काठमाडौं,२६ माघ । एक अवैध गोदाममा सशस्त्र प्रहरीले छापा हान्ने क्रममा तस्कर समूहको आक्रमणबाट तीन जना सशस्त्र प्रहरी घाइते भएका छन्। वीरगञ्ज महानगरपालिका–१० मा रहेको गोदाममा छापा हान्ने क्रममा उनीहरूमाथि आक्रमण भएको हो।

आदर्शनगरस्थित मदनप्रसाद गुप्ताको घरमा अवैध रूपमा गोदाम गरी राखिएको कपडा बरामद गर्ने क्रममा झडप भएको सशस्त्र प्रहरी बल नेपालका सहप्रवक्ता शैलेन्द्र थापाले जानकारी दिए।

सशस्त्र प्रहरी बल नेपाल नं. १३ गण पर्सा, सीमा सुरक्षा गुल्म वीरगञ्ज तथा वीरगञ्ज भन्सार कार्यालयको संयुक्त टोलीले सोमबार बिहान गोदाममा छापा मारी अवैध रूपमा भण्डारण गरिएको करिब ७ लाख रुपैयाँ मूल्य बराबरको कपडा बरामद गरेको हो।

कपडा बरामद गरेपछि तस्कर समूह आक्रमणमा उत्रिएको र ढुंगामुढा प्रहार गर्दा सशस्त्र प्रहरी बल नेपालको एउटा वानटन र एउटा स्कार्पियो गाडीमा समेत क्षति पुगेको सहप्रवक्ता थापाले बताए ।
घाइते सशस्त्र प्रहरीको अवस्था सामान्य रहेको र घटनाबारे थप अनुसन्धान भइरहेको जनाइएको छ।

दाङ,२३ माघ। जिल्ला प्रहरी कार्यालय दाङले विभिन्न मुद्दामा अदालतबाट फैसला भई लामो समयदेखि फरार रहेका १७ जना प्रतिवादीलाई पक्राउ गरेको छ।

फैसला कार्यान्वयनलाई प्रभावकारी बनाउने उद्देश्यले जिल्ला प्रहरी कार्यालय दाङ तथा मातहतका प्रहरी इकाइहरूले मिति २०८२ माघ १० गतेदेखि १७ गतेसम्म विशेष खोजतलास अभियान सञ्चालन गरेका थिए। सोही अभियानका क्रममा विभिन्न मुद्दामा फरार रहेका १७ जना प्रतिवादी पक्राउ परेका हुन्।

पक्राउ परेका प्रतिवादीहरूलाई फैसला कार्यान्वयनका लागि दाङ जिल्ला अदालत, घोराहीमा पेश गरिएको जिल्ला प्रहरी कार्यालयले जनाएको छ।

प्रहरीका अनुसार पक्राउ परेका प्रतिवादीहरूबाट कुल ३१ लाख ७९ हजार २७६ रुपैयाँ राजस्व संकलन भएको छ। साथै उनीहरूलाई विभिन्न मुद्दामा १७ दिनदेखि ५ वर्ष ७ महिना १ दिनसम्म कैद सजाय फैसला भएको थियो।

जिल्ला प्रहरी कार्यालय दाङका प्रवक्ता एवं सूचना अधिकारी प्रहरी नायव उपरीक्षकले उक्त जानकारी दिएका ।

दाङ,२२ माघ । दाङको अमिलियामा प्रहरीले भन्सार छली ल्याइएका लाखौँ रुपैयाँ बराबरका जिम सामग्री बरामद गरेको छ। लमही नगरपालिका–९ स्थित अमिलिया चोकमा गएराति गरिएको विशेष चेकजाँचका क्रममा ती सामग्री नियन्त्रणमा लिइएको हो।

