काठमाडौं, २३ कार्तिक ।नेपाल प्रहरीको ट्र्याकसुट लगाएर हिँडेका एक व्यक्ति लुटपाटमा संलग्न भएको आरोपमा पक्राउ परेका छन्।

प्रहरीका अनुसार पक्राउ पर्ने व्यक्ति अछाम मल्लेक गाउँपालिका–७ घर भई हाल काठमाडौंको कपनमा बस्दै आएका २२ वर्षीय अमृत साउँद हुन्। उनलाई आइतबार बिहान ७ बजे प्रहरी वृत्त बौद्धबाट खटिएको टोलीले पक्राउ गरेको हो।

साउँद भदौ २४ गते प्रहरी प्रभाग कपनमा भएको लुटपाट घटनामा संलग्न रहेको खुलेको प्रहरीको भनाइ छ। प्रहरीले उनलाई ट्र्याकसुट लगाएर हिँडिरहेको अवस्थामा फेला पारेपछि उनको डेरामा तलासी लिएको थियो।

तलासीका क्रममा कपन प्रहरी प्रभागबाट लुटिएका कम्प्युटर, सिपियू, प्रिन्टर, प्रहरीको रेनकोट, बुट र तरबार फेला परेको प्रहरीले जनाएको छ।

घटनाबारे थप अनुसन्धान भइरहेको प्रहरीले जनाएको छ।

काठमाडौ ,२२ कार्तिक । प्रहरी केन्द्रीय अनुसन्धान ब्युरो (सीआईबी) ले प्रभु बैंकको केन्द्रीय कार्यालयमा छापा मारी महत्वपूर्ण कागजातहरू जफत गरेको छ। बैंकको गतिविधि संकास्पद रहेको ठहरपछि शुक्रबार सीआईबीको टोलीले छापा मारेको हो।

छापा मार्ने सूचना अघि नै पुगेपछि बैंकका प्रमुख कार्यकारी अधिकृत (सिइओ) अशोक सेरचन फरार भएको बताइएको छ। सीआईबीका अनुसार सेरचनले गैरकानुनी रूपमा रकम पठाएको र बिना धितो कर्जा प्रवाह गरेको आशंकामा अनुसन्धान अघि बढाइएको छ।

सीआईबीले प्रभु म्यानेजमेन्ट र मनि ट्रान्सफरसँग सम्बन्धित कागजातहरू जफत गरेको छ। ती कागजातमा सेरचन संलग्न रहेको आशंका गरिएको छ।

बैंकिङ कसुरसँग सम्बन्धित उजुरीका आधारमा सिइओ सेरचनमाथि अनुसन्धान सुरु गरिएको सीआईबी स्रोतले जनाएको छ। हाल उनी फरार रहेकाले प्रहरीले खोजी तीव्र पारेको बताइएको छ।

काठमाडौ,२१ कार्तिक । सामाजिक सञ्जालमा आकर्षक विज्ञापन देखाएर बैंक खाताबाट रकम ठगी गर्ने एक गिरोहका तीन सदस्यलाई नेपाल प्रहरीको साइबर ब्युरोले पक्राउ गरेको छ।

पक्राउ पर्नेमा सिन्धुपाल्चोक चौतारा साँगाचोकगढी नगरपालिका–११ का ४० वर्षीय राजन गिरी, ओखलढुंगा चम्पादेवी गाउँपालिका–८ घर भई हाल काठमाडौँ बुढानिलकण्ठ बस्ने २६ वर्षीया मिना लकन्द्री, र भारत बिहारका २६ वर्षीय आदित्य कुमार रहेका छन्।

ब्युरोका अनुसार, उनीहरूले फेसबुकमा विभिन्न बैंकहरूको नाममा “सर्भे लिंकमा क्लिक गरी बोनस प्राप्त गर्नुहोस्” भन्ने प्रकारका आकर्षक विज्ञापन पोस्ट गरेर प्रयोगकर्ताहरूलाई प्रलोभनमा पार्थे। ती लिंकमा क्लिक गरेपछि प्रयोगकर्ताको बैंक खाताबाट रकम अनलाइनमार्फत अन्य खातामा सारिने गरी ठगी हुने गरेको थियो।

पीडितहरूबाट उजुरी प्राप्त भएपछि प्रहरीको प्राविधिक टोलीले अनुसन्धान अघि बढाएको र काठमाडौँको ठमेलस्थित छायाँ सेन्टर कम्प्लेक्सबाट ती तीनै जनालाई पक्राउ गरेको ब्युरोले जनाएको छ।

उनीहरूबाट नेपाली र विदेशी नगद, विभिन्न बैंकका एटीएम कार्ड, भारतीय सिम कार्ड, मोबाइल फोन र क्यासिनो कार्ड बरामद गरिएको छ।

