प्रधानमन्त्री कार्कीको प्रतिवद्धता: तोकिएको मितिमै निर्वाचन हुने

काठमाडौं, १३ असोज । प्रधानमन्त्री सुशीला कार्कीले निर्धारित मितिमा प्रतिनिधिसभा निर्वाचन गराउन सरकार पूर्ण रूपमा प्रतिबद्ध रहेको बताएकी छन्।

बडा दसैंका अवसरमा मंगलबार शुभकामना सन्देश जारी गर्दै प्रधानमन्त्री कार्कीले युवापुस्ताको अभूतपूर्व आन्दोलनको जगमा वर्तमान सरकार गठन भएको स्मरण गराउँदै तोकिएको समयमा निर्वाचन सम्पन्न गर्ने सरकारको दृढ प्रतिबद्धता व्यक्त गरिन्। साथै उनले देशमा सुशासन कायम गर्न सरकार कटिबद्ध रहेको स्पष्ट पारेकी छन्।

प्रधानमन्त्री कार्कीले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइहरू, साथै संसारभर छरिएर बसोबास गर्ने नेपाली भाषीहरूमा सुख, शान्ति र समृद्धिको कामना गरेकी छन्।

यसैबीच, प्रधानमन्त्री तथा मन्त्रिपरिषद्को कार्यालयले यस वर्ष प्रधानमन्त्री कार्कीले टीका नलगाउने र सर्वसाधारणलाई पनि टीका लगाइदिने कार्यक्रम नरहेको जानकारी दिएको छ।