नागरिकता किर्ते अभियोगमा फरार वडाध्यक्ष ७ महिनापछि पक्राउ

काठमाडौं,२९ असार ।नागरिकतामा किर्ते गरेको अभियोगमा फरार रहेका वडा अध्यक्ष पक्राउ परेका छन्। धादिङको धुनीवेशी नगरपालिका–४ का वडा अध्यक्ष हरिप्रसाद सुवेदी सात महिनापछि पक्राउ परेका छन्।

सुवेदीलाई शनिबार काठमाडौँको कलंकीबाट पक्राउ गरिएको जिल्ला प्रहरी कार्यालय धादिङले जनाएको छ। उनीविरुद्ध सार्वजनिक किर्ते मुद्दा दर्ता भई जिल्ला अदालत धादिङमा विचाराधीन रहेको छ।

सुवेदीमाथि उमेर नपुगेको नाबालकलाई बालिग देखाई झुटो जन्मदर्ता प्रमाणपत्र तयार पारेको र सोही प्रमाणका आधारमा नागरिकता बनाएर करोडौं मूल्यको जग्गा बिक्री गरेको आरोप छ।

यस प्रकरणमा सुवेदीसहित ७ जनाविरुद्ध गत मंसिर १२ गते अदालतबाट पक्राउ पुर्जी जारी भएको थियो। पक्राउ पुर्जी जारी भएकामध्ये तत्कालीन वडा सचिव मिलन कुमार सुवेदी, वडा कार्यालयका कर्मचारी निर्मल गौतम, धादिङ थाक्रे गाउँपालिका–८ का रविन्द्र तामाङ, धुनीवेशी–४ का राजु तामाङ र मदन दमाई, तथा काठमाडौं तारकेश्वर नगरपालिका–४ की जमुना परियार रहेका छन्।

अनुसन्धानका अनुसार जमुना परियारको छोराको उमेर बढाएर दोस्रो जन्मदर्ता बनाइएको र त्यसैका आधारमा बालिग देखाई छोराको नाममा रहेको जग्गा बेचिएको खुलेको छ। यो प्रक्रियाबाट करिब एक करोड रुपैयाँभन्दा बढीको जग्गा बिक्री गरिएको प्रहरीले जनाएको छ।

पक्राउ परेका सुवेदीलाई थप अनुसन्धानका लागि धादिङ लैजाने तयारी भइरहेको प्रहरीको भनाइ छ।

२०७४ सालको स्थानीय तह निर्वाचनमा सुवेदी एमालेबाट र पछिल्लो निर्वाचनमा एकीकृत समाजवादीबाट वडाध्यक्षमा निर्वाचित भएका थिए।