतिविधिमा संलग्न व्यक्तिहरूलाई नियन्त्रणमा लिइएको हो।

शिवरात्रिको अवसरमा ठूलो संख्यामा सुरक्षाकर्मी परिचालन गरी पशुपति क्षेत्रमा कडा सुरक्षा व्यवस्था मिलाइएको प्रहरीले जनाएको छ। आइतबार बिहानैदेखि दर्शनार्थीहरूको पशुपति क्षेत्रमा घुइँचो लागेको छ।

दाङ,२ फागुन । दाङमा बलात्कार आरोपमा प्रहरीले एक जनालाई पक्राउ गरेको छ। तुलसीपुर उपमहानगरपालिका–७ कुमाल गाउँका ३१ वर्षीय यज्ञ बोहरा पक्राउ परेका हुन्।

५१ वर्षीया एक महिलालाई बलात्कार गरेको आरोपमा उजुरी परेपछि उनलाई हिजो शुक्रबार दिउँसो पक्राउ गरिएको नेपाल प्रहरीले जनाएको छ। घटनाबारे थप अनुसन्धान भइरहेको प्रहरीले जानकारी दिएको छ।

काठमाडौँ ,२ फागुन । वैदेशिक रोजगारीमा आकर्षक तलबको प्रलोभन देखाई हंगेरी पठाइदिने भन्दै रकम ठगी गरेको आरोपमा एक जना पक्राउ परेका छन्।

पक्राउ पर्नेमा गोकर्णेश्वर नगरपालिका–८ बस्दै आएका दोलखा कालिन्चोक गाउँपालिका–४ का ५६ वर्षीय महेश तामाङ रहेका छन्। उनले एक जना पीडितबाट तीन लाख रुपैयाँ ठगी गरेको उजुरी परेको थियो।

उक्त उजुरीका आधारमा काठमाडौं उपत्यका अपराध अनुसन्धान कार्यालयको टोलीले उनलाई शुक्रबार काठमाडौँ महानगरपालिका–१२ बाट पक्राउ गरेको हो।
पक्राउ परेका तामाङलाई थप अनुसन्धान तथा कारबाहीका लागि वैदेशिक रोजगार विभागसमक्ष पेस गरिएको प्रहरीले जनाएको छ।

दैलेख,१ फागुन । दैलेखमा १६ वर्षीय किशोरको हत्या भएको छ। दैलेखको दुल्लू नगरपालिका–४ शान्तिबजारका प्रकाश खनालको चक्कु प्रहारबाट मृत्यु भएको हो ।

प्रहरीका अनुसार फुटबल खेलेर घर फर्किँदै गरेका खनाललाई पछाडिबाट पेटमा चक्कु प्रहार गरिएको थियो। गम्भीर घाइते भएका उनलाई उपचारका लागि दुल्लू अस्पताल लगिएकोमा उपचारकै क्रममा मृत्यु भएको हो।

एउटै किशोरीलाई मन पराउने विषयमा भएको विवादका कारण घटना भएको प्रारम्भिक अनुसन्धानबाट खुलेको प्रहरीले जनाएको छ। घटनामा संलग्न रहेको आरोपमा १९ वर्षीय मुकुन्द शाही र विभूषण शाहीलाई चामुण्डाको जंगल क्षेत्रबाट पक्राउ गरिएको छ।

जिल्ला प्रहरी कार्यालय दैलेखका डीएसपी गणेशबहादुर बरालले घटनाबारे थप अनुसन्धान भइरहेको जानकारी दिएका छन्।

काठमाडौँ,२९ माघ । स्वदेशमा अपराध गरेर विदेशमा लुकेका १० जना फरार प्रतिवादीलाई नेपाल प्रहरीले अन्तर्राष्ट्रिय प्रहरी संगठन इन्टरपोलको समन्वयमा पक्राउ गरी नेपाल फर्काएको छ।