साइबर ब्युरोका प्रवक्ता प्रहरी उपरीक्षक दिपक राज अवस्थीका अनुसार, पक्राउ परेकाहरूविरुद्ध विद्युतीय माध्यमसम्बन्धी कसुरमा काठमाडौँ जिल्ला अदालतबाट ५ दिनको म्याद थप गरी थप अनुसन्धान भइरहेको छ।

प्रहरीले सामाजिक सञ्जालमा देखिने अपरिचित वा शंकास्पद लिंकमा क्लिक नगर्न सबैलाई सचेत रहन अनुरोध गरेको छ।

काठमाडौ ,२० कार्तिक । काठमाडौं महानगरपालिकाका प्रमुख बालेन्द्र शाह (बालेन) विरुद्ध राष्ट्रिय युवा संघ नेपालले साइबर ब्युरोमा उजुरी दर्ता गरेको छ।

संघका उपाध्यक्ष महाराज गुरुङले बिहीबार साइबर ब्युरोमा उजुरी दर्ता गराएका हुन्। उजुरीमा बालेनले कात्तिक १६ गते सामाजिक सञ्जालमार्फत नेकपा एमालेसहितका राजनीतिक दलहरूलाई गाली गर्दै सामाजिक सद्भावमा खलल पुर्‍याउने प्रयास गरेको आरोप लगाइएको छ।

त्यस्तै, उनले फेसबुक खाता र पेजमार्फत विदेश मित्रराष्ट्रहरूलाई समेत अपमानजनक शब्द प्रयोग गरी वैदेशिक सम्बन्धमा असर पुर्‍याउने कार्य गरेको दाबी गरिएको छ।

संघले उजुरीमार्फत शाहलाई तत्काल पक्राउ गरी कानुनबमोजिम कारबाही गर्न तथा उनको राहदानी रोक्का गर्न माग गरेको छ।

रुपन्देही,१८ कार्तिक । रुपन्देहीको भैरहवास्थित निर्वाणा होटलको गेटअगाडि गोली प्रहार हुँदा एक जना सुरक्षागार्ड घाइते भएका छन्।

जिल्ला प्रहरी कार्यालय रुपन्देहीका प्रमुख एसपी प्रदीप क्षेत्रीका अनुसार गएराति होटल निर्वाणाको क्यासिनोमा दुई समूहबीच विवाद भएको थियो। विवाद चर्किएपछि ती समूहहरू बाहिर निस्किएर होटलको गेटअगाडि आइपुगेका थिए। त्यस क्रममा एक समूहले गोली चलाएको प्रहरीले जनाएको छ।

गोली लागेर होटलमा कार्यरत एक सुरक्षागार्ड सामान्य घाइते भएका छन्। गोली चलाउने समूहका तीन जना व्यक्ति फरार रहेका र उनीहरूको खोजी भइरहेको प्रहरीले जानकारी दिएको छ।

घटनाबारे थप अनुसन्धानका लागि क्यासिनोमा रहेका केही व्यक्तिहरूसँग सोधपुछ भइरहेको प्रहरीले जनाएको छ।

काठमाडौ ,१८ कार्तिक । सामाजिक सञ्जालमा विवादस्पद अभिव्यक्ति दिएका निकोलस भुसाललाई प्रहरीले पक्राउ गरेको छ।

काठमाडौं उपत्यका अपराध अनुसन्धान कार्यालयको टोलीले उनलाई गोरखा नगरपालिका–८ सरस्वती आश्रमबाट मंगलबार पक्राउ गरेको हो। पक्राउपछि उनलाई थप अनुसन्धानका लागि काठमाडौं ल्याउने तयारी भइरहेको प्रहरीले जनाएको छ।

भुसालले हालकी प्रधानमन्त्री सुशीला कार्की, गृहमन्त्री ओमप्रकाश अर्याल र काठमाडौं महानगरपालिकाका मेयर बालेन शाहलगायतका नाम लिँदै हिंसात्मक तथा अराजक अभिव्यक्ति दिएका थिए। यसअघि पनि उनले तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकविरुद्ध आपत्तिजनक अभिव्यक्ति दिएका थिए।

गत शनिबार संवाद डबलीमा आयोजित पत्रकार सम्मेलनमा उनले भदौ २३ गतेको जेनजी आन्दोलनमा भएको दमनको विरोध गर्दै तत्कालीन प्रधानमन्त्री ओली र गृहमन्त्री लेखकलाई “हत्यारा”को संज्ञा दिएका थिए। उक्त आन्दोलनका क्रममा सुरक्षाकर्मीको गोली लागेर १९ जनाको मृत्यु भएको थियो, जसको जिम्मेवारी ओली र लेखकले लिनुपर्ने उनको आरोप रहेको थियो।