इलाका प्रहरी कार्यालय अमिलियाबाट खटिएको प्रहरी टोलीले बुटवलबाट धनगढीतर्फ जाँदै गरेको युके ०६ सिबी ४६३३ नम्बरको भारतीय ट्रकलाई रोकेर जाँच गरेको थियो। चेकजाँचका क्रममा ट्रकमा लोड गरिएका जिमका सामग्रीहरूको कुनै पनि बिल–भर्पाइ नपाइएको प्रहरीले जनाएको छ।

प्रहरीका अनुसार बरामद गरिएको जिम सामग्रीको जम्मा मूल्य २६ लाख ८१ हजार ६ सय ५८ रुपैयाँ बराबर आँकलन गरिएको छ। ट्रकसहित सबै सामग्री नियन्त्रणमा लिई थप अनुसन्धान तथा कानुनी कारबाहीका लागि राजस्व अनुसन्धान कार्यालय कोहलपुर, बाँके पठाइएको जिल्ला प्रहरी कार्यालय दाङका प्रवक्ता डीएसपी रेशम बोहराले जानकारी दिए।

तस्बिरःएआई

बांके, २१ माघ। भारत–नेपाल सिमानाका रुपैडीहाबाट एक किशोरीको उद्दार गरिएको छ । रूपैडीहा चेकपोस्टमा गरिएको नियमित जाँचका क्रममा बेचविखनको जोखिममा रहेकी १५ वर्षीया नाबालिग नेपाली किशोरीको सकुशल उद्धार गरिएको हो।

सशस्त्र सीमा बल (एसएसबी) को बीआईटी टोली, एन्टी ह्युमन ट्राफिकिङ युनिट तथा देहात संस्थाको संयुक्त सक्रियतामा किशोरीलाई भारतीय क्षेत्रबाट उद्धार गरिएको भारतीय प्रहरीले जनाएको छ।

नियमित सोधपुछका क्रममा किशोरीको गतिविधि शंकास्पद देखिएपछि सुरक्षाकर्मीले थप अनुसन्धान थालेका थिए।

अनुसन्धानका क्रममा किशोरीले आफू जुम्ला जिल्ला, चाना वडा नं.–१ की १५ वर्षीया रहेको बताएकी थिइन्। कागजात र बयानका आधारमा उनी नाबालिग भएको पुष्टि भएपछि मानव बेचविखनको जोखिममा रहेको खुलेको हो।

किशोरीसँगै रहेका बाँके खजुरा वडा नं.–७ का १९ वर्षीय युवक साहिल कुरेशीलाई नियन्त्रणमा लिइएको छ। प्रहरीका अनुसार उनले विवाह तथा रोजगारीको प्रलोभन देखाएर किशोरीलाई भारत लैजान लागेको स्वीकार गरेका छन्।

सुरक्षाकर्मीले मोबाइलमार्फत किशोरीकी आमासँग सम्पर्क गर्दा उनी परिवारलाई जानकारी नदिई घरबाट निस्किएको खुलेको थियो। आवश्यक कानुनी प्रक्रिया पूरा गरी देहात इन्डिया, बहराइचको सहकार्यमा किशोरीलाई नेपालस्थित संरक्षण गृहमा पठाइएको छ।
पक्राउ परेका युवकलाई थप अनुसन्धान र कानुनी कारबाहीका लागि नेपाल प्रहरीलाई बुझाइएको भारतीय प्रहरीले जनाएको छ।

मानव बेचविखनको दृष्टिले जमुनाहा नाका लामो समयदेखि उच्च जोखिमयुक्त क्षेत्र मानिँदै आएको छ। माइती नेपाल नेपालगन्जका अनुसार पछिल्लो एक वर्षमा मात्रै यस नाकाबाट जोखिमपूर्ण अवस्थामा रहेका करिब ६ सय महिला तथा किशोरीको उद्धार गरी परिवारमा पुनःमिलन गराइएको छ।

काठमाडौ,२० माघ । मोरङको रंगेली नगरपालिकामा एक युवकले श्रीमतीको हत्या गरी आफूले पनि आत्महत्या गरेको घटना सार्वजनिक भएको छ।

