काठमाडौं, ११ कार्तिक । सर्वोच्च अदालतले देशभरका अदालतहरूमा जेन–जी आन्दोलनका क्रममा भएको तोडफोड र आगजनीमा संलग्न व्यक्तिहरूविरुद्ध कारबाहीको माग गर्दै प्रहरीमा औपचारिक जाहेरी दिने तयारी गरेको छ।

गत आइतबार बसेको सबै न्यायाधीशहरूको पूर्ण बैठक ९फूल कोर्ट० ले अदालतमा भएको क्षतिको सम्बन्धमा कानूनी उपचार खोज्ने र प्रहरीमार्फत दोषीमाथि कारबाहीको प्रक्रिया अघि बढाउने निर्णय गरेको हो।

सर्वोच्च अदालतका प्रवक्ता अर्जुन कोइरालाका अनुसार जाहेरी लेख्ने काम भइरहेको छ। उनले भने, “जाहेरी लेख्ने क्रम चलिरहेको छ, भोलिसम्ममा जिल्ला प्रहरी परिसर काठमाडौंमा गएर जाहेरी दर्ता हुनेछ। अहिले कसैको नाम किटानी गर्न सकिएको छैन, अनुसन्धानबाट संलग्न व्यक्ति पहिचान गरी कारबाही गर्न प्रहरीलाई आग्रह गरिनेछ।”

जाहेरी दर्ता गर्ने काममा न्यायाधीशहरू प्रत्यक्ष संलग्न नहुने र सर्वोच्च अदालत प्रशासनका उच्च अधिकारीहरू—मुख्य रजिष्ट्रार वा रजिष्ट्रारहरूको नामबाट—जाहेरी पेश गरिने तयारी भएको छ।

जेन–जी आन्दोलनपछि भएको देशव्यापी तोडफोड र आगजनीका क्रममा रामशाहपथस्थित सर्वोच्च अदालत भवनमा ठूलो क्षति पुगेको थियो। करिब तीन दिनसम्म आगो निभ्न नसक्दा अदालतमा विचाराधीन करिब २० हजार मुद्दाका फाइल र फैसला भइसकेका करिब १ लाख ९७ हजार फाइल नष्ट भएका थिए।

त्यसैगरी, आगजनीका क्रममा अदालतमा रहेका ५० भन्दा बढी चारपांग्रे सवारीसाधन र डेढ सयभन्दा बढी मोटरसाइकल जलेर नष्ट भएका थिए। तीमध्ये केही सवारी साधन न्यायाधीश, कर्मचारी, सेवाग्राही र कानून व्यवसायीका रहेका थिए।

सर्वोच्च अदालत प्रशासनले जाहेरीमा केवल सर्वोच्च अदालत मात्र नभई देशभरका अदालतहरूमा भएको तोडफोड र क्षतिबारे पनि विवरण समावेश गर्ने तयारी गरेको छ। काठमाडौंमा रहेको सर्वोच्च अदालतसँगै विशेष अदालत र जिल्ला अदालत काठमाडौं पनि सोही आन्दोलनका क्रममा क्षतिग्रस्त भएका थिए।

सर्वोच्च अदालतले प्रहरीसँग तत्काल निष्पक्ष अनुसन्धान गरी संलग्नहरूलाई कानूनी दायरामा ल्याउन आग्रह गर्ने तयारी गरेको छ।

काठमाडौ,१० कार्तिक । जेनजी प्रदर्शनका क्रममा देशका विभिन्न कारागार र सुधारगृहबाट भागेकामध्ये करिब ५ हजार कैदी अझै फरार रहेका छन्।

प्रदर्शन चर्किएपछि देशभरका २८ वटा कारागारबाट १३ हजार ५८५ कैदी र नौ वटा बालसुधारगृहबाट ९६४ बालबन्दी गरी कुल १४ हजार ५४९ जना बन्दी भागेका थिए। तीमध्ये हालसम्म नौ हजार ५८२ जना मात्र कारागार फर्केका छन् । जसमा नौ कैदी र ५८२ बालबन्दी छन्।

कारागार व्यवस्थापन विभागका निर्देशक चोमेन्द्र न्यौपानेका अनुसार हालसम्म चार हजार ५९६ कैदी र ३८६ बालबन्दी गरी कुल चार हजार ९८२ जना बन्दी अझै फरार छन्।

