काठमाडौं,३ माघ । नेपाली कांग्रेसको शेरबहादुर देउवा पक्ष निर्वाचन आयोगको निर्णयविरुद्ध अदालत जाने भएको छ।

शुक्रबार साँझ निर्वाचन आयोगले विशेष महाधिवेशनबाट सभापति निर्वाचित गगन थापा नेतृत्वको कांग्रेसलाई आधिकारिक मान्यता दिएपछि देउवा पक्ष असन्तुष्ट बनेको हो।

शनिबार बिहान पार्टी कार्यालय सानेपामा बसेको देउवापक्षीय केन्द्रीय कार्यसमिति बैठकले निर्वाचन आयोगको निर्णयविरुद्ध अदालत जाने निर्णय गरेको नेता प्रकाशशरण महतले जानकारी दिए।

“आयोगको निर्णयविरुद्ध आइतबार अदालत जाने निर्णय गरेका छौँ,” महतले भने।

काठमाडौं,२ माघ । निर्वाचन आयोगले गगनकुमार थापालाई नेपाली कांग्रेसको आधिकारिक सभापतिका रूपमा मान्यता दिएको छ। राजनीतिक दलसम्बन्धी ऐनको दफा ५१ अनुसार दलको विवरण अद्यावधिक गर्दै आयोगले थापा नेतृत्वको समूहलाई आधिकारिक मान्यता दिने निर्णय गरेको हो।

कार्यवाहक प्रमुख निर्वाचन आयुक्त रामप्रसाद भण्डारी र आयुक्त जानकी तुलाधारले उक्त निर्णयको पक्षमा मत दिएका छन्। आयोगका उच्च स्रोतका अनुसार आयुक्त सगुनशमशेर राणाले भने फरक मत राखेका थिए।

पुस २७ देखि ३० सम्म काठमाडौंमा सम्पन्न विशेष महाधिवेशनबाट गगन थापा नेपाली कांग्रेसको सभापतिमा निर्वाचित भएका थिए। सोही विशेष महाधिवेशनबाट भएको निर्णयअनुसार सभापति थापासहितका नवनिर्वाचित पदाधिकारीहरूले बिहीबार निर्वाचन आयोगमा विवरण अद्यावधिकका लागि निवेदन दिएका थिए।

उता, पूर्णबहादुर खड्का पक्षका नेताहरूले शुक्रबार बिहान आयोगमा निवेदन दिँदै आफूहरू आधिकारिक भएको दाबी गरेका थिए। दुवै पक्षबाट दाबी आएपछि आयोगले नवनिर्वाचित पदाधिकारीहरूलाई छलफलका लागि आयोगमा बोलाएको थियो।

कांग्रेसका दुवै पक्षको दाबीमाथि अध्ययन तथा छलफलपछि निर्वाचन आयोगले गगन थापा पक्षलाई आधिकारिक नेपाली कांग्रेसको मान्यता दिएको हो। यससँगै अब नेपाली कांग्रेसको निर्वाचन चिह्न ‘रुख’ र चारतारे झण्डा पनि थापा पक्षकै रहने भएको

दाङ,१ माघ । नेकपा एमालेका महासचिव शंकर पोखरेलले मुलुकमा अझै चुनाव हुने वा नहुने विषयमा अन्योल कायम रहेको बताएका छन्।

गृह जिल्ला दाङमा प्रेस चौतारी नेपालले आयोजना गरेको पत्रकार सम्मेलनमा बोल्दै महासचिव पोखरेलले वर्तमान अन्योलताका अवस्थामा प्रतिनिधिसभा पुनःस्थापना नै स्पष्ट र सुरक्षित बाटो भएको बताएका हुन्।

उनले चुनाव हुने स्थिति बनेमा नेकपा एमाले निर्वाचन प्रक्रियामा सहभागी हुने पनि स्पष्ट पारे।
दलहरू फुट्नुभन्दा जुट्नु लोकतन्त्रका लागि फाइदाजनक हुने उल्लेख गर्दै उनले नेपाली कांग्रेसभित्र देखिएको आन्तरिक विवादले लोकतन्त्रमा गम्भीर असर पार्न सक्ने टिप्पणी गरे।

