काठमाडौ,१६ कार्तिक । माओवादी केन्द्र र एकीकृत समाजवादी पार्टीबीचको एकता घोषणा कार्तिक १९ गते हुने भएको छ। सुकेधारास्थित एक पार्टी प्यालेसमा बिहान ११ बजे आठ वामपन्थी दलबीच औपचारिक रूपमा एकता घोषणा गरिने भएको हो।

एकीकृत समाजवादीका वार्ता टोली सदस्य प्रकाश ज्वालाका अनुसार यसअघि सोमबार घोषणा गर्ने तयारी भए पनि प्राविधिक कारणले दुई दिन पछि सारिएको हो।

सहमति अनुसार नयाँ एकीकृत पार्टीको नाम ‘नेपाल कम्युनिष्ट पार्टी समाजवादी’ राखिनेछ। तर, चुनाव चिन्हबारे अझै टुंगो लागेको छैन।

एकता कार्यक्रममा माओवादी केन्द्र र एकीकृत समाजवादीसँगै विप्लव नेतृत्वको नेकपाबाट हालै अलग भएका चिरन पुन समूह, महिन्द्र राय यादव नेतृत्वको नेसपा, प्रेमबहादुर सिंह समूह, राजु कार्की नेतृत्वको नेकपा समाजवादी, र सुभाषराज काफ्ले नेतृत्वको जनसमाजवादी पार्टी पनि सहभागी हुने भएका छन्।

एकता घोषणापछि कात्तिक २० गते नयाँ एकीकृत पार्टीको पहिलो बैठक बस्ने तयारी छ। माओवादी केन्द्रले १८ गते विघटित केन्द्रीय कमिटी बैठक बोलाएको छ भने एकीकृत समाजवादीले पनि तयारी बैठक सम्पन्न गरिसकेको छ।

तर, पार्टी एकताबारे सबै पक्ष एकमत छैनन्। माओवादीका जनार्दन शर्मा र समाजवादीका झलनाथ खनाल तथा घनश्याम भुसालले एकता प्रक्रियामा असहमति जनाएका छन्। उनीहरू सम्भवत: एकतामा सहभागी नहुने जनाइएको छ।

काठमाडौ,१४ कार्तिक । पूर्वप्रधानमन्त्री डा. बाबुराम भट्टराईले राष्ट्रिय स्वतन्त्र पार्टी (रास्वपा) का सभापति रवि लामिछानेलाई जेलमुक्त गरी उनकै नेतृत्वमा नयाँ वैकल्पिक शक्ति बनाउने आवश्यकता औँल्याएका छन्।

शुक्रबार रास्वपा द्वारा आयोजित ‘वृहत् राजनीतिक संवाद’ कार्यक्रममा बोल्दै उनले पुराना दलहरू: कांग्रेस र कम्युनिष्टलाई परास्त गर्न सबै नयाँ शक्तिहरू एक ठाउँमा उभिनुपर्ने बताए।

डा. भट्टराईले लामिछानेको नेतृत्व क्षमता र प्रतिभाको आवश्यकता रहेको भन्दै भने, -“रविजीलाई पनि निकालौँ कुनै तरिकाले, उहाँको एउटा नेतृत्वको पनि आवश्यकता छ। उहाँको जुन मुद्दा छ, त्यसलाई बाहिरै रहेर फेस गर्ने वातावरण बन्न सक्दाखेरि उहाँको क्षमता, प्रतिभाको प्रयोग हुन सक्थ्यो।” उनले भेदभाव महसुस गरी पनि लामिछानेको रिहाइको पक्षमा हस्ताक्षर गरेको स्मरण गराए।

उनले रास्वपा, रेशम चौधरी, सिके राउत लगायतका नयाँ शक्तिहरूलाई अहंकार त्यागेर एकै पार्टीमा आउन आग्रह गरे। दलीय नाम र पहुँचले जनतालाई ठगेको भन्दै दंगामुक्त, साँच्चै विकल्प दिने काम उनीहरू गर्नुपर्ने उनको भनाइ थियो।