रगेली नगरपालिका–५ बहुवनका अन्दाजी २१ वर्षीय मुकेशकुमार मण्डलले सोही वडाको धनपट्टीस्थित ससुराली घर पुगेर २१ वर्षीया पत्नी अम्बिकाकुमारी मण्डलको चक्कु प्रहार गरी हत्या गरेको जिल्ला प्रहरी कार्यालय मोरङले जनाएको छ। प्रहरीका अनुसार घटना मंगलबार बिहान करिब २ः४५ बजे भएको हो।

प्रारम्भिक अनुसन्धानमा अम्बिकाकुमारीको घटनास्थलमै मृत्यु भएको खुलेको छ। पत्नीको हत्या गरेपछि मुकेशले पनि सोही चक्कुले आफ्नै घाँटी रेटेर आत्महत्या गरेको प्रारम्भिक अनुमान प्रहरीले गरेको छ।

हाल दुवै जनाको शव घटनास्थलमै रहेको छ। घटनाको अनुसन्धानका लागि मोरङ प्रहरी प्रमुख एसपी कवित कटवालसहितको टोली घटनास्थल पुगेको छ। प्रहरी टोलीले मुचुल्का उठाउने कार्य गरिरहेको जनाएको छ।

काठमाडौ,२० माघ। उदयपुर सिमेन्ट उद्योग लिमिटेडमा सिमेन्ट उत्पादनका क्रममा प्रयोग हुने कच्चा पदार्थ ‘क्लिङ्कर’ मा करोडौँ भ्रष्टाचार अभियोगमा तत्कालीन महाप्रबन्धक सुरेन्द्रकुमार पौडेलसहित ८ जना कर्मचारीविरुद्ध विशेष अदालतमा मुद्दा दायर गरिएको छ ।

अख्तियारका अनुसार आर्थिक वर्ष २०७४/०७५ देखि २०७७ पुस मसान्तसम्मको अवधिमा कागजी रेकर्डमा देखाइएको भन्दा भौतिक परीक्षण गर्दा कुल ३८,७६९ मेट्रिक टन क्लिङ्कर कम पाइएको छ । कर्मचारीहरूले आपसी मिलेमतोमा स्टक कम देखाई ४६ करोड ५२ लाख ७४ हजार ४ सय २६ रूपैयाँ २६ पैसा बराबरको सार्वजनिक सम्पत्ति हानीनोक्सानी गरेको आयोगको भनाइ छ ।

अभियोगमा तत्कालीन महाप्रबन्धक सुरेन्द्रकुमार पौडेलसँग १२ करोड ४७ लाख २२ हजार २४२ रूपैयाँ बिगो दाबी गरिएको छ । त्यस्तै अन्य प्रतिवादीहरू तत्कालीन निमित्त महाप्रबन्धकहरू महेशप्रसाद काफ्लेसँग १२ करोड ६३ लाख ६९ हजार १६८ रुपैयाँ, नवलकिशोर शाहसँग ४६ करोड ५२ लाख ७४ हजार ४२६ रूपैयाँ बिगो दाबी गरिएको छ ।

तत्कालीन उत्पादन महाशाखा प्रमुख संजय कुमार लाल, तत्कालीन भण्डार महाशाखा प्रमुख महेशप्रसाद साह, तत्कालीन क्लिङ्कर उत्पादन विभाग प्रमुख रवीचन्द्र पौडेल, तत्कालीन सिमेन्ट उत्पादन विभाग प्रमुख हरिप्रसाद अधिकारी र तत्कालीन बिक्री विभाग प्रमुख रामबहादुर जीसीसँग पनि जनही ४६ करोड ५२ लाख ७४ हजार ४२६ रुपैयाँ २६ पैसा बिगो दाबी गरिएको छ ।

