सरकारी निकायका सूचना अब सरकारी मिडियामा

दाङ, १९ चैत । सरकारी निकायले अबदेखि विज्ञापन तथा सूचना सरकारी सञ्चारमाध्यममार्फत मात्रै प्रकाशन तथा प्रसारण गर्नुपर्ने भएको छ।

प्रधानमन्त्री तथा मन्त्रिपरिषद् कार्यालयले सङ्घ, प्रदेश र स्थानीय तहलाई बुधबार परिपत्र जारी गर्दै आगामी दिनमा सरकारी स्वामित्वका सञ्चारमाध्यममै सूचना र विज्ञापन प्रकाशन/प्रसारण गर्न निर्देशन दिएको हो।

परिपत्रमा सार्वजनिक खर्चमा मितव्ययिता कायम गर्न, सूचना तथा विज्ञापन प्रणालीमा एकरूपता र पारदर्शिता ल्याउन तथा सरकारी सञ्चारमाध्यमको प्रवर्द्धन गर्ने उद्देश्य उल्लेख गरिएको छ।

त्यसका लागि आफू तथा मातहतका निकायले सोहीअनुसार कार्यान्वयन गर्न २०८२ चैत १८ गते सचिवस्तरको निर्णयअनुसार परिपत्र गरिएको जनाइएको छ।