विद्युत् ट्रिपिङ समस्यामा उल्लेख्य सुधार

काठमाडौं,१२ चैत । छिनछिनमा विद्युत् जाने (ट्रिपिङ) र आपूर्ति अवरोध हुने समस्यामा यस वर्ष उल्लेख्य सुधार देखिएको छ।

नेपाल विद्युत् प्राधिकरणका अनुसार गत आर्थिक वर्ष २०८१/८२ को तुलनामा चालु आव २०८२/८३ मा ट्रिपिङको सङ्ख्या र विद्युत् अवरोधको समय दुवै घटेको छ।
प्राधिकरणका कार्यकारी निर्देशक हितेन्द्रदेव शाक्यले प्रसारण तथा वितरण लाइन सुदृढीकरण, सबस्टेसन सुधार तथा प्राविधिक समस्या समाधानका कारण सुधार आएको बताएका छन्।

“एक वर्षअघिको तुलनामा ट्रिपिङमा उल्लेख्य कमी आएको तथ्याङ्कले देखाएको छ,” उनले भने।
तथ्याङ्कअनुसार साउनदेखि फागुनसम्मका महिनामा ट्रिपिङको सङ्ख्या र विद्युत् अवरोधको समय दुवै घटेको छ। साउनमा १२९ पटक हुने ट्रिपिङ घटेर ११५ मा झरेको छ भने अवरोध समय पनि ५९ घण्टाबाट ४४ घण्टामा झरेको छ।

यस्तै, भदौ, असोज, कात्तिक, मंसिर, पुस, माघ र फागुन महिनामा पनि ट्रिपिङ र अवरोध समय घटेको प्राधिकरणले जनाएको छ।

प्राधिकरणले चैतदेखि असारसम्म ट्रिपिङ बढी हुने भए पनि गत वर्षको तुलनामा यस वर्ष पनि थप सुधार हुने अपेक्षा गरेको जनाएको छ।