सरकारले फरार कैदीबन्दीलाई स्वेच्छाले कारागार फर्किन ‘अल्टिमेटम’ दिएको छ। फरार बन्दीको खोजी र नियन्त्रणका लागि विशेष अभियान सञ्चालन गरिएको छ। सो अभियानअन्तर्गत सुरक्षाकर्मीहरूले नियन्त्रणमा लिएका कैदीबन्दीलाई सम्बन्धित कारागारमा बुझाइरहेका छन्।

गृह मन्त्रालयले फरार बन्दीको खोजी तथा पक्राउका लागि सहायक प्रमुख जिल्ला अधिकारीको संयोजकत्वमा सुरक्षा निकायका प्रतिनिधि सदस्य रहने गरी ‘फरार बन्दी खोजी तथा नियन्त्रण कार्यदल’ गठन गरेको छ।

प्रदर्शनको मौका पारेर सुनसरीको झुम्का, सोलुखुम्बु, सप्तरी, महोत्तरी, रौतहट, सिन्धुली, काठमाडौँ (नक्खु, डिल्लीबजार, जगन्नाथदेवल), मकवानपुर, रसुवा, चितवन, तनहुँ, कास्की, पर्वत, म्याग्दी, कपिलवस्तु, दाङ तुलसीपुर, नौवस्ता बाँके, रुकुम पश्चिम, नवलपरासी, जुम्ला, बझाङ, कैलाली, दार्चुला, बैतडी, डडेल्धुरा र कञ्चनपुर कारागारबाट १३ हजार ५८५ जना कैदीबन्दी भागेका थिए। यस्तै, मोरङ, पर्सा, भक्तपुर, मकवानपुर, कास्की, रुपन्देही, जयण्डु, नौवस्ता र डोटी बालसुधारगृहबाट ९६४ बालबन्दी भागेका थिए।

सुरक्षा घेरा तोड्ने क्रममा रामेछापमा तीन, धादिङ र सप्तरीमा दुई–दुई कैदीको गोली लागी मृत्यु भएको थियो। त्यस्तै, नौवस्ता बालसुधारगृहमा झडप हुँदा पाँच र डोटी बालसुधारगृहमा एक बालबन्दीको मृत्यु भएको थियो।

कारागार कार्यालयहरूले फरार बन्दीलाई अविलम्ब आत्मसमर्पण गर्न सूचित गर्दै आएका छन्। सरकारले सूचनालाई बेवास्ता गर्नेहरूलाई प्रचलित कानुनअनुसार कारबाही गरिने चेतावनी दिएको छ।

देशभरका ७२ जिल्लामा रहेका ७५ वटा कारागार र बालसुधारगृहमा विभिन्न कसुरमा सजाय भोगिरहेका कुल ३० हजार ६४१ कैदी र बालबन्दी रहेका छन्।

काठमाडौ,९ कार्तिक । लागुऔषध गाँजाजस्तो देखिने करिब सात किलो २९५ ग्राम पदार्थसहित तीन भारतीय नागरिकलाई प्रहरीले त्रिभुवन अन्तर्राष्ट्रिय विमानस्थलबाट पक्राउ गरेको छ।

केन्द्रीय प्रहरी प्रवक्ता तथा प्रहरी नायब महानिरीक्षक विनोद घिमिरेका अनुसार पक्राउ पर्नेहरूमा भारतका २५ वर्षीय हरगोबिन्द सिंह, १९ वर्षीय समिर, र २७ वर्षीय फिरोज अहमद सम्पद रहेका छन्।

विमानस्थलको भन्सार क्षेत्रबाट उनीहरूलाई शुक्रबार दिउँसो पक्राउ गरी आइतबार सार्वजनिक गरिएको प्रहरीले जनाएको छ।

एयर एसियाको उडानबाट बैंकक हुँदै काठमाडौं आएका हरगोबिन्द र समिरको साथबाट तीन किलो ५४० ग्राम, र इन्डिगो एयरको उडानबाट मुम्बई हुँदै काठमाडौं आएका सम्पदको साथबाट तीन किलो ६५५ ग्राम लागुऔषधजस्तो देखिने पदार्थ बरामद गरिएको हो।

पक्राउ परेकालाई आवश्यक अनुसन्धान र कानूनी कारबाहीका लागि लागुऔषध नियन्त्रण ब्यूरोमा पठाइएको प्रवक्ता घिमिरेले जानकारी दिएका छन्।

दाङ,८ कार्तिक । दाङको तुलसीपुरमा जुवातास खेलिरहेको अवस्थामा सात जना पक्राउ परेका छन्।