महासचिव पोखरेलले रवि लामिछानेसँग सम्बन्धित सम्पत्ति शुद्धीकरण र संगठित अपराधसम्बन्धी मुद्दा फिर्ता लिनेजस्ता गतिविधिले सरकार कहाँबाट र कसरी सञ्चालित छ भन्ने प्रश्न उठाएको दाबी गरे।

समाजमा अझै शान्ति–सुरक्षाको पूर्ण प्रत्याभूति नहुनु चिन्ताको विषय भएको भन्दै उनले लुटिएका हतियार संकलन गर्ने, फरार कैदीलाई फिर्ता ल्याउने तथा प्रहरीको मनोबल उच्च बनाउने काममा सरकार गम्भीर हुनुपर्ने सुझाव दिए।

काठमाडौं,१ माघ । नेपाली कांग्रेसको दोस्रो विशेष महाधिवेशनबाट गगन थापा पार्टी सभापतिमा निर्विरोध निर्वाचित भएका छन्।

६० प्रतिशतभन्दा बढी महाधिवेशन प्रतिनिधिहरूको हस्ताक्षरसहित आइतबारदेखि सुरु भएको विशेष महाधिवेशनले थापालाई सर्वसम्मत रूपमा सभापति चयन गरेको हो।
विशेष महाधिवेशनले अन्य पदाधिकारीहरू पनि सर्वसम्मत रूपमा चयन गरेको छ।

निर्वाचन समितिका संयोजक सीताराम केसीले बुधबार राति साढे १२ बजे विशेष महाधिवेशन हलमा निर्वाचित पदाधिकारीहरूको नाम सार्वजनिक गरेका थिए।

उपसभापतिमा विश्वप्रकाश शर्मा र पुष्पा भूसाल निर्वाचित भएका छन्। महामन्त्रीमा गुरूराज घिमिरे र प्रदीप पौडेल चयन भएका छन्।

सहमहामन्त्रीमा फरमुल्लाह मन्सुर (मुस्लिम क्लस्टर), मुक्ता कुमारी यादव (मधेसी), प्रकाश रसाइली (दलित), डिला संग्रौला पन्त (महिला), बहादुर सिंह लामा (आदिवासी जनजाति), उदयशमशेर राणा (खस आर्य), योगेन्द्र चौधरी (थारू) र कर्ण बूढा (पिछडिएको समुदाय) निर्वाचित भएका छन्।

सभापति शेरबहादुर देउवासँग आइतबार बिहानदेखि भएको वार्ता सहमतिमा नपुगेपछि भृकुटीमण्डपमा जारी विशेष महाधिवेशनले निर्वाचन प्रक्रिया अघि बढाउँदै नयाँ कार्यसमिति चयन गरेको हो।

विशेष महाधिवेशन पक्षले देउवालाई पार्टीको सक्रिय भूमिकाबाट अलग हुनुपर्ने र कांग्रेसले गगन थापालाई भावी प्रधानमन्त्री घोषणा गर्दै उनकै नेतृत्वमा चुनावमा जानुपर्ने प्रस्ताव अघि सारेको थियो। तर देउवा र उनी पक्षका नेताहरू यसमा सहमत नभएपछि सहमतिको प्रयास असफल भएको थियो।

त्यसलगत्तै पार्टी कार्यालय सानेपामा बसेको केन्द्रीय कार्यसमिति बैठकले महामन्त्रीद्वय गगन थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई साधारण सदस्यसमेत नरहने गरी कारबाही गर्ने निर्णय गरेको थियो।

यस निर्णयपछि सहमतिको सबै बाटो बन्द भएको ठहर गर्दै विशेष महाधिवेशनले निर्वाचन प्रक्रियालाई अन्तिम रूप दिएको जनाएको छ।

काठमाडौं,३० पुस । नेपाली कांग्रेसको संस्थापन पक्षले पार्टीका महामन्त्रीद्वय गगन थापा र विश्वप्रकाश शर्मालाई कारबाही गरेको छ।

बुधबार पार्टी केन्द्रीय कार्यालय सानेपामा बसेको संस्थापन पक्षीय केन्द्रीय समिति बैठकले थापा र शर्माले पार्टी हितविपरीत गतिविधि गरेको ठहर गर्दै पाँच वर्षका लागि कारबाही गर्ने निर्णय गरेको हो।