उद्योग, वाणिज्य तथा आपूर्ति मन्त्रालय र महालेखा परीक्षकको प्रतिवेदनले क्लिङ्करको खपत बढी तर उत्पादन घटी देखाएको प्रतिवेदनमा अख्तियारले अनुसन्धान थालेको प्रवक्ता सुरेश न्यौपानेले बताएका छन् ।

काठमाडौं ,१९ माघ । अख्तियार दुरुपयोग अनुसन्धान आयोगले त्रिभुवन अन्तर्राष्ट्रिय विमानस्थल भन्सार कार्यालयको वैदेशिक हुलाक भन्सार शाखामा कार्यरत अधिकृत ईन्द्र न्यौपानेसहित तीन जनालाई घुस रकमसहित नियन्त्रणमा लिएको छ।
अख्तियारका अनुसार आइतबार (माघ १८) उनीहरूलाई घुस लिएको दसी प्रमाणसहित नियन्त्रणमा लिइएको हो। सोमबार जारी विज्ञप्तिअनुसार पक्राउ पर्नेमा वैदेशिक हुलाक भन्सार शाखाका अधिकृत न्यौपाने, सोही कार्यालयका कार्यालय सहयोगी गणेशप्रसाद पुडासैनी तथा गोश्वरा हुलाक कार्यालय, पार्सल (निकासी) शाखामा कार्यरत नायब सुब्बा छविप्रसाद रिजाल रहेका छन्।
कुरियर कम्पनीमार्फत विभिन्न सामान विदेश पठाउँदा सेवाग्राहीसँग घुस/रिसवत माग गरेको भन्ने सूचना तथा उजुरीको आधारमा अख्तियार दुरुपयोग अनुसन्धान आयोग, टंगालबाट खटिएको टोलीले उनीहरूलाई मिति २०८२ माघ १८ गते गोश्वरा हुलाक कार्यालय, डिल्लीबजारबाट घुससम्बन्धी दसी प्रमाणसहित नियन्त्रणमा लिएको हो।
अख्तियारका अनुसार पक्राउ परेकाहरूको साथबाट २३ थान मोबाइल फोन पनि बरामद गरिएको छ। साथै, कार्यालय सहयोगी पुडासैनीको कार्यकक्षमा रहेको टेबुलको घर्राबाट घुसबापत लिइसकेको १० हजार रुपैयाँ, सोही स्थानबाट स्रोत नखुलेको ४० हजार ३५० रुपैयाँ तथा उनको साथबाट स्रोत नखुलेको ९६ हजार ७० रुपैयाँ गरी कुल १ लाख ४६ हजार ४२० रुपैयाँ बरामद गरिएको छ।
त्यसैगरी, नायब सुब्बा रिजालको साथबाट घुसबापत लिइसकेको २० हजार रुपैयाँ र स्रोत नखुलेको १८ हजार ८४८ रुपैयाँ गरी कुल ३८ हजार ८४८ रुपैयाँ तथा अन्य स्रोत नखुलेको रकमसमेत गरी कुल २ लाख ६८ हजार २८८ रुपैयाँ बरामद गरिएको अख्तियारले जनाएको छ। पक्राउ परेकाहरूमाथि थप अनुसन्धान भइरहेको अख्तियार दुरुपयोग अनुसन्धान आयोगले जनाएको छ।

प्यूठान ,१९ माघ । प्यूठानमा एक युवकले आफ्नै भाइसँग मिलेर योजनाबद्ध रूपमा श्रीमतीको हत्या गरेको घटना सार्वजनिक भएको छ। गौमुखी गाउँपालिका–६ लिबाङका १९ वर्षीय अनिल घर्तीले १९ वर्षीया श्रीमती शर्मिला घर्तीलाई भीरबाट धकेलेर हत्या गरेको प्रहरीले जनाएको छ।