डा. भट्टराईले पुराना दलहरूको जरा गहिरो रहेको भन्दै थपे, “कांग्रेस र कम्युनिष्ट भन्ने ती दुई धाराहरू सात वर्षदेखि बनेका हुन् र तिनको जरा तलसम्म झाँगिएको छ। अहिले हल्लिएको छ तर पूरै उखेलिएको छैन।” नयाँ र वैकल्पिक शक्ति एक ठाउँमा नआए पुराना शक्तिलाई परास्त गर्न गाह्रो हुने उनको तर्क थियो।

उनले रास्वपालाई लक्षित गर्दै भने: “तपाईंहरू अहिले स्थापित दलहरूमध्ये अलि ठूलो हुनुहुन्छ भनी एक्लै सकिन्छ भन्ने सोच गर्नु स्वाभाविक छ, तर सबै नयाँ शक्ति सँगै नभए पुराना शक्ति परास्त गर्न कठिन हुनेछ।”

काठमाडौ,१४ कार्तिक। संस्थापन र इतर पक्षबीच महाधिवेशनको मितिलाई लिएर विवाद बढेपछि नेपाली कांग्रेसको जारी केन्द्रीय समिति बैठक स्थगित भएको छ। आज दिउँसो १ बजे बस्ने भनिएको बैठक सुरु हुन नपाई स्थगित गरिएको हो।

अर्को बैठक आइतबार दिउँसो १ बजेका लागि बोलाइएको छ।

सूत्रका अनुसार, कार्यवाहक सभापति पूर्णबहादुर खड्काको सहमति नलिएरै महामन्त्री गगन थापाले मंसिरभित्र १५ औँ महाधिवेशन गर्ने गरी कार्यतालिका प्रस्तुत गर्ने तयारी गरिरहेका थिए।

महामन्त्री थापा र अर्का महामन्त्री विश्वप्रकाश शर्माले बिहान कार्यवाहक सभापति खड्कासँग भेटेर सहमति नपाए पनि कार्यतालिका प्रस्तुत गर्ने तयारी रहेको जानकारी दिएका थिए।

स्रोतले जनाएको छ, कार्यतालिका प्रस्तुत गर्न नदिए आफू बैठकमै सहभागी नहुने धम्की पनि दिइएको थियो। बैठकमा द्वन्द्व बढ्ने जोखिम देखिएपछि कार्यवाहक सभापति खड्काले थप समय लिएर बैठक स्थगित गर्ने निर्णय गरेका हुन्।

काठमाडौ, ११ कार्तिक । नेत्रविक्रम चन्द ‘विप्लव’ नेतृत्वको कम्युनिस्ट पार्टी नेपाल ले निर्वाचन आयोगमा दल दर्ताका लागि निवेदन दिएको छ। आज दिउँसो प्रवक्ता खड्गबहादुर विश्वकर्मा ‘प्रकाण्ड’को नेतृत्वमा आयोग पुगेको टोलीले पार्टी दर्ता प्रक्रिया औपचारिक रूपमा सुरु गरेको हो। पार्टीले ‘कम्युनिस्ट पार्टी नेपाल’ नाममा दर्ता गराउने प्रस्ताव गरेको छ। निवेदन बुझाएपछि प्रवक्ता प्रकाण्डले यो कदमले देशमा देखिएका विद्यमान समस्या समाधान र राजनीतिक परिवर्तनमा महत्वपूर्ण भूमिका खेल्ने विश्वास व्यक्त गरे।

उनले भने, “आज हामीले निर्वाचन आयोगमा पार्टी दर्ता गर्ने प्रक्रिया सुरु गरेका छौँ। यसले देशका समस्याको समाधान र नयाँ अवसरलाई वास्तविकतामा रूपान्तरण गर्ने दिशामा विशेष योगदान पुर्‍याउनेछ।”