प्रहरीले भुसाललाई केही समयदेखि निगरानीमा राख्दै आएको र विवादास्पद अभिव्यक्ति बढेपछि पक्राउ गरिएको जनाएको छ।

काठमाडौ,१८ कार्तिक । कोशी प्रदेशका विभिन्न जिल्लाबाट प्रहरीले प्रतिबन्धित लागू औषधको कारोबारमा संलग्न सात जनालाई पक्राउ गरेको छ। सोमबार राति सुनसरी, मोरङ, झापा र उदयपुरका विभिन्न स्थानहरूबाट लागू औषधसहित उनीहरूलाई नियन्त्रणमा लिएको कोशी प्रदेश प्रहरी कार्यालयका प्रवक्ता एसएसपी दिपक पोखरेलले जानकारी दिए।

सुनसरीको कोशी गाउँपालिका–१ बाट जिल्ला प्रहरी कार्यालय सुनसरीले धादिङका ३० वर्षीया विष्णु अधिकारीलाई ९ ग्राम ९४० मिलिग्राम ब्राउन सुगरसहित पक्राउ गरेको छ। त्यसैगरी, इलाका प्रहरी कार्यालय धरानबाट खटिएको टोलीले धरान–१५ स्थित स्थानबाट लागू औषध ट्रामाडोलका २१० क्याप्सुल र नगद १ लाख ३० हजार रुपैयाँसहित बेचबिखनमा संलग्न सोही स्थानका लक्ष्मण परियार, सन्दिप राई र सन्देश गुरुङलाई पक्राउ गरेको एसएसपी पोखरेलले बताए।

मोरङको बेलबारी नगरपालिका–७ बाट प्रहरी चौकी बाहुनीले बेलबारी–६ का जिवन सरदारलाई ट्रामाडोल र डाइक्लोमाइन गरी ५५ ट्याब्लेटसहित नियन्त्रणमा लिएको छ। त्यस्तै, मोरङकै केराबारी गाउँपालिका–८ का १९ वर्षीय आशिष श्रेष्ठलाई लागू औषध नियन्त्रण ब्युरो विराटनगरले ३ ग्राम १८ मिलिग्राम ब्राउन सुगरसहित विराटनगर–१५ बाट पक्राउ गरेको जनाएको छ।

झापाको मेचीनगर नगरपालिका–६ बाट लागू औषध नियन्त्रण ब्युरो काँकडभिट्टाको टोलीले नुवाकोटका २७ वर्षीय रामबहादुर तामाङलाई १७ ग्राम २०० मिलिग्राम ब्राउन सुगरसहित नियन्त्रणमा लिएको छ।

यसैबीच, जिल्ला प्रहरी कार्यालय उदयपुरले त्रियुगा नगरपालिका–७ स्थित स्थानबाट बेवारिसे अवस्थामा १२२ एम्पुल प्रतिबन्धित लागू औषध बरामद गरेको जनाएको छ।

प्रवक्ता एसएसपी पोखरेलका अनुसार पक्राउ परेका सबैलाई प्रहरी हिरासतमा राखी थप अनुसन्धान भइरहेको छ।

काठमाडौ,१७ कार्तिक । प्रहरीले स्रोत नखुलेको रकम र इलेक्ट्रोनिक सामानसहित दुईजनालाई पक्राउ गरेको छ। सप्तरीको सुरुङ्गा नगरपालिका–२ स्थित सगरमाथा राजमार्ग अन्तर्गत गाईघाट–कदमाहा सडक खण्डमा प्रहरीले स्रोत नखुलेको नगद, गाडी र विभिन्न इलेक्ट्रोनिक सामानसहित दुई जनालाई नियन्त्रणमा लिएको छ।

इलाका प्रहरी कार्यालय भेडियाको टोलीले आइतबार राति करिब ८ः५० बजे कदमाहाबाट गाईघाटतर्फ जाँदै गरेको बागमती प्रदेश ०१–०२८ च ५००८ नम्बरको हाइलक्स गाडी चेकजाँच गर्ने क्रममा उक्त सामान बरामद गरेको हो।

प्रहरीका अनुसार, गाडीबाट २३ लाख रुपैयाँ नगदसहित विभिन्न इलेक्ट्रोनिक उपकरणहरू फेला परेका छन्। बरामद सामग्रीमा साइकल हावा पम्प १०० थान, इलेक्ट्रिक रिक्साको मोटर ३ थान, इलेक्ट्रिक साइकलको ब्याट्री ३१ थान, इलेक्ट्रिक स्कुटरको ब्याट्री ३ थान, ब्याट्री चार्जर ७ थान र ब्याट्री टेस्टर १ थान रहेका छन्।

