प्रधानमन्त्री ओलीले तोके देउवा प्रधानमन्त्री बन्ने मिति

दाङ,५ फागुन ।प्रधानमन्त्री केपी शर्मा ओलीले १७ महिनापछि नेपाली कांग्रेसका सभापति शेरबहादुर देउवालाई प्रधानमन्त्रीको जिम्मेवारी सुम्पिने घोषणा गरेका छन्। लुम्बिनी प्रदेश सभामा विशेष सम्बोधन गर्दै उनले आफूलाई हटाउन कुनै बल गर्न नपर्ने भन्दै निर्धारित समयपछि आफैं पद त्याग्ने बताएका छन्।

ओलीले भने, “अब १७ महिना मैले प्रधानमन्त्री चलाउँछु। त्यसपछि शेरबहादुर देउवालाई प्रधानमन्त्रीत्व छोड्छु। यो त घोषणा भइसकेको कुरा हो। केपी ओलीलाई हराउन कुनै बल लगाउनु पर्दैन, म आफैं छोड्छु बेला पुगेपछि।”

उनले सरकार अस्थिर बनाउन गरिने कुनै पनि प्रयत्न प्रभावहीन रहने दाबी गरे। “१७ महिनासम्म सरकार ढाल्न कुनै उपाय काम लाग्दैन। बोटमै फल पाक्न दिनुपर्छ, जबरजस्ती पकाउन खोज्नुको अर्थ छैन,” उनले भने।