काण्डका अनुसार निर्वाचन लोकतान्त्रिक अभ्यासको मूल आधार भएकाले पार्टी पनि यही विधि अनुसार जनताको निर्णय र सहभागितामार्फत अघि बढ्ने तयारीमा छ। उनले जनताको अधिकार, स्वनिर्णय र राजनीतिक सहभागितालाई सुनिश्चित गर्न निर्वाचनलाई सबैभन्दा प्रभावकारी माध्यमका रूपमा लिने बताएका छन्।
उनले थपे, “नेपालको राजनीतिमा जनताले अवरोधबिना प्रवेश र फैसला गर्न पाउने सबैभन्दा प्रजातान्त्रिक विधि निर्वाचन नै हो। त्यसैले हाम्रो पार्टीले पनि सोही विधि अपनाउँदै आयोगमा दर्ता गराउन लागेको हो।”
उनले हालैको जेन–जी आन्दोलनपछि बनेको सरकारले ठूला चुनौतीहरूको सामना गर्नुपर्ने भन्दै राष्ट्रिय राजनीतिमा नयाँ प्रकारको छलफल र विकल्प आवश्यक रहेको पनि उल्लेख गरे। यस क्रममा निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले कम्युनिस्ट पार्टी नेपाल नाममा दर्ता हुन आएको सम्भवतः यो पहिलो पार्टी भएको बताए।

उनले भने, “कम्युनिस्ट पार्टी नेपाल भनेर दर्ता हुन आएको सायद यो पहिलो पार्टी होला।” भण्डारीका अनुसार अहिलेको अवस्थामा निर्वाचनको व्यवस्थापन र कार्यान्वयन प्रक्रिया जटिल बनेको छ, त्यसैले आयोग उच्च सतर्कताका साथ काम गरिरहेको छ।
उनले चेतावनी दिए, “सानोभन्दा सानो कुराले पनि निर्वाचन विथोलिन सक्छ। त्यसैले हामी अहिलेको अवस्थामा अत्यन्त सावधानीपूर्वक निर्वाचन तयारीमा जुटिरहेका छौँ।”

काठमाडौ,३ कार्तिक । नेकपा (माओवादी केन्द्र)का संयोजक पुष्पकमल दाहाल ‘प्रचण्ड’की छोरी गंगा दाहालले संयोजकको सचिवालयबाट राजीनामा दिएकी छन्।

गंगाले सोमबार सामाजिक सञ्जालमा स्टाटस लेख्दै राजीनामाको जानकारी गराएकी हुन्। उनले आफू पार्टीकी जिम्मेवार कार्यकर्ता भएर निरन्तर सक्रिय रहने बताएकी छन्।

उनका अनुसार पछिल्लो समय आफूलाई देखाएर बुबा प्रचण्ड र माओवादी केन्द्रविरुद्ध योजनाबद्ध रूपमा प्रहार भइरहेकाले सचिवालयको जिम्मेवारीबाट बाहिरिने निर्णय गरेकी हुन्।

गंगाले लेखेकी छन्, “निरन्तर मलाई देखाएर नेकपा (माओवादी केन्द्र)का संयोजक प्रचण्ड र समग्र पार्टीविरुद्ध योजनावद्ध प्रहार भइरहेका कारणले गर्दा मैले संयोजकको सचिवालयबाट राजीनामा दिएकी छु।”

उनले स्टाटसमा लेखेकी छन्, “भाइ प्रकाश दाहालको निधन र आमा सीता दाहाल बिरामी भएपछि पार्टी नेताहरूको सल्लाहमा म सचिवालयमा रहेर बुवालाई सहयोग गर्न आएको थिएँ। सधैं निस्वार्थ भावले काम गरेँ तर जति राम्रो गर्न खोजे पनि विवादमा तानिनुपर्‍यो।”

