मुस्ताङ पुगेका दर्शनार्थी अप्ठेरोमा

मुस्ताङ, ११ कार्तिक । गएरातिदेखि परेको हिमपातका कारण मुस्ताङमा पुगेका मुक्तिनाथ दर्शनार्थी अप्ठेरोमा परेका छन्। बाक्लो हिमपातले सडक अवरुद्ध भएपछि स्थानीय प्रशासनले यात्रुहरूलाई तत्काल नयाँ यात्रा योजना नबनाउन आग्रह गरेको हो।

प्रशासनका अनुसार सडकमा बाक्लो हिउँ जमेकाले दुर्घटनाको जोखिम बढेको छ। त्यसैले मुक्तिनाथ जाने यात्रुहरूलाई आवश्यक नपरी उच्च हिमाली क्षेत्रतर्फ नजान अनुरोध गरिएको छ।

मुस्ताङसँगै म्याग्दी, पर्वत र बागलुङका उच्च भेगहरूमा पनि हिमपात जारी छ भने तलका क्षेत्रमा वर्षा भएको जनाइएको छ। हिमपातका कारण स्थानीय बासिन्दा र यात्रु दुवैलाई आवतजावतमा कठिनाइ भएको छ।