नेपाल प्रहरीका केन्द्रीय प्रवक्ता प्रहरी नायब महानिरीक्षक अबि नारायण काफ्लेले चालु आर्थिक वर्षमा ११ जनाविरुद्ध ‘रेड नोटिस’ र तीन जनाविरुद्ध ‘डिफ्युजन’ जारी भएको जानकारी दिए। तीमध्ये रेड नोटिस जारी भएका ८ जना र डिफ्युजन जारी भएका २ जनालाई विभिन्न देशबाट पक्राउ गरी स्वदेश ल्याइएको उनले बताए।

अघिल्लो आर्थिक वर्षमा भने ३४ जनाविरुद्ध रेड नोटिस र २ जनाविरुद्ध डिफ्युजन जारी गरिएको थियो। तीमध्ये १७ जना रेड नोटिस र ३ जना डिफ्युजन जारी भएका प्रतिवादीलाई पक्राउ गरी नेपाल फिर्ता ल्याइएको प्रहरीले जनाएको छ।

प्रवक्ता काफ्लेले इन्टरपोलसँगको सहकार्यमा फरार प्रतिवादीलाई कानुनी दायरामा ल्याउने कार्य निरन्तर जारी रहेको उल्लेख गर्दै अपराध गरेर विश्वको जुनसुकै स्थानमा लुके पनि कानुनबाट उम्किन नसक्ने स्पष्ट पारे।

उनले देशमा शान्ति सुव्यवस्था कायम राख्न, आसन्न निर्वाचन शान्तिपूर्ण रूपमा सम्पन्न गर्न तथा अपराध अनुसन्धान र नियन्त्रणलाई प्रभावकारी बनाउन नेपाल प्रहरी विभिन्न सुरक्षा रणनीतिसहित सक्रिय रूपमा परिचालित भइरहेको बताए।

फरार प्रतिवादीहरूको अन्तर्राष्ट्रिय खोजतलासका लागि नेपाल प्रहरीअन्तर्गतको नेसनल सेन्ट्रल ब्युरो (एनसिबी) को अनुरोधमा इन्टरपोल महासचिवालयले आवश्यक नोटिस जारी गर्दै आएको छ।

दाङ,२८ माघ । बर्दियाबाट भारततर्फ लैजान लागिएका दाङका एक बालकसहित तीन जना नेपाली बालबालिकाको प्रहरीले उद्धार गरेको छ। मङ्गलबार राति गुलरिया नगरपालिका–७ भन्सार रोड क्षेत्रबाट उनीहरूलाई उद्धार गरिएको हो।

उद्धार गरिएका बालबालिकामा दाङ चौघेरा पुलवारीका ८ वर्षीय बालक, रोल्पा उपरकोटकी १५ वर्षीया बालिका र रोल्पा खाराकी १३ वर्षीया बालिका रहेका छन्। उनीहरूका परिवार प्रहरीको सम्पर्कमा आइसकेको जनाइएको छ।

घटनासम्बन्धी भारत, उत्तर प्रदेशका ६ जना भारतीय नागरिकलाई प्रहरीले नियन्त्रणमा लिएको छ। पक्राउ पर्नेमा बहराइच जिल्लाका ७४ वर्षीय लेडी महत, उनका ३४ वर्षीय छोरा हिरालाल महत, २६ वर्षीया ज्ञानकुमारी महत, अयोध्या गोलाई गाउँकी ३५ वर्षीया सुनिता महत, बहराइचका २४ वर्षीय भुल्लु महत र १९ वर्षीय मुकेश महत रहेका छन्। उनीहरूसँग एक काखे बालकसमेत रहेको प्रहरीले जनाएको छ।

प्रारम्भिक अनुसन्धानमा उनीहरू दाङको घोराही बजारमा गमलाको काम गर्दै आएको खुलेको छ। बालबालिकालाई भारत कुन प्रयोजनका लागि लैजान खोजिएको हो भन्नेबारे अनुसन्धान भइरहेको जिल्ला प्रहरी कार्यालय बर्दियाका प्रहरी उपरीक्षक सरोज पौडेलले जानकारी दिएका छन्।

सम्बन्धित जिल्लामा बालबालिकाका आफन्तसँग समन्वय गर्ने काम भइरहेको प्रहरीले जनाएको छ।