जिल्ला प्रहरी कार्यालय प्यूठानका प्रवक्ता प्रहरी निरीक्षक हरि भट्टराईका अनुसार अनिलले १७ वर्षीय भाइको सहयोगमा हत्या योजना बनाएका थिए। प्रेम सम्बन्धपछि कानुनविपरीत दुई वर्षअघि बालविवाह गरेका अनिल पछिल्लो समय श्रीमतीमाथि शंका गर्न थालेका थिए।

प्रहरीका अनुसार उनले शर्मिलामाथि परपुरुषसँग सम्बन्ध रहेको आरोप लगाउँदै बारम्बार विवाद गर्दै आएका थिए। यही विषयमा भाइसँग छलफल गरेपछि दुवैले मिलेर हत्या गर्ने योजना बनाएका थिए।

माघ १६ गते राति साढे ८ बजेतिर अनिलले शर्मिलालाई ‘इभनिङ वाक’ जाने बहानामा घरबाट बाहिर लगेका थिए। घर नजिकैको चौरसँगै रहेको भीरमा पुगेपछि उनले शर्मिलामाथि दुर्व्यवहार गर्दै स्टिलको रेलिङमा टाउको ठोक्काइ घाइते बनाएका थिए। कराउन खोजेपछि उनलाई भीरबाट तल धकेलिएको प्रहरीले जनाएको छ।
शर्मिला पहिलो पटक करिब २५–३० मिटर तल अड्किएकी थिइन्।

त्यसपछि अनिल र उनका भाइ भीरमुनि झरेर अचेत अवस्थामा रहेकी शर्मिलालाई पुनः तलतिर धकेलेका थिए। दोस्रो पटक धकेलिँदा उनी झन्डै १५० मिटर तल खसेकी थिइन्।

घटनास्थलको अवस्था शंकास्पद देखिएपछि प्रहरीले अनुसन्धान थालेको थियो। “शव पुगेको स्थान सामान्य दुर्घटनाबाट सम्भव नदेखिएपछि शंका उत्पन्न भयो,” प्रहरी निरीक्षक भट्टराईले बताए।

सोधपुछका क्रममा अनिलले दाजुभाइ मिलेर हत्या गरेको योजना र घटनाको विवरण स्वीकार गरेको प्रहरीले जनाएको छ। परपुरुषसँग सम्बन्धको शंकाकै कारण हत्या गरिएको उनीहरूले बताएका छन्।

हाल अनिल र उनका भाइ प्रहरी हिरासतमा छन्। जिल्ला अदालतबाट म्याद थप गरी उनीहरूविरुद्ध कर्तव्य ज्यान शीर्षकमा मुद्दा दर्ता गरी थप अनुसन्धान भइरहेको प्रहरीले जनाएको छ।

दाङ,१२ माघ । दाङमा प्रहरीले लागुऔषध ब्राउन सुगरसहित तीनजनालाई पक्राउ गरेको छ । जिल्ला प्रहरी कार्यालयका सुचना अधिकारी तथा डिएसपी चक्र बहादुर शाहका अनुसार प्रहरीले विशेष सुचनाको आधारमा तीनजनालाई गत शुक्रवार दिउँसो सवा चार बजेतिर पक्राउ गरेको हो ।

पक्राउ पर्नेहरुमा तुलसीपुर -१७ बस्ने २७ बर्षिय दामोदर केसी र २३ बषिय पुजन बुढाथोकी रहेका छन् । पक्राउ परेका उनीहरुको साथबाट दुईसय ३० मिलिग्राम लागु औषध ब्राउन सुगर० बरामद गरेको डिएसपी शाहले जानकारी दिए।
उनीहरु विरुद्ध जिल्ला अदालतमा लागु औषध मुद्धा दर्ता गरी सात दिनको म्याद थप गरी अनुसन्धान भईरहेको उनले बताए ।