गाडीमा सवार झापा, दमक–५ निवासी २८ वर्षीय किरण सिटौला र १९ वर्षीय धिरज प्रसाईलाई नियन्त्रणमा लिइएको प्रहरीले जनाएको छ। दुवै जनासँग स्रोत र सामानबारे सोधपुछ भइरहेको बताइएको छ।

इलाका प्रहरी कार्यालय भेडियाका प्रमुख प्रहरी निरीक्षक पूर्णकुमार राईको कमान्डमा खटिएको टोलीले पक्राउ गरेका व्यक्तिहरू, गाडी र बरामद सामानलाई आवश्यक अनुसन्धानका लागि इलाका प्रहरी कार्यालय कडरबोना, सप्तरी पठाइएको प्रहरीले जनाएको छ।

काठमाडौ,१७ कार्तिक । पाँचथरको हिलिहाङ गाउँपालिकामा छोराले आफ्नै बाबुको हत्या गरेको घटना सार्वजनिक भएको छ।

हिलिहाङ गाउँपालिका–१ फेदापाका ६९ वर्षीय युवराज राईलाई उनका कान्छा छोरा ३१ वर्षीय सन्देश राईले हत्या गरेको जिल्ला प्रहरी कार्यालय पाँचथरले जनाएको छ।

आइतबार बिहान करिब १०ः३० बजे घरदेखि करिब ५०० मिटर टाढा रहेको करेसाबारीमा युवराजको शव फेला परेको थियो। शरीरका विभिन्न भागमा चोटपटक देखिएपछि प्रहरी हत्याको आशंकामा अनुसन्धानमा जुटेको थियो।

प्रारम्भिक अनुसन्धानका क्रममा युवराजका कान्छा छोरा सन्देशले बाबुको हत्या गरेको खुलेको जिल्ला प्रहरी कार्यालय पाँचथरका प्रहरी नायब उपरीक्षक अनिषकुमार कर्णले जानकारी दिएका छन्।

प्रहरीले सन्देशलाई पक्राउ गरी थप अनुसन्धान अघि बढाएको छ। मृतक युवराजको शव कानुनी प्रक्रिया पूरा गरी पोस्टमार्टमका लागि जिल्ला अस्पताल फिदिम लगिएको प्रहरीले जनाएको छ।

हत्याको कारण भने अझै स्पष्ट भएको छैन र घटनाबारे थप अनुसन्धान जारी रहेको पाँचथर प्रहरीले जानकारी दिएको छ।

काठमाडौ,१६ कार्तिक। जेन–जी आन्दोलनपछि २४ भदौमा मच्चिएको अराजक घटनाको समयमा प्रहरी वृत्त स्वयम्भूबाट चोरी भएको पेस्तोल बिक्री–वितरणमा संलग्न पाँच जना पक्राउ परेका छन्।

प्रहरीका अनुसार हातहतियार बिक्री भइरहेको भन्ने सूचनाका आधारमा खटिएको टोलीले धादिङ घर भई हाल काठमाडौं–१५ मा बस्ने २१ वर्षीय कृष्ण गुरुङ, भगवानपाउ बस्ने २५ वर्षीय राजन देउला, भारतीय नागरिक २४ वर्षीय अकबर खान, विजेश्वरी बस्ने २६ वर्षीय सुमिन शाक्य र क्षेत्रपाटीमा पसल सञ्चालन गर्दै आएका ३८ वर्षीय प्रभात मल्ललाई नियन्त्रणमा लिएको हो।

प्रहरी वृत्त स्वयम्भूका डीएसपी मोहनमणि अधिकारीका अनुसार कृष्ण गुरुङले २४ भदौमा प्रहरी वृत्तबाट पेस्तोल लुटेको खुल्न आएको छ। अनुसन्धानका क्रममा उनले उक्त पेस्तोल राजन देउलालाई दिएको र देउलाले त्यसपछि अकबर खानमार्फत बिक्री गर्न खोजेको खुलेको छ।

डीएसपी अधिकारीका अनुसार, ‘अकबर खानले ग्राहक खोजेर सुमिन शाक्यलाई ६५ हजार रुपैयाँमा पेस्तोल बिक्री गरेको पाइएको छ।’ त्यसपछि शाक्यले उक्त पेस्तोल प्रभात मल्ललाई १ लाख रुपैयाँमा पुनः बिक्री गरेको खुलेको छ।

प्रहरीले मल्लको पसलको चेन्जिङ रुमभित्र कपडाले बेरेर लुकाइएको अवस्थामा पेस्तोल फेला पारेको जनाएको छ। बरामद पेस्तोलसँगै त्यसमा लाग्ने म्याग्जिन र १५ राउन्ड गोली पनि भेटिएको छ।

पक्राउ परेकाहरूमाथि हातहतियार तथा खरखजाना ऐन, २०१९ अनुसार कानुनी कारबाही प्रक्रिया अगाडि बढाइएको प्रहरीले जनाएको छ।