तुलसीपुर उपमहानगरपालिका–७, जंङ्रहवास्थित मोतिराम डाँगीको घरमा शुक्रबार राति जुवा खेलिरहेको भन्ने सूचनाको आधारमा इलाका प्रहरी कार्यालय तुलसीपुरबाट खटिएको प्रहरी टोलीले उनीहरूलाई नियन्त्रणमा लिएको हो।

प्रहरीका अनुसार, जुवा खेल्ने क्रममा प्रहरीले नगद ६३ हजार ९२० रुपैयाँ र एक बुक तास बरामद गरेको छ।

पक्राउ परेकामध्ये तुलसीपुर–६ का २७ वर्षीय विष्णु शर्मा लगायत सात जना रहेका छन्। उनीहरूविरुद्ध आवश्यक कानुनी कारबाहीका लागि थप अनुसन्धान भइरहेको प्रहरीले जनाएको छ।

चितवन,८ कार्तिक । जेनजी आन्दोलनका क्रममा गत भदौ २५ गते मकवानपुरको भीमफेदी कारागारबाट फरार भएका एक कैदीको पूर्वी नवलपरासीको गैंडाकोटमा हत्या भएको पुष्टि भएको छ।

गैंडाकोट नगरपालिका–१ इँटाभट्टा नजिक कात्तिक ६ गते राति कालिका नगरपालिका–४ पदमपुर निवासी २८ वर्षीय नारायण कुमाललाई स्थानीय युवाहरूको समूहले धारिलो हतियार प्रहार गरी हत्या गरेको जिल्ला प्रहरी कार्यालय पूर्वी नवलपरासीका डीएसपी मधु नेपालले जानकारी दिए।

प्रहरीका अनुसार हत्यामा संलग्न भएको आशंकामा पाँच जनालाई नियन्त्रणमा लिएर अनुसन्धान भइरहेको छ। घटनाका प्रत्यक्षदर्शीका भनाइअनुसार, करिब १४र१५ जनाको समूहले कुमालमाथि घाँटी र हातमा धारिलो हतियार प्रहार गरेका थिए।

जेलर सुवास पौडेलका अनुसार मृतक कुमाल जर्बजस्ती करणीको मुद्दामा अदालतबाट १० वर्ष कैद र ३५ हजार रुपैयाँ जरिवाना सजाय पाएका थिए। उनी २०७४ साउन ३ गते पक्राउ परेका र २०८४ मा छुट्ने क्रममा रहेका थिए।

गत भदौ २५ गते जेनजी आन्दोलनकै क्रममा भीमफेदी कारागारबाट फरार भएका कुमाललाई कारागार प्रशासनले पटक–पटक उपस्थित हुन आग्रह गरे पनि उनी सम्पर्कमा आएका थिएनन्।

कास्की,८ कार्तिक । पोखरामा सामान्य विवादका क्रममा चक्कु प्रहार हुँदा एक जनाको मृत्यु भएको छ।

पोखरा–५ प्रस्याङस्थित एक रेस्टुरेन्टमा रक्सी पिउँदै गरेका बेला विवाद भएपछि भएको चक्कु प्रहारबाट स्थानीय ४५ वर्षीय अनिल पराजुलीको मृत्यु भएको हो। उनलाई चक्कु प्रहार गर्ने २४ वर्षीय किशोर तिमिल्सिनालाई प्रहरीले पक्राउ गरेको कास्की प्रहरी प्रवक्ता प्रहरी नायव उपरीक्षक हरिबहादुर बस्नेतले जानकारी दिए।

शुक्रबार राति पराजुली र तिमिल्सिना सँगै बसेर मदिरा सेवन गर्ने क्रममा विवाद भएको थियो। पहिलो भेटमै सामान्य विवाद भएका उनीहरूबीच दोस्रो भेटमा पुनः झगडा भएपछि पराजुलीले तिमिल्सिनालाई थप्पड हानेका थिए। त्यसपछि रिसले चुर भएका तिमिल्सिना रेस्टुरेन्टबाट बाहिरिन खोज्दा पराजुलीले माफी मागेका थिए।

तर, तिमिल्सिना शान्त हुन सकेनन्। रेस्टुरेन्टबाट बाहिरिँदा उनले चक्कु लिएर निस्किए र करिब ५० मिटर टाढा गएर पराजुलीमाथि पछाडिबाट प्रहार गरे। चक्कु पराजुलीको छाती र घाँटीमुनि लाग्दा मुटु र फोक्सोमा गम्भीर चोट लागेको प्रहरीले जनाएको छ।

विहान करिब ३:०५ बजे अचेत अवस्थामा फेला परेका पराजुलीलाई उद्धार गरी पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल लगिएको थियो, तर ३:४० बजे चिकित्सकले मृत घोषणा गरेका थिए।

