ट्रकबाट २० गोरु बरामदः दुई जना पक्राउ

दाङ,२५ वैशाख । अवैध रूपमा गोरु ओसारपसार गरेको आरोपमा प्रहरीले ट्रकसहित दुई जनालाई पक्राउ गरेको छ। पक्राउ पर्नेहरूमा झापाको मेचीनगर नगरपालिका–११ का ३७ वर्षीय खड्गबहादुर दाहाल र ट्रक चालक मोरङको बुढीगंगा गाउँपालिका–२ का ३५ वर्षीय विजयकुमार महत्तो रहेका छन्। उनीहरूलाई बिहीबार कपिलवस्तुबाट नियन्त्रणमा लिइएको हो।

प्रहरीका अनुसार पश्चिमबाट पूर्वतर्फ लैजाँदै गरेका २० वटा गोरु कपिलवस्तुको शिवराज नगरपालिका–९ बाट ना ५ ख २३६४ नम्बरको ट्रकमा अवैध रूपमा राखिएको अवस्थामा फेला परेको थियो।

बरामद गरिएका गोरुहरूलाई शिवराज नगरपालिका–बिजौरीस्थित पशु संरक्षण संस्था नेपालको संरक्षणमा राखिएको छ।

कपिलवस्तु जिल्ला अदालतले पक्राउ परेका दुवै जनाविरुद्ध पशुपंक्षीसम्बन्धी कसुर मुद्दामा अनुसन्धान गर्न पाँच दिनको म्याद दिएको छ। जिल्ला प्रहरी कार्यालय कपिलवस्तुका सूचना अधिकारी डीएसपी रिपेन्द्रकुमार सिंहका अनुसार घटनाबारे थप अनुसन्धान भइरहेको छ।