विशेष महाधिवेशन आह्वान गरेका महामन्त्रीद्वय थापा र शर्माले बन्द सत्रको हलले गरेको निर्णय नै अन्तिम हुने दाबी गर्दै समानान्तर रूपमा निर्वाचन समिति गठन गरी चुनावी प्रक्रिया अघि बढाएपछि संस्थापन पक्षले कडा कदम चालेको हो।

पार्टी विभाजन रोक्न भन्दै पछिल्ला दिनमा विभिन्न चरणमा नेताहरूबीच संवाद भएको थियो। मंगलबार मात्रै तीन चरणमा छलफल भएको थियो भने आज (बुधबार) बिहान पनि महामन्त्रीद्वयले सभापति शेरबहादुर देउवासँग छलफल गरेका थिए।

तर, ती छलफलबाट कुनै निष्कर्ष ननिस्किएको बताइएको छ। वार्ता निष्कर्षविहीन भएपछि विशेष महाधिवेशन पक्षधरले निर्वाचन समितिलाई प्रक्रिया अघि बढाउन निर्देशन दिएका थिए।

यता संस्थापन पक्षले कारबाहीको घोषणा गरिरहँदा अर्को पक्षले भने चुनावी प्रक्रिया तीव्र पारेको छ। निर्वाचन समितिका अनुसार सभापति पदमा गगन थापाको उम्मेदवारी दर्ता भइसकेको छ।

काठमाडौं,३० पुस। नेपाली कांग्रेसको संस्थापन पक्ष पनि कानुनी परामर्शमा जुटेको छ।

भृकुटीमण्डपमा जारी विशेष महाधिवेशनबाट नेतृत्व चयन भएमा कसरी अघि बढ्ने भन्ने विषयमा शीर्ष नेताहरू कानुनविद्हरूसँग छलफलमा जुटेको नेता वीरबहादुर बलायरले जानकारी दिए।

बलायरका अनुसार कांग्रेसका कार्यवाहक सभापति पूर्णबहादुर खड्कालगायत नेताहरू परामर्शमा सहभागी छन्।

विशेष महाधिवेशनले नेतृत्व चयन गरेपछि प्रक्रिया कसरी अगाडि बढाउने, निर्वाचन आयोगमा कसरी जानेलगायतका विषयमा पूर्वमहान्यायाधिवक्ता खम्बबहादुर खाती, उपेन्द्रकेशरी न्यौपानेलगायत कानुनविद्हरूसँग संस्थापन पक्षले परामर्श थालेको हो।

काठमाडौं,३० पुस। प्रधानमन्त्री सुशीला कार्कीको उपस्थितिमा आज प्रधानमन्त्री तथा मन्त्रिपरिषद् कार्यालय, सिंहदरबारमा सुशासन र समृद्धिका लागि स्वजागरण कार्यक्रम सम्पन्न भएको छ।

कार्यक्रममा मन्त्रीहरू, प्रधान सेनापतिलगायत विभिन्न सुरक्षा निकायका उच्च अधिकारी, मुख्य सचिव, सचिवहरू, विभागीय प्रमुख तथा निजी क्षेत्रका प्रतिनिधिहरूको सहभागिता रहेको थियो।

सो अवसरमा जीवन विज्ञानका संस्थापक एलपी भानु शर्माले स्वजागरणसम्बन्धी प्रवचन दिएका थिए।
प्रधानमन्त्री कार्कीले स्वजागरण अभियानले नैतिकता, सदाचारिता र सेवाभावयुक्त जनशक्ति निर्माण गरी मुलुकमा सुशासन स्थापनामा सहयोग पुग्ने विश्वास व्यक्त गरिन्।

विभिन्न कालखण्डमा भएका सामाजिक–राजनीतिक आन्दोलनहरू र जेनजी पुस्ताको सदाचार तथा सुशासनको मागलाई ध्यानमा राख्दै स्वजागरणलाई सबै तहमा संस्थागत गरी दैनिक जीवनको हिस्सा बनाउनु अपरिहार्य भएको उनले बताइन्।

प्रधानमन्त्रीको सचिवालयका अनुसार स्वजागरणले पहिला व्यक्तिलाई व्यवस्थित, अनुशासित र सचेत बनाउने र त्यसपछि परिवार, समाज र राष्ट्रप्रति जिम्मेवार बन्न प्रेरित गर्ने प्रधानमन्त्री कार्कीको भनाइ थियो।