गंगाले केही संचार माध्यमहरूले आफूमाथि गरेको ‘कुप्रचार’ र ‘भ्रामक समाचार’प्रति असन्तुष्टि जनाउँदै लेखेकी छन्, “माथि निरन्तर प्रहार भइरहेछ। कहिले लाखौंको ब्याग भनेर, कहिले लाखौंको घडी भनेर लेखिन्छ, तर मसँग त्यस्ता वस्तुहरू नै छैनन्। साथीहरूले दिएको सानो उपहार पनि अब छैन, जलेर खरानी भइसकेको छ।”

उनले सचिवालयबाट बाहिरिए पनि पार्टीप्रति आफ्नो प्रतिबद्धता जारी रहने स्पष्ट पार्दै लेखेकी छन्, “पार्टीको जिम्मेवार कार्यकर्ता भएकाले आजीवन रूपमा पार्टीमा क्रियाशील रहनेछु।”

राजीनामा सँगै उनले सबै पार्टी नेता, कार्यकर्ता र नागरिकप्रति आभार प्रकट गर्दै दिपावली, छठ र नेपाल संवत् लगायतका पर्वको शुभकामना पनि दिएकी छन्।

काठमाडौ,३ कार्तिक । निर्वाचन आयोगमा नयाँ दल दर्ताका लागि निवेदन दिने राजनीतिक समूहहरूको संख्या १७ पुगेको छ। आयोगका अनुसार सबै १७ दल दर्ताको प्रक्रियामा रहेका छन्।

निर्वाचन आयोगका सूचना अधिकारी सुमन घिमिरेका अनुसार जेनजी आन्दोलन अघि १० वटा दलले दर्ताका लागि निवेदन दिएका थिए भने आन्दोलनपछि थप सात दलले निवेदन दिएका हुन्। उनका अनुसार ती सबै निवेदनहरू हाल आयोगको अध्ययनको क्रममा छन्।

हालसम्म आयोगमा दर्ता भएका दलहरूको संख्या १२४ पुगेको छ। यदि निवेदन दिएका सबै दल दर्ता भए, दलको संख्या अझ बढ्नेछ।

यसबीच दुई पार्टी फुटेर नयाँ दल बनेका छन् — जनमत पार्टी फुटेर जनस्वराज पार्टी दर्ता भएको छ भने नेपाल जनमुक्ति पार्टी फुटेर अर्को नयाँ दल दर्ता भएको आयोगले जनाएको छ।

आयोगका अनुसार केही दलको विधान स्पष्ट हुनुपर्ने, केहीको सनाखतका लागि आवश्यक सदस्य संख्या नपुगेको, र केहीको चुनाव चिन्ह सम्बन्धी समस्या रहेको कारण अध्ययन र संशोधन प्रक्रिया चलिरहेको छ।

आयोगले एक दललाई चुनाव चिन्ह परिवर्तन गर्न समेत सुझाव दिएको छ। ‘राष्ट्रिय जेनजी पार्टी नेपाल’ ले प्रस्ताव गरेको ‘क्रस खुकुरी’ चिन्ह फेर्न आयोगले आग्रह गरेको हो।

यस्तै, राष्ट्रिय परिवर्तन पार्टी पनि दर्ता प्रक्रियामा रहेको छ। सो पार्टीका अध्यक्ष अजयकुमार हुन् र चुनाव चिन्ह ‘बाँसुरी’ प्रस्ताव गरिएको छ।

त्यस्तै, नेपाल लिबरल पार्टी नामक दल पनि दर्ता प्रक्रियामा छ, जसका अध्यक्ष गोपीलाल न्यौपाने हुन् र यसको चुनाव चिन्ह ‘सिक्का’ प्रस्ताव गरिएको छ।

यसअघि नै नेपाल नागरिक पार्टी, उज्यालो नेपाल पार्टी, श्रम संस्कृति पार्टी, र गतिशील लोकतान्त्रिक पार्टी ले पनि दल दर्ताका लागि निवेदन दिएका थिए।

श्रम संस्कृति पार्टीका अध्यक्षमा धरानका मेयर हर्क साम्पाङ रहेका छन् भने गतिशील लोकतान्त्रिक पार्टीका अध्यक्ष दिनेश प्रसाईं हुन्।