यस्तैगरी गत शनिवार तुलसीपुर- ९ बेलुवाबाट पनि एक जनालाई पक्राउ गरेको प्रहरीले बताएको छ । पक्राउ पर्नेमा सोहि ठाउँ निवासी ३१ बर्षिय लाली वली योगी रहेका छन् । प्रहरीले उनको साथबाट एक सय साठी मिलिग्राम लागु औषध ब्राउन सुगर बरामद गरी लागु औषध मुद्धामा सात दिनको म्याद थप गरेर आवश्यक अनुसन्धान भईरहेको प्रहरीले बताएको छ ।

दाङ,१२ माघ । भारतीय नागरिकलाई गैरकानुनी रूपमा नेपाली नागरिकता दिएको आरोपमा दाङको इलाका प्रशासन कार्यालय लमहीका तत्कालीन कार्यालय प्रमुख शाखा अधिकृत प्रेमबहादुर खवाससहित ६ जनाविरुद्ध भ्रष्टाचार मुद्दा दायर गरिएको छ। अख्तियार दुरुपयोग अनुसन्धान आयोगले सोमबार विशेष अदालतमा मुद्दा दायर गरेको हो।

मुद्दा दायर गरिएकामध्ये इलाका प्रशासन कार्यालय लमहीका तत्कालीन प्रमुख शाखा अधिकृत खवास, राजपुर गाउँपालिका–४ का वडाध्यक्ष रामेश्वर अहिर, सोही वडाका तत्कालीन वडा सचिव राजेश कुमार कहार र कार्यालय सहायक मिना चौधरी रहेका छन्।
त्यसैगरी भारतीय नागरिक आलम जोल्हा र आएसा जोल्हालाई मतियारका रूपमा प्रतिवादी बनाइएको छ।

अख्तियारका अनुसार मिलेमतोमा बदनियत राखी नागरिकता प्राप्त गर्न अयोग्य गैरनेपाली व्यक्ति आलम जोल्हालाई राजपुर गाउँपालिका–४ स्थायी ठेगाना भएका दिवंगत सनाउल्ला जोल्हाको छोरा देखाई गैरकानुनी रूपमा नागरिकता दिलाइएको हो।

सनाउल्ला जोल्हाको १५ वैशाख ०३८ मै मृत्यु भइसकेको भए पनि १५ वैशाख ०४१ मा मृत्यु भएको भनी झुट्टा विवरण उल्लेख गरी मृत्युदर्ता प्रमाणपत्र तयार गरिएको अख्तियारको आरोप छ। साथै आलम जोल्हाको जन्म २५ फागुन ०३९ मा तत्कालीन राजपुर गाविस–३ दुलैयामा भएको भनी झुट्टा जन्मदर्ता प्रमाणपत्र बनाइएको पनि आरोपपत्रमा उल्लेख छ।

नागरिकता तथा जन्मदर्ताका लागि सिफारिस गरिएका व्यक्ति स्थानीय हुन् वा होइनन् भन्ने यकिन गर्नुपर्ने कानुनी दायित्व हुँदाहुँदै सार्वजनिक पदमा रहेका व्यक्तिहरूले गैरकानुनी लाभ लिने उद्देश्यले सरकारी कागजातमा अनाधिकृत रूपमा केरमेट, सच्याउने तथा हेरफेर गरेको अख्तियारको दाबी छ।

प्रतिवादी आएसा जोल्हाले आलम जोल्हा आफ्नो सहोदर भाई भएको भनी झुट्टा सनाखत गरेको र सोही आधारमा वडाध्यक्ष रामेश्वर अहिरले सिफारिस गरेको पनि उल्लेख गरिएको छ।

त्यही सिफारिसका आधारमा इलाका प्रशासन कार्यालय लमहीका तत्कालीन प्रमुख प्रेमबहादुर खवासले स्थानीय प्रहरीमार्फत् आवश्यक यकिन नगरी, पेस गरिएका कागजातको चेकजाँचसमेत नगरी, झुट्टा कागजातहरू जानीबुझी स्वीकार गरी २८ मंसिर ०७५ मा आलम जोल्हालाई बंशजको आधारमा नागरिकता दिएको अख्तियारको दाबी छ।