घटनापछि तिमिल्सिना इनड्राइभमार्फत सवारी बोलाएर लेकसाइडको एक होटलमा गएर लुकेका थिए। तर, प्रहरीले आफन्तको सहयोगमा उनलाई पक्राउ गर्न सफल भएको जनाएको छ।

प्रहरीले घटनास्थलबाट प्रयोग गरिएको चक्कु बरामद गरेको र तिमिल्सिनामाथि कर्तव्य ज्यान मुद्दामा थप अनुसन्धान भइरहेको प्रवक्ता बस्नेतले बताए।
उनका अनुसार, “सामान्य विवादमै चक्कु प्रहार भएको देखिन्छ। उनीहरूबीच नजिकको सम्बन्ध थिएन, विवाद पनि सामान्य नै थियो। तर एकै पटकको प्रहारले ज्यान गएको छ।”

पराजुली र तिमिल्सिना दुवै जग्गा कारोबारीमा संलग्न रहेको पनि प्रहरीले जनाएको छ। सराङकोट स्थायी घर भएका तिमिल्सिना हाल पोखरा–५ प्रस्याङमा घर बनाएर बस्दै आएका थिए।

हेटौँडा, ५ कार्तिक । जबरजस्ती करणी मुद्दामा फरार रहेका एक प्रतिवादीलाई प्रहरीले हेटौँडाबाट पक्राउ गरेको छ।

३१ असोजमा हेटौँडा उपमहानगरपालिका–१० बसपार्कमा जुवातास खेलिरहेको अवस्थामा प्रहरीले हेटौँडा–१० बस्ने ३७ वर्षीय अर्जुन तामाङ (विजय तामाङ) लाई पक्राउ गरेको हो।

२०७४ साउन ११ गते जिल्ला अदालत सिन्धुपाल्चोकले जबरजस्ती करणी मुद्दामा १० वर्ष कैदको सजाय सुनाएपछि तामाङ फरार रहेका थिए। उनलाई पक्राउ गरिएको मकवानपुरका प्रहरी प्रवक्ता प्रहरी नायब उपरीक्षक पुष्कर बोगटीले जानकारी दिनुभयो।

त्यस्तै, प्रहरीले मकवानपुर बागमती गाउँपालिका–५ ज्यामिरेका २७ वर्षीय राजेश दर्नाल ९हेमन्त परियार० लाई समेत पक्राउ गरेको छ। परियारमाथि २०८१ सालमा विभिन्न मितिमा पाँच पटक चोरी र डाँका मुद्दा दर्ता भएको अनुसन्धानबाट खुलेको प्रहरीले जनाएको छ।

जुवातास खेलिरहेका उनीहरू सहित ११ जनालाई पक्राउ गरी प्रहरीले ११ बुक तास र नगद ६ लाख ६ हजार ३१० रुपैयाँ बरामद गरेको छ। जुवा सम्बन्धी मुद्दामा अनुसन्धानका क्रममा सिआरएस चेकजाँच गर्दा तामाङ र परियार दुवैजना फरार अपराधी भएको पत्ता लागेको प्रहरीले जनाएको छ।

सिरहा,३ कार्तिक । सिरहाको मिर्चैया नगरपालिका–३ स्थित छड्की टोलमा आइतबार साँझ एकै परिवारमाथि सामूहिक आक्रमण हुँदा चार जना घाइते भएका छन्।

जिल्ला प्रहरी कार्यालय सिरहाका प्रहरी नायब उपरीक्षक रमेशबहादुर पालका अनुसार घाइते हुनेमा ६० वर्षीय शिवनन्दन यादव, उनकी श्रीमती दुर्गीदेवी यादव, छोरा जमाहिर यादव र बुहारी रीता यादव छन्।

गम्भीर घाइते रीता यादवलाई उपचारका लागि जनकपुर पठाइएको छ भने अन्य तीन जनाको मिर्चैयामै उपचार भइरहेको प्रहरीले जनाएको छ।

पीडित परिवारका अनुसार १५–२० जनाको समूहले घरमै आएर खुकुरी, रड र भाटा जस्ता हतियार प्रयोग गर्दै आक्रमण गरेको थियो।

घटनामा संलग्न भएको आरोपमा प्रहरीले मिर्चैया–३ का पूर्ववडाध्यक्ष हरिकुशियैत यादव, किशोर यादव, अशोक यादव र जगदीश यादवलाई नियन्त्रणमा लिएको जनाएको छ। उनीहरू छिमेकी गाउँ सिसबोनीका बासिन्दा हुन्।