निर्वाचन आयोगले सबै नयाँ दलको विवरण अध्ययन गर्ने कार्य जारी रहेको जनाएको छ।

काठमाडौ,३ कार्तिक । ‘राष्ट्रिय जेनजी पार्टी नेपाल’ नामको नयाँ राजनीतिक दल दर्ताका लागि निर्वाचन आयोगमा निवेदन दर्ता गरिएको छ। दलको चुनाव चिन्ह ‘क्रस खुकुरी’ प्रस्ताव गरिएको छ।

हीराप्रसाद सेती (किरण विक) अध्यक्ष रहेको उक्त दलले प्रारम्भिक केन्द्रीय समितिमा २१ जना सदस्य रहेको उल्लेख गरेको छ। पार्टीको केन्द्रीय कार्यालय काठमाडौंको अनामनगरमा रहने बताइएको छ।

दलको नेतृत्वमा मुना विक उपाध्यक्ष, गोपाल आचार्य महासचिव तथा सञ्जु नेपाली, मोहम्मद आयातुल्ला रहमान र होम श्रेष्ठ सचिव रहेका छन्।

पार्टीका अनुसार युवा नेतृत्व, संघीयता, धर्मनिरपेक्षता, समानुपातिक समावेशिता, वातावरण संरक्षण, यौनिक तथा लैंगिक अल्पसंख्यक अधिकार र गणतन्त्रलाई संगठनका आधारस्तम्भका रूपमा लिइएको छ।

काठमाडौं,२कार्तिक । नेकपा (एमाले) का अध्यक्ष केपी शर्मा ओलीले देशमा अराजकता निरन्तर रहिरहे आफू पुनः प्रधानमन्त्रीमा फर्किने सम्भावना बढ्ने बताएका छन्।

आइतबार सम्पादकहरूसँगको अन्तरक्रियामा बोल्दै उनले वर्तमान अवस्थाप्रति असन्तुष्टि व्यक्त गर्दै यस्तो टिप्पणी गरेका हुन्।

उनले भने, “यस्तै भयो भने केपी ओली फेरि प्रधानमन्त्रीमा फर्किने सम्भावना बढ्छ। जनताले यो कुरा सहँदैनन्, किन सहने? अरुबाट केही हुन सकेन, यस्तो अराजकता।”

ओलीले सम्पादकहरू नै विशेष सम्पादकीय लेख्दै ‘केपी ओली फिर्ता ल्याऊँ’ भन्ने अवस्था आउन सक्ने दाबी पनि गरे। जनताले पुनः विश्वास र समर्थन दिएमा आफू प्रधानमन्त्री बन्न तयार रहेको उनको भनाइ छ।

काठमाडौँ,१ कार्तिक । नेकपा (एमाले)का अध्यक्ष केपी शर्मा ओलीले सरकारले आगामी फागुन २१ गते निर्वाचन गर्ने भनेर जनतालाई झुक्याउने काम गरिरहेको आरोप लगाएका छन्।

शनिबार पार्टी मुख्यालय च्यासलमा आयोजित सम्पर्क समन्वय कमिटीको कार्यक्रममा बोल्दै उनले सरकारले राजनीतिक दलहरूलाई निषेध गरेर चुनाव गराउने भन्दै जनतालाई धोका दिन खोजेको बताए।

उनका अनुसार सरकारले वास्तवमै निर्वाचन गराउने सोच नभएकाले नै एमालेले प्रतिनिधिसभा पुनर्स्थापनाको माग अघि सारेको हो। उनले जेनजी आन्दोलनका क्रममा लुटिएका हतियारसमेत फिर्ता गराउन नसक्ने सरकारले “निर्वाचनको नाममा नाटक मञ्चन” गरिरहेको टिप्पणी गरे।