काठमाडौं,३० पुस नेपाली कांग्रेसका महामन्त्री गगन थापाले पार्टी सभापति पदमा उम्मेदवारी दर्ता गराएका छन्। निर्वाचन समितिका अनुसार थापाले भृकुटीमण्डपस्थित विशेष महाधिवेशन स्थलमा उम्मेदवारी दर्ता गराएका हुन्।

त्यस्तै, महामन्त्री पदमा विश्वप्रकाश शर्मा र प्रदीप पौडेलले उम्मेदवारी दिएका छन्। पार्टीको पुरानै विधानअनुसार हुन लागेको निर्वाचनमा एक सभापति, दुई उपसभापति, दुई महामन्त्री, आठ सहमहामन्त्री र एक सय २१ सदस्य पदका लागि मतदान हुनेछ।

विशेष महाधिवेशनले बनाएको कार्यविधिअनुसार पाँच सदस्यीय निर्वाचन समिति गठन गरिएको छ। निर्वाचन समितिको संयोजकमा वरिष्ठ अधिवक्ता सीताराम केसी रहेका

पार्टी नफुटाउने सुनिश्चिततामा देउवाको जोड

काठमाडौं,२८ पुस । नेपाली कांग्रेसका नेता डा. शेखर कोइरालाले पार्टी सभापति शेरबहादुर देउवालाई विशेष महाधिवेशनस्थलमा उपस्थित भएर त्यसको स्वामित्व लिएर प्रक्रिया अघि बढाउन आग्रह गरेका छन् ।

सभापति देउवासँग भएको भेटमा डा. कोइरालाले पार्टीको एकता कायम राख्दै महाधिवेशनलाई सकारात्मक निष्कर्षमा पुर्‍याउन सभापतिको सक्रिय भूमिकाको आवश्यकता रहेको बताएका थिए ।

जवाफमा सभापति देउवाले भने पार्टी नफुट्ने सुनिश्चितता गर्न नेता कोइरालालाई आग्रह गरेका छन् । पार्टीभित्रको विवादले विभाजनको अवस्था नआओस् भन्नेमा आफू गम्भीर रहेको देउवाको भनाइ रहेको बताइएको छ ।

देउवा–कोइरालाबीचको भेटलाई कांग्रेसभित्रको पछिल्लो राजनीतिक घटनाक्रमका हिसाबले महत्वपूर्ण रूपमा हेरिएको छ । भेटपछि नेता डा. शेखर कोइराला महामन्त्रीद्वयसँग वार्ता गर्न निस्किएको स्रोतले जनाएको छ ।

विशेष महाधिवेशनको बन्दसत्र चलिरहेकै बेला भएको यो भेटलाई कांग्रेसभित्र सहमतिको प्रयासका रूपमा बुझिएको

काठमाडौँ,२८ पुस । नेपाली कांग्रेसको दोस्रो विशेष महाधिवेशनले कार्यविधि पारित गरेको छ । बन्द सत्रको हलले ध्वनि मतमार्फत कार्यविधि अनुमोदन गरेको पार्टी सचिवालयले जानकारी दिएको छ ।

पारित कार्यविधिअनुसार अब बन्द सत्रसहित महाधिवेशनका अन्य कार्यक्रम अघि बढाइने सचिवालयले जनाएको छ ।

पार्टी विधानको धारा १५ बमोजिम सर्वोच्च अधिकारसम्पन्न निकायलाई निहित अधिकार प्रयोग गरी ‘कांग्रेस विशेष केन्द्रीय महाधिवेशन कार्यविधि, २०८२’ लागू गरिएको हो ।

महाधिवेशनको बन्द सत्र काठमाडौँ–५ का महाधिवेशन प्रतिनिधि श्यामबहादुर खड्काको अध्यक्षतामा सुरु भएको थियो ।

यसैबीच बन्द सत्रमा हालको देउवा नेतृत्वको केन्द्रीय कार्यसमिति विघटन गर्ने प्रस्ताव पनि पेस गरिएको छ । उक्त प्रस्तावमाथि छलफल र निर्णय प्रक्रिया कार्यविधिअनुसार अघि बढाइने बताइएको छ ।