प्रहरीले घटनाको कारणबारे थप अनुसन्धान भइरहेको जनाएको छ।

काठमाडौ,३ कार्तिक ।सुनसरी प्रहरीले लागूऔषध कारोबारमा संलग्न सात जनालाई पक्राउ गरेको छ। विशेष सूचनाका आधारमा जिल्लाका धरान, इनरुवा र रामधुनी क्षेत्रमा सञ्चालन गरिएको छुट्टाछुट्टै कारबाहीमा उनीहरू पक्राउ परेका हुन्।

जिल्ला प्रहरी कार्यालय सुनसरीका प्रमुख डीएसपी योगराज खतिवडाका अनुसार आइतबार इनरुवा नगरपालिका–४ बसचोकस्थित पूर्व–पश्चिम राजमार्गमा लागूऔषध ओसारपसार भइरहेको सूचनाका आधारमा प्रहरी टोली खटिएको थियो।

सो क्रममा इटहरी उपमहानगरपालिका–१८ का ३४ वर्षीय राजु चौधरी र रामधुनी नगरपालिका–४ का २८ वर्षीय रोशन हरिजनलाई पक्राउ गरिएको हो।
चेकजाँचका क्रममा राजु चौधरीको गुप्ताङ्ग भागमा लुकाइराखिएको १९.६९ ग्राम ब्राउन सुगर फेला परेको प्रहरीले जनाएको छ।

दुवैजनालाई नियन्त्रणमा लिएर जिल्ला प्रहरी कार्यालय सुनसरीमा थप अनुसन्धान भइरहेको प्रहरीले जनाएको छ।

त्यस्तै, इलाका प्रहरी कार्यालय पकलीबाट खटिएको टोलीले रामधुनी नगरपालिका–६ का सुमनकुमार चौधरीको घरमा खानतलासी गर्दा लुकाइराखिएको ५.७३ ग्राम ब्राउन सुगर बरामद गरेको छ।

सो क्रममा घरधनी चौधरी र उनीसँगै रहेका धरान उपमहानगरपालिका–८ का ३१ वर्षीय सुमन राईलाई समेत पक्राउ गरिएको डीएसपी खतिवडाले बताए।

त्यसैगरी, इलाका प्रहरी कार्यालय धरानबाट खटिएको अर्को टोलीले धरान उपमहानगरपालिका–११ मा विकास परियारको घरमा खानतलासी गर्दा डेकोलिक ५०० र ट्रामोल ५०० ट्याब्लेट फेला पारेको छ।

उक्त लागूऔषधसहित ३१ वर्षीय विकास परियार, २२ वर्षीय विजय परियार र ३६ वर्षीय इन्द्र राईलाई नियन्त्रणमा लिइएको प्रहरीले जनाएको छ।

दुवै घटनाका पक्राउ परेकाहरूमाथि लागूऔषध नियन्त्रण ऐन अन्तर्गत आवश्यक कानुनी कारबाही अघि बढाइएको प्रहरीले जानकारी दिएको छ।

दाङ,३ कार्तिक । दाङको घोराहीमा वडाध्यक्ष र इन्जिनियरसहित नौ जना जुवा खेल्दै गरेको अवस्थामा पक्राउ परेका छन्। घोराही उपमहानगरपालिका–१८ का वडाध्यक्ष भरतमणि अर्याल र सोही उपमहानगरपालिकामा कार्यरत इन्जिनियर प्रवीण रावतसहित नौ जनालाई गए राति काठेकोलस्थित एक होटेलबाट नियन्त्रणमा लिइएको हो।

दाङ जिल्ला प्रहरी कार्यालयका प्रवक्ता डीएसपी चक्रबहादुर शाहका अनुसार पक्राउ परेकाहरूको साथबाट नगद ३ लाख ४५ हजार ९ सय १५ रुपैयाँ र तीन गड्डी तास बरामद गरिएको छ।

पक्राउ पर्ने अन्यमा घोराही–१८ का कृष्णबहादुर घर्ती, पूर्व इन्स्पेक्टर नारायण प्रसाद अधिकारी, मितेरी हस्पिटलका सञ्चालक माधव भण्डारी, म्यानपावर सञ्चालक विक्रम केसी, लंक बहादुर बुढा, सागर बुढा र राप्ती गाउँपालिका–२ का तेज प्रसाद आचार्य रहेका छन्।

प्रहरीले पक्राउ परेकामाथि जुवा तास खेलाएको अभियोगमा आवश्यक अनुसन्धान अघि बढाएको जनाएको छ।