अध्यक्ष ओलीले वर्तमान सरकारलाई “जग नै नभएको असंवैधानिक सरकार” भन्दै यसले जनतालाई भ्रममा पार्ने काम मात्रै गरिरहेको आरोप लगाए। उनले जेनजी आन्दोलनको सन्दर्भमा व्यङ्ग्य गर्दै भने, “जेनजी आमैलाई प्रधानमन्त्री बनाएको सरकार हो यो।”

त्यस्तै, उनले आफूलाई सरकारले काठमाडौं उपत्यकाबाहिर नजान प्रतिबन्ध लगाएकोमा आपत्ति जनाउँदै भने, “म आवश्यक परे देशको जुनसुकै ठाउँमा जान सक्छु।”

संवाद र सहकार्य बिना निषेध र दमनमार्फत चुनाव गराउने सरकारको तयारीलाई उनले “जनता ठग्ने मेलो” भएको टिप्पणी गरे।

काठमाडौँ,१ कार्तिक । नेपाल कम्युनिष्ट पार्टी (माओवादी केन्द्र) का महाधिवेशन आयोजक समितिका संयोजक पुष्पकमल दाहाल ‘प्रचण्ड’ले आगामी फागुन २१ गते हुने निर्वाचनलाई सफल बनाउन सबै पक्ष एकजुट हुनुपर्ने बताएका छन्।

दीपावली, नेपाल संवत् र छठ पर्वका अवसरमा अखिल नेपाल ट्रेड युनियन महासङ्घ (अन्टुफ)ले आज पार्टी मुख्यालय पेरिसडाँडामा आयोजना गरेको चियापान तथा शुभकामना आदानप्रदान कार्यक्रममा उनले अहिले देश जटिल परिस्थितिबाट गुज्रिरहेको बताउँदै राष्ट्रहितका लागि सबै राजनीतिक शक्ति, नागरिक समाज, बुद्धिजीवी र सञ्चारकर्मीको ऐक्यबद्धता अपरिहार्य रहेको उल्लेख गरे।

उनले भने, “संविधान र लोकतन्त्र जोगाउने सबैभन्दा सहज, समावेशी र राष्ट्रहितको विकल्प भनेकै आगामी फागुन २१ गतेको निर्वाचन हो। त्यसलाई सफल पार्न सबै पक्षले साझा प्रतिबद्धता जनाउनुपर्छ।”

पूर्वप्रधानमन्त्री दाहालले अन्तरिम सरकार तोकिएको मितिमा नै निर्वाचन गराउन गम्भीर रहेको बताउँदै अन्तर्राष्ट्रिय समुदायले पनि निर्वाचन सफल बनाउन सहयोग गर्ने विश्वास व्यक्त गरे।

जेनजी आन्दोलनका माग सम्बोधन गर्न संविधान संशोधन आवश्यक रहेको बताउँदै उनले भने, “निर्वाचनबाट आउने नयाँ संसद्ले संविधान परिमार्जनको प्रक्रिया अगाडि बढाउनेछ, जनताको अपेक्षा पूरा गर्न हामी तयार छौँ।”

उनका अनुसार आसन्न निर्वाचन संविधानसम्मत र लोकतान्त्रिक प्रक्रियाको हिस्सा भएकाले राष्ट्रिय सहमतिका साथ चुनाव सम्पन्न गर्नु मुलुकको आवश्यकता हो।

समाजवादी मोर्चामा आबद्ध वाम शक्तिबीच चाँडै औपचारिक एकता घोषणा हुने जानकारी दिँदै दाहालले लोकतन्त्रवादी र राष्ट्रवादी शक्तिहरू पनि एउटै मोर्चामा आउनुपर्ने बताए। उनले जेनजी आन्दोलनलाई क्रान्तिकारी आन्दोलनको उत्तराधिकारी भन्दै भने, “भदौ २३ गतेको आन्दोलनले युवा पुस्ताले आफ्नो राजनीतिक उपस्थितिको प्रमाण प्रस्तुत गरिसकेको छ, उनीहरू अरूका होइनन्, क्रान्तिकारीका उत्तराधिकारी हुन्।”